Levitico 12
12
An Paglinig kan mga Babae na Bagong Mangaki
1Itinao nin Kagurangnan ki Moises an minasunod na pagsusundon 2para sa mga Israelita. Pakatapos na mangaki nin sarong lalaki an sarong babae, magigin maati siya sa laog nin pitong aldaw, siring na siya maati sa mga aldaw nin saiyang pagregla. 3Sa ikawalong aldaw, kaipuhan sirkomsisyonon an aki. 4Dangan mabilang siya nin treynta y tres pang aldaw bago siya magin malinig, huli ta inawasan siya nin dugo. Kaipuhan dai siya magdotdot kan arin man na bagay na banal; dai man siya dapat maglaog sa Tabernakulo sa mga aldaw na iyan sagkod na dai pa natatapos an saiyang paglinig.
5Pakatapos na an sarong babae mangaki nin sarong babae, magigin maati siya sa laog nin katorseng aldaw, siring na siya maati sa mga aldaw nin saiyang pagregla. Mabilang pa siya nin sesenta y seis na aldaw pakatapos kaiyan, bago siya magin malinig, huli ta inawasan siya nin dugo.
6Kun tapos na an panahon kan saiyang paglinig, magin iyan para sa saiyang aking lalaki o babae, madara siya sa padi duman sa pintoan kan Tabernakulo nin sarong karnero na sarong taon an edad para sa tinutong na atang, asin sarong salampati o agbaan para sa dolot para sa kasalan. 7Dadarahon kan padi sa Kagurangnan an saiyang dolot, asin gigibohon an seremonya sa paghale kan saiyang pagkanimaati dangan siya magigin malinig. Iyo ini an gigibohon nin sarong babae pakatapos niyang mangaki.
8Kun dai niya kayang magdolot nin sarong karnero, madara siya nin duwang salampati o duwang agbaan, an saro para sa tinutong na atang, asin an saro para sa dolot para sa kasalan; gigibohon kan padi an seremonya sa paghale kan saiyang pagkanimaati dangan siya magigin malinig.
Currently Selected:
Levitico 12: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
