Josue 23
23
An Pagpaaram ni Josue
1Pakalihis nin halawig na panahon, tinawan nin Kagurangnan nin katiwasayan an Israel laban sa mga kaiwal sa palibot ninda. Kan panahon na iyan, gurang nang marahay si Josue, 2kaya inapod niya an bilog na Israel, an kamagurangan, an mga lider, an mga hukom asin an mga opisyal kan banwaan. Tinaraman sinda ni Josue, “Gurang na akong marahay. 3Nahiling nindo an gabos na ginibo nin Kagurangnan na saindong Dios sa gabos na banwaan huli sa saindo. Siya an nakipaglaban para sa saindo. 4Itinao ko na saindo bilang pamana kan saindong mga tribu an mga dagang dai pa nasasakop, siring man an gabos na daga kan mga banwaan na nasakop ko na, magpoon sa Salog nin Jordan sa parteng sirangan sagkod sa Dagat nin Mediteraneo sa parteng solnopan. 5Papasibogon sinda nin Kagurangnan na saindong Dios asin papahaleon sa pagdangadang nindo. Mapapasaindo an daga ninda siring sa panuga saindo nin Kagurangnan na saindong Dios. 6Kaya kuyogon nanggad nindo asin gibohon an gabos na nasusurat sa libro nin Katogonan ni Moises. Dai nindo paglingawan an arin man kaiyan, 7asin dai nanggad kamo makiiba sa mga tawong ini na natatada pa diyan sa kaibahan nindo o kaya magsambit kan ngaran kan saindang mga dios-dios o magsumpa sa ngaran kan mga iyan o magsamba asin magluhod sa mga iyan. 8Magmaimbod kamo sa Kagurangnan, siring sa ginigibo nindo sagkod ngunyan. 9Sa pagdangadang nindo, inalaw nin Kagurangnan an darakula saka mapangyaring mga nasyon, asin mayo pa nin siisay man na nakadaog saindo. 10Maski siisay saindo pwedeng makapadulag nin sangribong tawo, huli ta an Kagurangnan iyo an nakikilaban para saindo, siring sa saiyang panuga. 11Kaya kamotan nanggad nindo an Kagurangnan na saindong Dios. 12Kun magtalikod kamo saiya asin makisumaro sa mga natatadang nasyon na iyan sa kaibahan nindo asin makipag-agoman sainda, 13saboton nanggad nindo na dai na papahaleon nin Kagurangnan na saindong Dios an mga nasyon na iyan sa pagdangadang nindo. Alagad sinda magigin sarong siod saka sarong kalot para saindo, sarong makosog na panghampak sa saindong likod, sagkod mga tonok sa saindong mga mata. Dangan magdadanay iyan sagkod na mayo nang matada saindo digdi sa marahay na dagang itinao saindo nin Kagurangnan na saindong Dios.
14“Madali na akong magadan. Nakakaaram sa saiyang puso asin kalag an lambang saro sa saindo, na itinao saindo nin Kagurangnan an gabos na marahay na bagay na saiyang ipinanuga. Inotob niya an lambang panuga; mayong nasudya minsan saro. 15Alagad siring na inotob niya an lambang panuga na ginibo niya saindo, gigibohon man niya an mga maraot na bagay na ipinatanid niya saindo. 16Kun dai kamo magkuyog kan tipan na ipinagboot nin Kagurangnan na saindong Dios na sunodon nindo, saka kun maglingkod kamo dangan magsamba sa ibang mga dios, malaad saindo an kaanggotan nin Kagurangnan asin tolos na magagadan kamo, sagkod na mayo nang matada saindo digdi sa marahay na dagang itinao niya saindo.”
Currently Selected:
Josue 23: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
