Jeremias 5
5
An Kasalan nin Jerusalem
1Mga taga Jerusalem, liboton nindo an saindong mga tinampo!
Pagmasdan nindo dangan aramon an nasa palibot.
Siyasaton nindo an mga plasa.
Igwa daw kamo nin nahiling na tawo
na naggigibo kan matanos asin naghihingowang magin maimbod sa Dios?
Kun igwa kamong mahiling, papatawadon nin Kagurangnan an Jerusalem.
2Maski nagsasabi kamo na sinasamba nindo an Kagurangnan,
iyan bakong tudok sa saindong puso.
3An kaimbodan iyo an hinahanap nin Kagurangnan.
Hinampak niya kamo, alagad dai nindo namatean an kulog kaiyan;
rinonot niya kamo, alagad dai nanggad kamo nakanood.
Nagin matagas an saindong mga payo,
asin habo nanggad nindong talikodan an saindong mga kasalan.
4Dangan nagsaboot ako, “Mga dukha sana sinda asin mayo nin pakasabot.
Naggigibo sinda nin kamangmangan
huli ta dai ninda naaaraman an kahagadan nin Kagurangnan,
an boot saindang ipagibo nin Kagurangnan.
5Maduman ako sa darakulang tawo,
saka makikipag-olay sainda.
Huli ta naaaraman ninda an kahagadan nin Kagurangnan,
an boot saindang ipagibo nin Kagurangnan.”
Alagad gabos man sinda nagsikwal kan kapangyarihan nin Kagurangnan
asin habo nindang magkuyog saiya.
6Kaya gagadanon sinda kan mga leon na hale sa kadlagan;
roronoton sinda kan mga lobo na hale sa desyerto,
saka maglilibot sa mga banwa ninda an mga leopardo.
Kun magluwas an mga tawong idto, roronoton sinda,
huli ta kadakul na kan saindang kasalan
asin kadakul nang beses na tinalikodan ninda an Dios.
7Naghapot an Kagurangnan, “Tadaw ta papatawadon ko an kasalan kan sakong banwaan?
Binayaan ninda ako
asin nagsamba sinda sa mga dios na bako man totoong dios.
Pinakakan ko an sakong banwaan sagkod na sinda nabasog,
alagad nakidorog sinda sa bako nindang agom
saka sinayang ninda an saindang panahon sa mga babaeng maraot.
8Garo sinda mga barasog saka makokosog na kabayo,
na lambang saro nagmamawot kan agom kan saiyang kataed.
9Bakong dapat na padusahan ko sinda huli kan mga bagay na ini?
Bakong dapat na baloson ko an nasyon na siring kaini?
10Susugoon ko an mga kaiwal
na raoton an mga ubasan kan sakong banwaan,
alagad na dai pagraoton an gabos.
Sasabihan ko sinda na putolon an mga sanga,
huli ta bako kong sadiri an mga sangang idto.
11Alagad pinasaluiban nanggad ako
kan mga taga Israel asin taga Juda.
Ako, an Kagurangnan, an nagtaram.”
Isinikwal nin Kagurangnan an Israel
12An Kagurangnan pinagnegaran kan saiyang banwaan. An sabi ninda, “Mayo siya nin gigibohon na ano man. Mayo nin karatan na maabot samo; dai kami magkakaigwa nin gera o gutom.” 13-14Nagtaram sinda na an mga propeta mayo nin halaga, saka mayo kan mensahe nin Kagurangnan. Nagtaram sako an Kagurangnan, an Dios nin mga hukbo, “Jeremias, huli ta an mga tawong ini nagtaram kan siring, magigin garo kalayo sa saimong ngoso an sakong mga tataramon. An mga tawong ini siring sa kahoy, na tututongon kan kalayo.”
15Banwaan nin Israel, ipapadara nin Kagurangnan an sarong nasyon hale sa harayo tanganing salakayon kamo. Saro iyan na makosog saka gurang nang nasyon na an lengwahe dai nindo aram. 16An saindang mga parapana maiisog na soldados asin mayong herak kun manggadan. 17Uuboson ninda an mga inani asin pagkakan nindo. Gagadanon ninda an saindong mga aki. Uuboson ninda an saindong mga karnero saka mga baka, dangan raraoton an saindong mga ubasan saka mga kahoy na higera. An mga pinapusog na syudad na sinasarigan nindo rurumpagon kan saindang mga soldados.
18An Kagurangnan nagsasabi, “Alagad dai ko nanggad pupuhoon an sakong banwaan maski sa panahon na iyan. 19Kun sinda maghapot saimo, Jeremias, kun tadaw ta ginibo ko an gabos na ini, sabihan mo sinda na siring na tinalikodan ninda ako dangan naglingkod sa mga dayuhan na mga dios sa sadiri nindang daga, maglilingkod man sinda sa mga dayuhan sa sarong daga na bako nindang sadiri.”
Pinatanidan nin Dios an Saiyang Banwaan
20Nagtataram an Kagurangnan, “Sabihan mo an mga kapagarakian ni Jacob, sabihi an mga taga Juda: 21Pagdangog kamo, lolong saka mangmang na mga tawo na igwang mga mata, alagad dai nakakahiling; na igwang mga talinga, alagad dai nakakadangog. 22Ako an Kagurangnan; tadaw ta dai kamo natatakot sako? Tadaw ta dai kamo tinatakigan sa atubangan ko? Ibinugtak ko an baybay bilang kasagkoran kan dagat, sarong kasagkoran na dai nanggad pwedeng balyohon. Maski mag-apwak digdi an dagat, o maghagubohob an mga alon, alagad dai sinda makakaibong. 23Alagad kamo, mga matagas an saindong mga payo saka mga rebelde kamo; tinalikodan nindo ako saka binayaan. 24Dai nanggad nindo inisip na omawon ako maski ngani ako an minapadara saindo nin uran sa tamang panahon saka minapaabot kan panahon nin pag-ani sa lambang taon. 25An saindong mga kasalan iyo an nag-olang tanganing dai nindo makamtan an mga marahay na bagay na ini.
26“Nag-eerok sa tahaw kan sakong banwaan an mga maraot na tawo; nanghihipa sinda arog kan mga tawong nagbibiklad nin hikot tanganing magdakop nin mga gamgam, alagad an litag na ibinugtak ninda pandakop nin tawo. 27Arog kan hawlang pinapano nin mga gamgam kan paraayam, an saindang mga harong pano nin mga sinamsaman. Kaya nagin mapangyari saka mayaman sinda, 28nagin mataba saka mabaskog. Mayo nin kataposan an gibo nindang katampalasanan. Dai ninda ginagalangan an deretso kan mga ilo, ni pinapahilingan nin hustisya an mga naaapi.
29“Alagad ako, an Kagurangnan, an mapadusa sainda huli kan mga bagay na ini; babaloson ko an siring na nasyon. 30Makangingirhat saka makatatakot an nangyari sa daga: 31an mga propeta mayo nin itinataram kundi kaputikan; an mga padi namamayo sosog sa pagboot kan mga propeta, asin inooyonan ini kan sakong banwaan. Alagad ano an saindang gigibohon kun mag-abot na an kataposan?”
Currently Selected:
Jeremias 5: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
