Levitico 26
26
An mga Bendisyon kan Pagkuyog
(Deut. 7:12-24; 28:1-14)
1Nagtaram an Kagurangnan, “Dai kamo maggibo nin mga ladawan o magpatindog nin mga estatwa, o hariging gapo o inukitan na mga gapo tanganing saindong sambahon. Ako an Kagurangnan na saindong Dios. 2Otobon nindo an sakuyang mga Sabbath asin galangan nindo an lugar na pinagsasambahan sako. Ako an Kagurangnan.
3“Kun kamo mamuhay sosog sa sakuyang mga togon asin magsunod kan sakuyang mga pagboot, 4papadarahan ko kamo nin uran sa tamang panahon tanganing magtao nin ani an daga asin mamunga an mga kahoy. 5Magigin dakul an saindong aanihon, kaya mantang nag-aani pa kamo kan saindong trigo maabot na an panahon na maguno kamo kan ubas asin mantang nagguguno pa kamo kan ubas, maabot na an panahon nin pagsabwag nin trigo. Mapapasaindo an gabos na boot nindong kakanon asin mamumuhay kamong matoninong sa saindong daga.
6“Tatawan ko nin katoninongan an daga asin magkakatorog kamo na dai matatakot sa kiisay man. Hahaleon ko an mga maringis na hayop sa daga asin dai na diyan magkakaigwa nin ralaban. 7Dadaogon nindo an saindong mga kaiwal; 8an lima sa saindo makakadaog nin sanggatos asin an sanggatos saindo makakadaog nin sampolong ribo. 9Bebendisyonan ko kamo saka tatawan nin dakul na aki; ootobon ko an sakong tipan sa saindo. 10Magigin dakul an saindong aanihon kaya magkakakan kamo nin trigo na haloy na nindong sinaray, asin itatapok nindo an natada kan huring pag-ani tanganing ikalaog nindo an bagong inani. 11Mag-eerok ako sa kaibahan nindo asin dai ko kamo babayaan. 12Iibahan ko kamo; ako an saindong magigin Dios asin kamo an magigin banwaan ko. 13Ako an Kagurangnan na saindong Dios, na nagkua saindo hale sa Egipto tanganing dai na kamo magin mga oripon. Binari ko na an saindong sakal asin pinalakaw ko kamo na daing sukat ikasopog.”
Mga Padusa sa Paglapas
(Deut. 28:15-68)
14“Alagad kun dai nindo ako dangogon asin dai nindo gibohon an mga pagboot ko, papadusahan ko kamo. 15Kun sayumahan nindo an sakuyang mga togon asin kaongisan nindo an sakuyang mga pagboot saka talikodan an sakong tipan, 16papadusahan ko kamo. Papadarahan ko kamo nin kasakitan—mga helang na dai nararahay asin kalentura na mabuta saindo saka magpapahalipot kan saindong buhay. Magtatanom kamo, alagad dai iyan makakatabang saindo huli ta an saindong mga kaiwal iyo an makakan kan bunga kaiyan. 17Lalabanan ko kamo, kaya madadaog kamo, asin an mga anggot saindo iyo an mahade saindo; madulag kamo maski mayo nin naglalamag saindo.
18“Kun pakatapos kaiyan, dai man giraray kamo magkuyog sako, dadagdagan ko an padusa saindo nin pitong beses huli kan saindong mga kasalan. 19Babarion ko an kapaabaw-abawan kan saindong kapangyarihan; dai magkakaigwa nin uran asin magigin mamara saka matagas siring sa lansang an saindong daga. 20Masasayang an gabos nindong paghihingowa huli ta dai magkakaigwa nin ani an saindong daga; dai man mamumunga an mga kahoy.
21“Kun padagos kamong magtalikod asin dai magdangog sako, dadagdagan ko pa nin pitong beses an saindong padusa huli kan saindong mga kasalan. 22Papadarahan ko kamo nin mga maringis na hayop na magadan kan saindong kaakian, asin makakan kan saindong mga ataman na hayop tanganing kadikit na sana an matada saindo kaya mayo na nin maglalakaw sa saindong mga dalan.
23“Kun pakatapos kaiyan, dai pa giraray kamo magdangog sako kundi padagos na magtalikod sako, 24ako na mismo an maatubang saindo asin papadusahan ko kamo nin pito pang beses kagabat ki sa mga enot na padusa. 25Dadarahan ko kamo nin gera huli sa pagtalikod nindo sa satong tipan, asin kun magdurulag kamo pasiring sa saindong mga syudad, papadarahan ko kamo nin mga helang na mayong karahayan, dangan mapipiritan kamong magsuko sa saindong mga kaiwal. 26Hahaleon ko an ginigikanan kan saindong pagkakan, kaya saro sanang pogon an magagamit nin sampolong babae tanganing lutoan kan gabos nindang tinapay. Irarasyon ninda iyan asin pakatapos nindong magkakan, dai man giraray kamo mababasog.
27“Kun pakatapos kaiyan magpadagos pa giraray kamo sa pagtalikod sako asin dai pa magsunod, 28sa sakong labi-labing kaanggotan, ako na an maatubang saindo asin papadusahan ko kamo nin pito pang beses kagabat ki sa mga naenot na padusa. 29Magigin makuri an saindong gutom, kaya kakakanon nindo an sadiri nindong mga aki. 30Raraoton ko an mga lugar na saindong pinagsasambahan sa kabubuldan, gagabaon ko an mga altar nin insenso, dangan itatapok ko an saindong mga bangkay sa ibabaw kan tumba nindong mga dios-dios. Sa kaanggotan, 31raraoton ko an saindong mga syudad, kaiba kan mga lugar na saindong pinagsasambahan, asin dai ko aakoon an saindong mga atang. 32Raraoton ko nanggad an saindong daga kaya ngangalasan kan saindong mga kaiwal na masakop kaiyan an siring na kamugtakan. 33Dadarahan ko kamo nin gera, asin iwawarak ko kamo sa mga dayuhan na daga. Mababayaan an sadiri nindong daga dangan magkakagaraba an saindong mga syudad. 34-35Dangan makakamtan kan daga an mga taon nin pahingalo na dai nindo ikinatao; mayo nin maataman kan daga asin mahihingaloan iyan mantang bihag kamo sa mga daga kan saindong mga kaiwal.
36“Gigibohon kong magkaigwa nin dakulang takot an mga nagkabirihag saindo kaya maski an hinghing kan sarong dahon na hinahayop nin doros makakapadulag na saindo. Madulag kamo na garo linalamag sa gera, asin matutumba kamo maski mayo man nin kaiwal sa harani nindo. 37Madadasmagan nindo an saindong kaiba asin matutumba kamo maski mayo man nin naglalamag saindo. Dai kamo makakalaban sa saindong mga kaiwal. 38Magagadan kamong mga bihag, asin hahalonon kamo kan daga kan saindong mga kaiwal. 39An nagkapira saindo na matatadang buhay sa daga kan saindong mga kaiwal, orog na maghahalipot an buhay huli kan saindong mga kasalan saka kan kasalan nin saindong mga ginikanan.
40“Alagad ikukumpisal kan saindong mga kapagarakian an saindang mga kasalan saka an kasalan kan saindang mga ginikanan na nagsuhay asin nagtumang sako, 41kaya tinalikodan ko sinda asin ipinadarang mga bihag sa daga kan saindang mga kaiwal. Alagad kun magpakumbaba an saindong kapagarakian asin mabayadan na ninda an padusa kan saindang mga kasalan, 42gigiromdomon ko an sakong tipan ki Jacob, ki Isaac asin ki Abraham. Babagohon ko an sakong panuga na tatawan nin daga an sakong banwaan. 43Alagad kaipuhan haleon ngona sinda sa daga tanganing mahingaloan iyan asin tanganing mabayadan ninda an padusa sa pagsuhay kan sakong mga togon saka mga pagboot. 44Alagad maski idtoon sinda sa daga kan saindang mga kaiwal, dai ko nanggad sinda papabayaan o gagadanon, huli ta pagsuway iyan sa tipan ko sainda, asin ako an Kagurangnan na saindang Dios. 45Babagohon ko an tipan na sakuyang ginibo sa saindang mga ginikanan kan ipahiling ko sa gabos na nasyon an sakong kapangyarihan sa pagpaluwas sa sakong banwaan hale sa Egipto tanganing ako, an Kagurangnan, magin saindang Dios.”
46Iyo ini an mga togon asin mga pagboot na itinao nin Kagurangnan ki Moises duman sa Bukid nin Sinai para sa banwaan nin Israel.
Currently Selected:
Levitico 26: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
