Mga Bilang 21
21
Kapangganahan Laban sa Mga Cananeo
1Kan madangog kan hade nin Arad, na sarong Cananeo na nag-eerok sa habagat na parte kan daga nin Canaan, na maagi an mga Israelita sa Atarim, sinalakay niya sinda asin binihag an nagkapira sainda. 2Dangan nanuga an mga Israelita sa Kagurangnan: “Kun itutugot mong madaog mi an mga tawong iyan, tutunawon mi sinda sagkod an saindang mga syudad.” 3Dinangog sinda nin Kagurangnan asin tinabangan na madaog an mga Cananeo. Kaya ginaradan kan mga Israelita an mga Cananeo asin ginaraba ninda an mga syudad kaini. An lugar na idto inapod nindang Horma.#21:3 HORMA: Sa Hebreyo, an ngaran na ini nangangahulogan gaba.
An Bronseng Halas
4Hale sa Bukid nin Hor, naglakaw an mga Israelita pasiring sa Dagat na Pula, tanganing mag-agi sa palibot kan daga nin Edom. Alagad sa dalan, nawaraan nin pasensya an mga tawo 5asin nagtararam sinda tumang sa Dios saka ki Moises. Naggurumod-gumod sinda, “Tadaw ta ilinuwas mo kami sa Egipto tanganing magadan sa desyertong ini na mayo nin pagkakan asin tubig? Nauuyam na kami sa mayong halagang pagkakan na ini!” 6Huli kaini, nagpadara an Kagurangnan nin mga mararang halas asin siningot kan mga ini an mga tawo kaya dakul sa sainda an nagadan. 7Nagduman an mga tawo ki Moises asin nagsabi, “Nagkasala kami kan magtaram kami tumang sa Kagurangnan asin saimo. Mamibi ka saiya na haleon an mga halas na ini.” Kaya namibi si Moises para sa mga tawo. 8Tinaraman nin Kagurangnan si Moises, “Gumibo ka nin sarong halas na bronse asin ibugtak mo sa sarong palo; an lambang masingot na humiling kaiyan, maoomayan.” 9Kaya naggibo si Moises nin sarong halas na bronse asin ibinugtak sa sarong palo. An siisay man na nasingot minahiling sa halas na bronse asin naoomayan.
Hale sa Bukid nin Hor sagkod sa Kapantayan kan mga Moabita
10Nagpadagos sa pagbaklay an mga Israelita asin nagkampo sinda sa Obot. 11Paghale ninda sa Obot, nagkampo sinda sa Iye-abarim, sa kalangtadan sa sirangan kan teritoryo nin Moab. 12Hale sa Iye-abarim nagbaklay sinda asin nagkampo sa Kapantayan nin Zered. 13Paghale ninda duman, nagkampo sinda sa parteng amihan kan Salog nin Arnon na nasa kalangtadan na nakakasagkod sa daga kan mga Amoreo. An Arnon iyo an pagdolonan kan mga Moabita asin kan mga Amoreo. 14Kaya nasusurat sa Libro kan mga Pakigera nin Kagurangnan,
“An banwaan nin Waheb sa Sufa
asin an mga kapantayan nin Arnon,
15an mga tukadon kan mga kapantayan
na minasagkod sa banwa nin Ar,
asin pasiring sa pagdolonan nin Moab.”
16Hale sa Arnon, nagpadagos sinda sa Beer, na iyo an bubon saen tinaraman nin Kagurangnan si Moises, “Tiponon mo an mga tawo asin tatawan ko sinda nin tubig.” 17Dangan nag-awit an Israel kan awit na ini:
“Paluwasa an tubig mo, O Bubon!
Asin sasabaton mi iyan nin awit—
18An bubon na kinalot kan mga prinsipe,
Asin kan mga lider kan mga tawo
Kinalot huli kan setro saka kan saindang mga sugkod.”
Naghale sinda sa kalangtadan dangan nagpasiring sa Mattana; 19hale duman nagpadagos sinda sa Nahaliel. Hale sa Nahaliel nagpasiring sinda sa Bamot; 20hale sa Bamot nagpasiring sinda sa kapantayan na sakop kan daga nin Moab, sa ibaba kan alitoktok kan Bukid nin Pisga na nakadungaw sa desyerto.
Kapangganahan Laban ki Hadeng Sihon asin ki Hadeng Og
(Deut. 2:26–3:11)
21Dangan nagpadara an mga Israelita ki Hadeng Sihon na Amoreo kan mensaheng ini: 22“Tugotan mo kaming mag-agi sa saimong daga. Dai kami maagi sa saimong kaomahan, ni sa saimong mga ubasan; dai kami mainom kan tubig sa saimong mga bubon. Maagi sana nanggad kami sa Tinampo kan Hade sagkod na makaluwas kami sa saimong teritoryo.” 23Alagad dai tinugotan ni Sihon na mag-agi sa saiyang daga an mga Israelita. Tinipon niya an saiyang hukbo asin nagduman sa kalangtadan sagkod sa Jahaz, dangan sinalakay an mga Israelita. 24Alagad ginadan kan mga Israelita an kadaklan kan mga kaiwal asin nasakop ninda an daga ni Sihon, magpoon sa Salog nin Arnon sagkod sa amihan kan Jabbok, na pasiring man sa mga Ammonita, huli ta makosog nin marahay an depensa kan pagdolonan kan mga Ammonita.#21:24 huli…Ammonita; Sa nagkapirang daan na traduksyon sagkod sa Jazer sa pagdolonan kan mga Ammonita. 25Sinakop kan mga Israelita an gabos na syudad kan mga Amoreo, kaiba an Hesbon asin an mga kataraed na banwa; duman na sinda nag-erok. 26An Hesbon iyo an pangenot na syudad ni Hadeng Sihon na Amoreo, na nakilaban sa dating hade nin Moab asin nakasakop kan bilog na daga sagkod sa Arnon. 27Kaya nag-awit an mga poeta,
“Madya kamo sa Hesbon, ini saindong patindogon.
Pakarahayon nindo an syudad ni Sihon.
28Hale sa syudad nin Hesbon
luminuwas siring sa kalayo an hukbo ni Sihon,
Asin ginaba kaiyan an syudad nin Ar sa Moab.
Hinalon an mga kagurangnan kan kabubuldan nin Arnon.
29Herak man saimo, O Moab!
Ini an saimong kataposan, O banwaan nin Kemos!
Pinabayaan niyang magin paradulag an saiyang mga aking lalaki
Asin an mga aking babae nagin bihag kan hadeng Amoreo.
30Kaya naubos an saiyang kapagarakian
magpoon sa Hesbon sagkod sa Dibon
Magpoon sa Nasim sagkod sa Nofa, harani sa Medeba.”
31Kaya nag-erok an mga Israelita sa daga kan mga Amoreo. 32Dangan nagpadara si Moises nin mga espiya tanganing siyasaton an syudad nin Jazer. Nasakop ninda an Jazer sagkod an mga nakapalibot na banwa kaiyan. Pinalayas ninda an mga Amoreo na nag-eerok duman.
33Nagbalik an mga Israelita asin nagpasiring sa Basan. Alagad nagluwas si Hadeng Og nin Basan, kaiba an saiyang hukbo tanganing salakayon sinda sa Edrei. 34Nagtaram an Kagurangnan ki Moises, “Dai ka matakot saiya. Itatao ko siya saimo, an gabos niyang mga tawohan sagkod an bilog niyang daga. Giboha saiya an ginibo mo ki Sihon na hade kan mga Amoreo, na nag-erok sa Hesbon.” 35Kaya ginadan kan mga Israelita si Og, an mga aking lalaki niya, sagkod an gabos niyang tawohan; mayo sindang itinadang buhay. Dangan sinakop ninda an saiyang daga.
Currently Selected:
Mga Bilang 21: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
