Levitico 24
24
Pag-ataman kan mga Ilawan
(Exo. 27:20-21)
1Tinaraman nin Kagurangnan si Moises, 2“Pagbotan mo an mga Israelita na magdara nin purong lana nin oliba para sa ilawan tanganing igwa nin ilaw na padagos na maglalaad. 3Aldaw-bangging aatamanon ni Aaron an ilawan na ibinugtak sa luwas kan kurtina, sa atubangan kan Kaban nin Tipan, sa laog kan Tabernakulo. Saro ining pagboot na ootobon kan gabos nindong kapagarakian sagkod pa man. 4Si Aaron an mag-aataman kan mga ilawan sa kandelerong gibo sa purong bulawan tanganing padagos na maglaad iyan sa atubangan nin Kagurangnan.
An Tinapay na Idinolot sa Dios
5“Magkua kamo nin doseng kilo nin pinong arina asin lutoon nindo iyan na magin doseng tinapay. 6Taytayon nindo iyan sa duwang linya sa ibabaw kan bulawan na lamesa; anom na tinapay sa sarong taytay. 7Dangan bugtakan nindo nin purong insenso an lambang taytay bilang sarong giromdom na dolot na pagkakan sa Kagurangnan kasalihid kan tinapay. 8Sa lambang Sabbath, papakarahayon ni Aaron an mga tinapay na iyan sa atubang nin Kagurangnan. Gigibohon ini kan banwaan nin Israel sagkod lamang. 9An tinapay magigin sadiri ni Aaron saka kan saiyang mga kapagarakian, asin kakakanon ninda iyan sa sarong banal na lugar, huli ta kabtang iyan kan banal na pagkakan na idinolot sa Kagurangnan para sa mga padi.”
Sarong Halimbawa kan Tama asin Matanos na Padusa
10-11Igwa kaidto nin sarong lalaking Egipcio an ama asin sarong Israelita an ina, na an ngaran Shelomit, na aking babae ni Dibri na gikan sa tribu ni Dan. Sarong aldaw, duman sa kampo, nakiiwal an lalaking ini sa sarong Israelita asin naglanghad siya sa Dios, kaya dinara siya ninda ki Moises. 12Pinabantayan siya ni Moises mantang naghahalat sinda kan itataram nin Kagurangnan manongod sa lalaki.
13Tinaraman nin Kagurangnan si Moises, 14“Daraha an lalaking iyan sa luwas kan kampo. An gabos na nakadangog saiya kan maglanghad siya, madoon kan saindang kamot sa saiyang payo, sa pagpatotoo na nagkasala siya. Dangan gagapoon siya kan bilog na komunidad sagkod na magadan. 15Pakatapos, sabihan mo an banwaan nin Israel na arog kaiyan an mangyayari sa kiisay man na maglanghad sa Dios. 16An siisay man na Israelita o dayuhan na nag-eerok sa Israel, na maglanghad sa Kagurangnan, gagadanon kan bilog na komunidad sa paagi nin paggapo.
17“An siisay man na maggadan sa saiyang kapwa, gagadanon man. 18An siisay man na magbuno kan hayop na bako man saiya, mabayad kaiyan. An prinsipyo iyo ini: buhay sa buhay.
19“An siisay man na makakulog sa saiyang kapwa, kukulogan man, siring kan ginibo niya. 20Kun nakabari siya nin tolang, babarian man siya nin tolang, mata sa mata, ngipon sa ngipon. An ginibo niya sa saiyang kapwa, iyo man an gigibohon saiya. 21An siisay man na magbuno kan hayop na bako man saiya, mabayad kaiyan. An siisay man na maggadan nin tawo, gagadanon man. 22Saro sanang togon an masakop kan gabos, Israelita man o dayuhan. Ako an Kagurangnan na saindong Dios.”
23Pakasabi ni Moises kaini sa banwaan nin Israel, dinara ninda sa luwas kan kampo an lalaki asin duman ninda ini ginapo sagkod na magadan. Sa paaging ini inotob kan banwaan nin Israel an ipinagboot nin Kagurangnan ki Moises.
Currently Selected:
Levitico 24: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
