Levitico 9
9
Nag-atang si Aaron
1Sa sunod na aldaw pakatapos kan ordenasyon, inapod ni Moises si Aaron saka an saiyang mga aki asin an mga lider kan Israel. 2Sinabihan niya si Aaron, “Kumua ka nin sarong torilyong baka asin sarong lalaking karnero na anas mayo nin kaninan. An torilyong baka idolot mo para sa kasalan, asin an karnero para sa tinutong na atang. 3Sabihan mo an mga Israelita na magdara nin sarong lalaking kanding bilang dolot para sa kasalan, sarong baka saka sarong karnero na pareho sarong taon an edad asin parehong mayo nin kaninan para sa tinutong na atang. 4Magdara man sinda nin sarong torong baka asin saro pang karnero bilang dolot para sa katoninongan. Tututongon nindo iyan para sa Kagurangnan kaiba an dolot na pagkakan na sinalakan nin lana. Kaipuhan gibohon nindo iyan huli ta mapahiling saindo an Kagurangnan ngunyan na aldaw.”
5Dinara ninda ini gabos sa atubangan kan Tabernakulo siring sa ipinagboot sainda ni Moises, asin an bilog na Israel nagtiripon duman tanganing sambahon an Kagurangnan. 6Nagsabi si Moises sainda, “Iyo ini an ipinagboot nin Kagurangnan na gibohon nindo tanganing mahiling nindo an kamurawayan niya.” 7Dangan sinabihan niya si Aaron, “Dumuman ka sa altar dangan idolot mo an saimong atang asin an atang kan mga tawo para sa kasalan, saka an tinutong na atang tanganing mahale an saimong kasalan sagkod an kasalan kan mga tawo, siring sa ipinagboot nin Kagurangnan.”
8Nagduman si Aaron sa altar dangan binuno an torilyong baka na dolot para sa saiyang kasalan. 9Dinara saiya kan saiyang mga aki an dugo asin idinotdot niya digdi an saiyang muro dangan linahidan niya an mga sungay kan altar; an natadang dugo inula niya sa pamitisan kan altar. 10Dangan tinutong niya sa altar an taba, an duwang bato saka an pinakamarahay na kabtang kan katoy, siring sa ipinagboot nin Kagurangnan ki Moises, 11alagad an karne sagkod an anit kan hayop tinutong niya sa luwas kan kampo.
12Binuno niya an hayop na para sa sadiri niyang tinutong na atang. Dinara saiya kan saiyang mga aki an dugo, asin inula niya iyan sa apat na gilid kan altar. 13Itinao man ki Aaron kan saiyang mga aki an payo sagkod an mga pinedasong kabtang kan hayop dangan tinutong niya an mga ini duman sa altar. 14Hinugasan niya an bituka asin an nasa hurihan na mga bitis kan hayop dangan sinulo man an mga ini duman sa altar, sa ibabaw kan iba pang tinutong na atang.
15Pakatapos, idinolot niya an mga dolot kan mga tawo. Kinua niya an kanding na idinolot para sa kasalan kan mga tawo, asin pakabunoa niya, idinolot niya iyan arog kan ginibo niya sa dolot para sa saiyang kasalan. 16Kinua man niya an hayop para sa tinutong na atang dangan idinolot sosog sa mga pagsusundon. 17Idinolot man niya an dolot na pagkakan; huminakbot siya nin sarong gugom kan arina dangan sinulo niya sa altar, laen pa kan tinutong na atang sa pagkaaga. 18Binuno man niya an torong baka asin an karnero bilang dolot para sa katoninongan para sa mga tawo. Dinara saiya kan saiyang mga aki an dugo asin inula niya ini sa apat na gilid kan altar. 19An mga matabang kabtang kan torong baka saka kan karnero ibinugtak ni Aaron 20sa ibabaw kan daghan kan mga nasabing hayop dangan dinara ini gabos sa altar, asin tinutong an gabos na taba. 21Alagad an mga daghan kan mga hayop sagkod an toong hurihan na mga bitis, initaas niya sa Kagurangnan bilang espesyal na regalo para sa mga padi, siring sa ipinagboot ni Moises.
22Kan matapos ni Aaron an pagdolot, itinaas niya an saiyang mga kamot asin benendisyonan an mga tawo, dangan naglusad siya. 23Naglaog sa Tabernakulo si Moises saka si Aaron; pagluwas ninda, benendisyonan ninda an mga tawo. Nahiling kan mga tawo an kamurawayan nin Kagurangnan. 24Biglang ipinadara nin Kagurangnan an kalayo asin inubos kaini an tinutong na atang saka an mga taba na nasa altar. Kan mahiling ini kan mga tawo, nagkururahaw sinda gabos asin nagdarapa sa daga.
Currently Selected:
Levitico 9: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
