Levitico 18
18
Mga Karigsokan sa Laman
1Tinaraman nin Kagurangnan si Moises 2na sabihan an mga Israelita, “Ako an Kagurangnan na saindong Dios. 3Dai nindo pag-arogon an mga ginigibo kan mga tawo sa daga nin Egipto, na nagin erokan nindo o an mga ginigibo kan mga nag-eerok sa Canaan, na pagdadarahan ko saindo. 4Kuyogon nindo an sakong mga togon asin gibohon nindo an sakong mga pagboot. Ako an Kagurangnan na saindong Dios. 5Sunodon nindo an mga pagboot saka mga togon na itinatao ko saindo; iyan an maligtas saindo. Ako an Kagurangnan.”
6Itinao nin Kagurangnan an minasunod na pagsusundon. Dai kamo makidorog sa kiisay man sa saindong mga kadugo. 7Dai nindo pagtawan nin kasosopgan an saindong ama huli sa pagdorog sa saindong ina. Kaipuhan dai nindo pagsopogon an saindong ina. 8Dai nindo pagtawan nin kasosopgan an saindong ama huli sa pagdorog sa kiisay man sa saiyang ibang agom. 9Dai nindo pagdorogan an saindong tugang na babae, maski siya tugang nindo sa ama o sa ina, namundag man siya o dai sa saindong harong. 10Dai nindo pagdorogan an saindong makoapo na babae; an kasosopgan niya, kasosopgan man nindo. 11Dai nindo pagdorogan an aking babae kan saindong ama sa ibang babae, huli ta tugang man nindo siya. 12-13Dai nindo pagdorogan an saindong tiya, tugang siya kan saindong ama o ina. 14Dai nindo pagdorogan an agom kan saindong tiyo; tiya nindo siya. 15Dai nindo pagdorogan an manugang nindong babae 16o an agom kan saindong tugang na lalaki. 17Dai nindo pagdorogan an aking babae o an makoapo na babae kan babaeng saindong dinorogan; tibaad kadugo pa nindo sinda, huli ta orog iyan karaot. 18Dai nindo pag-agomon an tugang na babae kan saindong agom mantang nabubuhay pa ini.
19Dai nindo pagdorogan an sarong babaeng nareregla, huli ta siya maati. 20Dai nindo pagdorogan an agom kan ibang lalaki; makakapaati iyan saindo. 21Dai nindo ipagtao an arin man sa saindong mga aki tanganing tutongon para sa dios na si Molec, huli ta dadarahan nindo nin kasosopgan an ngaran kan saindong Dios, an Kagurangnan. 22Dai kamo makidorog sa kapwa nindo lalaki na iarog nindo siya sa sarong babae; anggot an Dios sa siring na karigsokan. 23Dai nin siisay man na lalaki o babae na makidorog sa sarong hayop; an siring na karigsokan makakapaati saindo.
24Dai kamo maggibo kan arin man sa mga karigsokan na ini na makakapaati saindo, huli ta an paggibo nin siring iyo an nakapaati sa mga nasyon na hahaleon ko sa atubang nindo. 25Nagin maati pati an daga huli kan saindang mga gibo, kaya pinadusahan ko an daga, asin isinuka sinda kaini. 26-27Ginibo ninda an mga karigsokan na ini na nakapaati kan daga, alagad dai nanggad nindo paggibohon iyan. Kamo gabos, Israelita man o dayuhan na nakikihimanwa saindo, kaipuhan na magkuyog kan mga togon asin pagboot nin Kagurangnan, 28tanganing dai kamo isuka kan daga, arog kan pagsukahan kaini kan mga naenot saindong nag-erok duman. 29Huli ta an siisay man na gumibo kan arin man sa mga karigsokan na iyan, dai na ibibilang na kaayon sa banwaan nin Dios.
30Kaya nagtaram an Kagurangnan, “Kuyogon nindo an mga ipinagboot ko saindo asin dai kamo mag-arog sa mga tawong naenot sa saindo na nag-erok sa daga. Dai kamo magpaati huli sa paggibo kan mga bagay na iyan. Ako an Kagurangnan na saindong Dios.”
Currently Selected:
Levitico 18: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
