Isaias 59
59
Kinondenar kan Propeta an mga Kasalan kan Banwaan
1Dai kamo mag-isip na maluya an Kagurangnan kun kaya dai niya kamo pwedeng iligtas, o na maluya an saiyang pandangog kun kaya dai niya kamo madadangog kun kamo mag-agrangay! 2Dai niya kamo dinadangog huli kan saindong mga kasalan. An saindong mga kasalan an nagsisiblag saindo sa Dios. 3An saindong mga kamot nadigtaan nin dugo asin an saindong mga muro nadigtaan nin kadahasan; mga putikon kamo asin mga madaya.
4Minasangat kamo nin kaso, alagad bako man tama an saindong sumbong. An kaputikan iyo an saindong sinasarigan tanganing manggana kamo sa saindong kaso. Pinapadagos nindo an saindong mga plano nganing makulogan an iba. 5An pagplano nindo nin maraot garo pagpahimsa kan sugok nin halas o paghabol nin gubing hale sa lapat. Magagadan an magkakan kan sugok nin halas, asin sa napasang sugok, halas man an maluwas. 6An hinabol nindong gubing hale sa lapat dai man nindo ikakasulot. An saindong mga gibo magbubunga nin karibokan asin kapahamakan. 7Danay kamong nagpaplano nin maraot; naghihidali kamo sa paggibo kaiyan. Dai lamang kamo nagduduwa-duwa sa paggadan kan mga mayong sala. Kapahamakan saka pagkagaba an nawawalat saen man kamo magduman, 8asin bakong ligtas an siisay man sa lugar na saindong dinudumanan. An gabos nindong ginigibo mayong katanosan. Sarong tiko na dalan an saindong linalakawan asin bakong ligtas an siisay man na maglakaw sa dalan na iyan.
Ikinumpisal kan mga Tawo an saindang Kasalan
9Nagsabi an mga tawo, “Ngunyan aram mi na kun tadaw ta dai kami iliniligtas nin Dios sa mga nang-aapi samo. Naghahanap kami nin liwanag alagad kadikloman an samong nakukua. 10Nagkakapkap kami siring sa mga buta. Nagkakadarasmag kami maski odto, na garo iyan banggi, na garo yaon kami sa madiklom na kinaban kan mga gadan. 11Nag-uungal kami na garo oso; nag-aaguro kami na garo mga salampati. Hinahalat mi an Dios na iligtas kami sa pang-aapi asin sa karatan, alagad mayong nangyayari.
12“Kagurangnan, kadakul na karatan an nagibo mi laban saimo; nagsasaksi an samong kasalan laban samo. Aram mi iyan gabos. 13Tinumangan mi ika, isinikwal, asin dai sinunod. Inapi mi an iba asin tinalikodan mi ika. Mayong katotoohan an samong mga iniisip; gabos kaputikan an samong mga itinataram. 14Inaalaw an hustisya, asin dai nakakadolok an katanosan. An katotoohan napapadungkal sa plasa, asin dai nakakakua nin lugar duman an pagkaonesto. 15Kadikit na sana an katotoohan kaya an siisay man na minaontok sa paggibo nin karatan iyo an nagigin biktima nin krimen.”
An Kagurangnan Nag-aandam sa Pagligtas kan Saiyang Banwaan
Nahiling ini nin Kagurangnan, asin namondo siya huli ta mayo na nin hustisya. 16Nahiling niya na maski saro mayo nin minatabang sa naaapi. Kaya gagamiton niya an sadiri niyang kapangyarihan sa pagligtas sa mga naaapi asin tanganing manggana siya. 17Isusulot niya an hustisya siring sa sarong gubing na panggera asin an kapangganahan siring sa sarong helmet. Isusulot niya an gubing nin pagbalos tanganing tanoson an gabos na bagay asin tanganing baloson an mga karatan na tinitios kan mga tawo. 18Papadusahan niya an saiyang mga kaiwal sosog sa saindang ginibo, maski idtong mga nag-eerok sa harayong mga daga. 19Magpoon sa sirangan sagkod sa solnopan, an saiyang dakulang kapangyarihan, katatakotan kan gabos. Maabot siya siring sa sarong masulog na salog, arog sa sarong makosog na doros.
20An Kagurangnan nagsasabi sa saiyang banwaan, “Maabot ako sa Jerusalem sa pagsurog saindo asin sa pagligtas sa gabos na nagbabakle sa saindang kasalan. 21Makikipagtipan ako saindo: Itinao ko saindo an sakong kapangyarihan saka mga katukdoan tanganing magin sadiri nindo sagkod lamang. Magpoon ngunyan, susunodon nindo ako asin tutukdoan nindo an saindong kaakian saka kapagarakian na sunodon ako sagkod pa man.”
Currently Selected:
Isaias 59: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
