Mga Bilang 1
1
An Enot na Pagsenso sa Israel
1Kan enot na aldaw kan ikaduwang bulan kan ikaduwang taon pakahale kan banwaan nin Israel sa Egipto, nagtaram an Kagurangnan ki Moises sa Tabernakulo duman sa Desyerto nin Sinai: 2“Sensohon nindo ni Aaron an bilog na komunidad nin Israel sosog sa saindang mga kamaganakan asin mga pamilya. Ilista nindo an ngaran kan lambang lalaki 3na an edad beynte paitaas, na maninigong maglingkod sa hukbo. 4Magpatabang kamo sa sarong pamayo nin kamaganakan hale sa lambang tribu.” 5-16Iyo ini an ngaran kan mga lalaki, na mga lider sa saindang mga tribu, na pinili hale sa saindang komunidad para sa trabahong ini:
| Tribu | Pamayo kan Kamaganakan |
|---|---|
| Ruben | si Elizur na aking lalaki ni Sedeur |
| Simeon | si Selumiel na aking lalaki ni Zurisaddai |
| Juda | si Nason na aking lalaki ni Amminadab |
| Issakar | si Netanel na aking lalaki ni Zuar |
| Zabulon | si Eliab na aking lalaki ni Helon |
| Efraim | si Elisama na aking lalaki ni Ammihud |
| Manases | si Gamaliel na aking lalaki ni Pedazur |
| Benjamin | si Abidan na aking lalaki ni Gideoni; |
| Dan | si Ahiezer na aking lalaki ni Ammisaddai |
| Aser | si Pagiel na aking lalaki ni Okran |
| Gad | si Eliasaf na aking lalaki ni Deuel |
| Neftali | si Ahira na aking lalaki ni Enan. |
17-18Sa tabang kan mga lalaking ini, tinipon ni Moises saka ni Aaron an bilog na komunidad sa enot na aldaw kan ikaduwang bulan, asin binilang ninda an gabos na tawo sosog sa saindang mga kamaganakan sagkod pamilya. An ngaran kan gabos na lalaki na beynteng taon an edad paitaas binilang ninda asin ilinista 19sosog sa pagboot nin Kagurangnan. Ginibo ni Moises an pagsenso duman sa Desyerto nin Sinai. 20-46An ngaran kan mga lalaking beynteng taon an edad paitaas, na maninigong maglingkod sa hukbo, ilinista sosog sa saindang kamaganakan asin pamilya, magpoon sa tribu ni Ruben na matuang aking lalaki ni Jacob. Ini an kabilogan na bilang kan lambang tribu:
| Tribu | Bilang |
|---|---|
| Ruben | kwarenta y seis mil kinyentos |
| Simeon | singkwenta y nuebe mil tres syentos |
| Gad | kwarenta y singko mil seis syentos singkwenta |
| Juda | setenta y kwatro mil seis syentos |
| Issakar | singkwenta y kwatro mil kwatro syentos |
| Zabulon | singkwenta y syete mil kwatro syentos |
| Efraim | kwarenta mil kinyentos |
| Manases | treynta y dos mil dos syentos |
| Benjamin | treynta y singko mil kwatro syentos |
| Dan | sesenta y dos mil syete syentos |
| Aser | kwarenta y uno mil kinyentos |
| Neftali | singkwenta y tres mil kwatro syentos |
An kabilogan na bilang minaabot sa seis syentos tres mil kinyentos singkwenta.
47An mga Levita dai senenso kaiba kan ibang mga tribu, 48huli ta nagtaram an Kagurangnan ki Moises, 49“Pagsenso mo sa mga lalaking maninigong maglingkod sa hukbo, dai mo ipag-ayon an tribu ni Levi, 50kundi gibohon mo sindang paraataman kan Tabernakulo asin kan mga kagamitan kaini; sinda an madara kan Tabernakulo sagkod kan mga kagamitan kaiyan, maglilingkod diyan patin makampo sa palibot kaiyan. 51Kun maliwat kamo nin kampo, an mga Levita an matangkas kan Tabernakulo asin matugdok kaiyan sa bagong lugar. An magrani sa Tabernakulo pwera sainda, gagadanon. 52Itutugdok kan ibang mga Israelita an saindang mga tolda, an lambang saro sosog sa saiyang tribu, sa tamang kampo asin sa irarom kan sadiring bandera. 53Alagad an mga Levita makampo sa palibot kan Tabernakulo sa pagbantay kaiyan, tanganing mayo nin makadolok diyan na magigin dahelan kan pagkaanggot ko sa bilog na komunidad nin Israel.” 54Ginibo kan mga Israelita an gabos na ipinagboot nin Kagurangnan ki Moises.
Currently Selected:
Mga Bilang 1: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
