Mga Bilang 19
19
An Abo kan Pulang Baka
1Pinagbotan nin Kagurangnan si Moises saka si Aaron, 2na itao sa mga Israelita an minasunod na pagsusundon. Magdara kamo nin pulang baka na mayo nin kaninan asin dai pa lamang nasasakalan. 3Itao nindo an baka ki Eleazar na padi asin darahon iyan sa luwas kan kampo dangan bunoon sa saiyang atubang.#19:3 Itao…atubang; o Dadarahon niya iyan sa luwas pasiring sa sirangan kan kampo dangan bubunoon niya. 4Makua si Eleazar nin dikit na dugo kan hayop sa paagi kan saiyang muro, dangan pitong beses niyang iwiwirik iyan sa direksyon kan Tabernakulo. 5Tututongon na bilog an baka kaiba an anit, karne, dugo, saka bituka, sa atubang kan padi. 6Dangan makua siya nin kahoy na sedro, sarong sanga nin isopo, asin sarong pulang lubid; an mga iyan itatapok niya sa kalayong pinagtututongan kan baka. 7Pakatapos, lalabahan niya an saiyang mga gubing, mangangarigos siya, asin pwede na siyang maglaog sa kampo; alagad magigin maati siya sagkod magbanggi. 8Kaipuhan labahan man kan lalaking nagtutong kan baka an saiyang mga gubing; magkarigos siya, alagad magigin maati man siya sagkod magbanggi. 9Dangan sarong malinig na lalaki an mapunpon kan abo kan baka asin ibubugtak niya iyan sa sarong malinig na lugar sa luwas kan kampo. Sasarayon an abo para sa komunidad nin Israel tanganing gamiton sa pag-andam kan tubig na panhale kan pagkanimaati. An seremonyang ini ginigibo sa paghale nin kasalan. 10Kaipuhan labahan kan lalaking nagpunpon kan abo an saiyang mga gubing, alagad magigin maati siya sagkod magbanggi. An pagsusundon na ini kukuyogon sagkod lamang kan mga Israelita asin kan mga dayuhan na nakikihimanwa sainda.
An Pagduta sa Gadan
11An magduta sa tawong gadan magigin maati sa laog nin pitong aldaw. 12Sa ikatolo asin sa ikapitong aldaw, kaipuhan linigan niya an saiyang sadiri kan tubig na panlinig dangan magigin malinig siya. Alagad kun dai niya linigan an saiyang sadiri sa ikatolo saka sa ikapitong aldaw, dai siya magigin malinig. 13An magduta sa tawong gadan asin dai maglinig kan saiyang sadiri, magdadanay na maati huli ta dai inula saiya an tubig na panlinig. Dinigtaan niya an Tabernakulo nin Kagurangnan, asin dai na siya ibibilang na kaayon sa banwaan nin Dios.
14Iyo ini an pagsusundon kun may magadan sa laog nin tolda: an lumaog sa tolda asin an yaon duman magigin maati sa laog nin pitong aldaw. 15An gabos na tapayan saka koron na mayo nin takop magigin maati man. 16Sa luwas kan tolda, kun may magduta sa tawong ginadan o nagadan sa natural na paagi, o kun may magduta sa tolang nin sarong tawo o sa sarong lulubngan, magigin maati sa laog nin pitong aldaw.
17Tanganing mahale an pagkanimaati, makua sinda nin dikit na abo kan tinutong na dolot para sa kasalan, ibubugtak ninda iyan sa sarong koron dangan sasalakan nin preskong tubig. 18Sa enot na kaso, an sarong malinig na tawo iyo an makua nin sanga nin isopo, ibubuntog niya iyan duman sa tubig, asin wiwirikan niya an tolda, an mga kagamitan sagkod an mga tawong yaon duman. Sa ikaduwang kaso, wiwirikan nin sarong malinig na tawo an nagduta sa tolang nin tawo, sa bangkay o sa lulubngan. 19Sa ikatolo asin sa ikapitong aldaw, wiwirikan niya an maating tawo. Sa ikapitong aldaw, lilinigan niya an tawo, na pakalaba kaini kan mga gubing asin pakakarigos, magigin malinig pagsolnop kan aldaw.
20Alagad an tawong nagin maati asin dai maglinig kan saiyang sadiri magdadanay na maati huli ta dai inula saiya an tubig na panlinig. Dinigtaan niya an Tabernakulo nin Kagurangnan asin dai na siya ibibilang na kaayon sa banwaan nin Dios. 21An pagsusundon na ini kukuyogon nindo sagkod lamang. An nagwirik kan tubig na panlinig kaipuhan maglaba man kan saiyang mga gubing; an makaduta kan tubig magigin maati sagkod magbanggi. 22Magigin maati an anoman na kinapotan kan maating tawo asin an siisay man na kumapot kaiyan magigin maati sagkod pagkabanggi.
Currently Selected:
Mga Bilang 19: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
