Isaias 57
57
Kinondenar an Pagsamba nin Israel sa mga Dios-dios
1Nagagadan an mga matanos na tawo, asin mayong nakakasabot o nagmamakulog. Alagad pagkagadan ninda mayo na nin kasakitan na makakadotdot sainda. 2Nakakakua nin katoninongan saka kapahingaloan sa kagadanan an mga namumuhay na matanos.
3Alagad madya digdi, kamo na mga parakasala! Dai kamong kalaenan sa mga parakulam, mga parasambay asin mga maraot na babae. 4Siisay an saindong pinag-oolog-olog? Kamong mga putikon, siisay an saindong pinagngingisihan? 5Sinasamba nindo an mga dios-dios huli sa pakikidorog sa tangod kan sagrado nindong mga kahoy. Idinodolot nindo an saindong mga aki bilang sakripisyo sa mga magapong lungib na harani sa mga sapa. 6Minakua kamo nin malinig na mga gapo dangan sinasamba nindo an mga iyan bilang mga dios. Minaula kamo nin arak bilang dolot sainda saka minadara man kamo sainda nin mga dolot na pagkakan. Sa paghona nindo, naoogma ako sa mga ginigibo nindong iyan? 7Minasakat kamo sa haralangkaw na bukid tanganing magdolot nin mga sakripisyo asin magdororogan. 8Minabugtak kamo nin makauuyam na mga dios-dios sa pakalaog kan saindong harong asin tinalikodan nindo ako. Hinuhuba nindo an saindong mga gubing dangan minahigda kamo sa darakula nindong mga higdaan kaiba an makakadorog nindo na saindong binabayadan; duman nindo ginigibo an saindong karigsokan. 9Minalahid kamo nin mga pahamot saka minaduman sa dios-dios na si Molek tanganing magsamba saiya. Minapadara kamo nin mga sugo sa mga harayong lugar sa paghanap nin mga dios-dios na masasamba; sagkod sa kinaban kan mga gadan, pinapaduman nindo sinda. 10Pinapagal nindo an saindong mga hawak sa paghanap nin ibang mga dios, alagad dai kamo nag-oontok. Naghohona kamong an makauuyam nindong mga dios-dios an nagtatao saindo nin kosog, kaya dai kamo pinanluluya.
11Nagsasabi an Kagurangnan, “Siisay an mga dios-dios na ini na natatakotan nindo, kaya nagibo nindong magputik sako asin malingawan ako? Dahelan daw an dai ko paggirong sa halawig na panahon kun kaya dai na nindo ako ginagalangan? 12Naghohona kamong tama an saindong ginigibo, alagad ihahayag ko an saindong mga gawe, asin dai kamo matatabangan kan saindong mga dios-dios. 13Pag-agrangay nindo, patabanga an saindong mga dios-dios! Ipapalid sinda sa sarong paghuyop nin doros! Alagad an mga nagsasarig sako iyo an mag-eerok sa daga asin sasambahon ninda ako sa sakong Templo.”
An Panuga nin Dios na Pagtabang asin Pagpaomay
14Nagsasabi an Kagurangnan, “Pabalika sako an sakong banwaan. Halea nindo an gabos na nakakaolang sa saindang agihan! Maggibo kamo asin mag-andam nin tinampo!
15“Ako an halangkaw asin banal na Dios, na nabubuhay sagkod lamang. Nag-eerok ako sa sarong halangkaw saka banal na lugar, alagad nag-eerok man ako sa kaibahan kan mga tawong mapakumbaba saka nagsosolsol, tanganing ibalik sa sainda an saindang pagsarig asin paglaom. 16Ako an nagtao nin buhay sa sakong banwaan; dai ko ipapadagos an pag-akusar sainda asin dai man ako maaanggot sainda sagkod lamang.#57:16 Ako an nagtao…sagkod lamang; o Dai ko ipapadagos an pag-akusar sainda, o magin anggot sainda sagkod lamang, huli ta kun mangyari iyan, magagadan sinda—an mismong banwaan na tinawan ko nin buhay. 17Naanggot ako sainda huli kan saindang kasalan saka kapasloan, kaya pinadusahan ko sinda asin pinabayaan. Alagad matagas an saindang payo asin nagpadagos sinda sa saindang gawe.
18“Nahiling ko an saindang gibo, alagad papaomayan ko sinda. Papangenotan ko sinda asin tatabangan; rarangahon ko an mga nagmomondo. 19Makikipagtoninong ako sa gabos, nasa harani man sinda o nasa harayo! Papaomayan ko an sakong banwaan. 20Alagad an mga maraot nakakaagid sa dagat na parating maalon, na dai nagkakalma, asin an saiyang tubig nagdadara nin laboy saka ati. 21Mayo nin kaligtasan para sa mga parakasala,” an sabi kan Kagurangnan.
Currently Selected:
Isaias 57: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
