Josue 3
3
Nagbalyo sa Salog nin Jordan an mga Israelita
1Sunod na aldaw, amay na nagbangon an mga Israelita. Naghale sinda sa Sittim asin nagpasiring sa Jordan. Nagkampo sinda digdi bago nagbalyo. 2Pakalihis nin tolong aldaw naglibot sa kampo an mga lider 3dangan nagsabi sa mga tawo, “Kun mahiling nindo an mga padi na dara an Kaban nin Tipan nin Kagurangnan na saindong Dios, tiriklopon na nindo an saindong mga tolda asin magsunod kamo sainda. 4Dai pa kamo nakadigdi kaidto, kaya sinda an matukdo saindo kan dalan. Alagad dai kamo magrani sa Kaban nin Tipan; magpahuri kamo nin mga sarong kilometro.”
5Sinabihan ni Josue an mga tawo, “Magrilinig kamo, huli ta sa aga magibo an Kagurangnan nin mga ngangalasan sa atubang nindo.” 6Dangan sinabihan niya an mga padi na pasanon an Kaban nin Tipan asin mag-enot sa mga tawo. Sinunod siya ninda.
7Nagtaram an Kagurangnan ki Josue, “Huli sa gigibohon ko ngunyan, an mga Israelita mapoon sa pagmidbid saimo bilang dakulang tawo, asin maaaraman ninda na kaibahan mo ako siring na inibahan ko si Moises kaidto. 8Sabihan mo an mga pading nagdadara kan Kaban nin Tipan na pag-abot ninda sa salog, maontok sinda sa tubig, harani sa pangpang.”
9Dangan sinabihan ni Josue an mga tawo, “Magdirigdi kamo asin dangoga nindo an itataram nin Kagurangnan na saindong Dios. 10Sa pagdangadang nindo, aalawon niya paluwas sa daga an mga Cananeo, Heteo, Heveo, Perezeo, Gergeseo, Amoreo asin Jebuseo. Saindong maaaraman na yaon sa tahaw nindo an buhay na Dios, 11kun nagbabalyo na sa Jordan sa enotan nindo an Kaban nin Tipan kan Kagurangnan kan bilog na daga. 12Kaya pumili kamo nin doseng lalaki, saro sa lambang tribu nin Israel. 13Sa oras na magtungtong na sa tubig an mga padi na nagdadara kan Kaban nin Tipan nin Kagurangnan kan bilog na daga, maontok sa pagbulos an Salog nin Jordan, asin matambak sa sarong lugar an tubig na nagbubulos paibaba.”
14-15Tig-anihan kaidto, asin baha an salog.
Kan maghale sa kampo an mga Israelita tanganing magbalyo sa Jordan, nagpaenotan sainda an mga padi na dara an Kaban nin Tipan. Pagtungtong kan mga padi sa salog, 16nag-ontok sa pagbulos an tubig asin nagtambak sa harayong lugar, duman sa Adam, an syudad na kataed kan Zaretan. Nag-ontok sa pagbulos paibaba an tubig na pasiring sa Gadan na Dagat, asin nakabalyo harani sa Jerico an mga tawo. 17Mantang naglalakaw sa mamarang daga an mga Israelita, dai naghale sa tahaw kan nagmarang salog an mga padi na nagpapasan kan Kaban nin Tipan sagkod na nakabalyo an gabos na tawo.
Currently Selected:
Josue 3: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
