Isaias 51
51
Mga Tataramon nin Pagranga sa Jerusalem
1Nagsasabi an Kagurangnan,
“Pagdangog kamo sako, kamo na boot na makaligtas,
kamo na minadolok sako tanganing magpatabang.
Isipa nindo an gapong saindong hinalean,
an lugar na pinagkuahan saindo.
2Isipa nindo an saindong ginikanan na si Abraham,
saka si Sara, na saindong hinalean.
Kan apodon ko si Abraham, mayo siya nin aki,
alagad kan bendisyonan ko siya,
nagdakul an saiyang aki saka mga kapagarakian.
3“Maheherakan ko an Jerusalem,
an gabos na nag-eerok sa mga raot na lugar kaiyan.
Maski saro nang desyerto an saiyang daga, gigibohon ko iyan na sarong tatamnan,
siring sa tatamnan na ibinugtak ko sa Eden.
Makukua diyan an kaogmahan saka an kagayagayahan,
an mga pasasalamat sako saka an mga awit nin pag-omaw.
4“Pagdangog kamo, sakong banwaan,
dangoga nindo an sakong sasabihon:
itinatao ko an sakong katukdoan sa mga nasyon;
maliliwanagan sinda huli kan sakong mga togon.
5Madatong tolos ako sa pagligtas sainda;
harani na an panahon nin sakong kapangganahan.
Ako mismo an masakop sa mga nasyon.
Hinahalat kan hararayong daga an sakong pagdatong;
may paglaom na naghahalat sinda sako nganing iligtas ko sinda.
6Tingkalagan an saindong mga mata sa kalangitan, asin hilinga nindo an daga!
An kalangitan mawawara siring sa aso;
an daga magigin siring sa daan na gubing;
an gabos na tawo diyan magagadan siring sa mga langaw.
Alagad an sakong kaligtasan magdadanay sagkod lamang;
an sakong pagligtas mayo nanggad nin kataposan.
7“Pagdangog kamo, kamo na nakakaaram kan katanosan,
kamo na an nasa puso iyo an sakong katogonan.
Dai kamo matakot kun pagtuya-tuyaon asin pag-olog-ologon kamo nin katawohan;
8mawawara sinda siring sa gubing na kinakan nin mga anay!
Alagad an sakong kaligtasan magdadanay sagkod lamang;
an sakong pagligtas para sa gabos na henerasyon.”
9Pagmata, Kagurangnan, asin kami saimong tabangan!
Gamita an saimong kapangyarihan asin kami ligtasan;
gamita iyan siring kan ginibo mo kaidtong panahon.
Ika an nagperedaso kan impakto sa dagat na si Rahab.#51:9 RAHAB: Sa leyenda, saro ining impakto sa dagat na iyo an tanda kan kapangyarihan nin kariribokan saka karatan, asin kun minsan sarong simbolo nin Egipto.
10Ika man an nagpamara kan dagat
dangan naggibo nin dalan sa katubigan,
nganing makabalyo idtong saimong iliniligtas.
11May kaogmahan na makakaabot sa Jerusalem an mga ilinigtas mo,
na nag-aawit saka nagkukurahaw sa kaogmahan.
Magigin maogma sinda sagkod lamang,
sagkod pa man ligtas sa dusa asin sa kamondoan.
12Nagsasabi an Kagurangnan,
“Ako, ako an nagraranga saindo.
Tadaw ta matatakot kamo sa kapwa nindo tawo,
na magagadan man siring sa mga doot?
13Nalingawan na nindo an Kagurangnan na naggibo saindo,
na nag-unat kan kalangitan asin nagpamugtak kan pundasyon kan kinaban?
Tadaw ta mamumuhay kamong danay na takot
sa kaanggotan kan mga nag-aapi saindo,
kan mga andam sa pagraot saindo?
Dai na makakaduta saindo an saindang kaanggotan.
14Madali nang talingkasan an mga bilanggo;
mabubuhay sinda sa halawig na panahon
asin dai magkukulang an saindang pagkakan.
15“Ako an Kagurangnan na saindong Dios,
na nagbubukag kan dagat
asin nagpapahagubohob kan mga alon.
Kagurangnan nin mga hukbo an sakong ngaran!
16Ako an nag-unat kan kalangitan
asin an nagbugtak kan pundasyon kan kinaban;
sinasabihan ko an Jerusalem, ‘Ika an sakong banwaan!
Tinawan taka kan sakong katukdoan,
asin kamot ko an nag-iingat sa saimo.’”
An Kataposan kan Pagtios nin Jerusalem
17Pagmata, O Jerusalem!
Pagmata asin pagbangon!
Ininom mo an kalis nin padusa na ipinainom saimo nin Kagurangnan sa saiyang kaanggotan;
inubos mo iyan, dangan ika nagsasayasay.
18Mayo na nin mangengenot saimo,
mayo sa saimong mga namamanwaan
na makabit kan saimong kamot.
19Duwang bagay an nag-abot saimo:
naraot an saimong daga huli kan gera
asin nagutom an saimong namamanwaan.
Mayo nin saro man na madamay saimo.
20Sa lambang kanto kan tinampo
an mga aki mo nagkakapurukan sa kaluyahan;
garo sinda mga usa na nagkadarakop sa litag kan paraayam.
Namatean ninda an kosog kan kaanggotan nin Dios.
21Kamo na nagtitios sa Jerusalem,
kamo na nagsasayasay na garo kamo mga burat,
22sinusurog kamo nin Kagurangnan na saindong Dios asin nagsasabi,
“Uya, hinahale ko na sa saindong kamot
an kalis nin sakong kaanggotan.
Dai na kamo kaipuhan na mag-inom
kan arak na sa saindo nakakapasayasay.
23Itatao ko iyan sa mga tawong nag-api saindo,
sa mga nagpahigda saindo sa tinampo
asin nagtimaktimak saindo na garo ati kamo.”
Currently Selected:
Isaias 51: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
