Parahulit 7
7
Mga Kaisipan dapit sa Buhay
1An marahay na ngaran mas marahay ki sa mamahalon na olor;
an aldaw nin kagadanan, mas marahay ki sa aldaw nin pagkamundag.
2Mas marahay an magduman sa harong na igwa nin pagmondo ki sa harong na igwa nin bangkete,
huli ta an nabubuhay dapat na magromdom
na naghahalat sato gabos an kagadanan.
3An kamondoan mas marahay ki sa kaogmahan,
huli ta maski nakakapamondo iyan nin lalawogon, nakakatao iyan nin pakasabot.
4An tawong danay na nag-iisip dapit sa kaogmahan sarong lolong;
an madonong na tawo nag-iisip dapit sa kagadanan.
5Mas marahay para sa sarong tawo na sagweon siya nin sarong madonong
ki sa omawon siya nin mga lolong.
6An pagngisi kan mga lolong garo
linagatik kan tonok na isinugba sa kalayo. Ini mayo man nin halaga.
7Kun an sarong madonong nang-aapi sa iba, siya minagibo kan sa lolong.
Kun an sarong tawo mag-ako nin suhol nagigin marompot an saiyang isip.
8An kataposan kan sarong bagay orog na marahay ki sa kapinonan kaiyan.
An pagkamatinios mas marahay ki sa kapaabaw-abawan.
9Hare pag-anggot tolos-tolos,
huli ta sa lolong an pagrimpos nin maraot na boot.
10Hare paghapot, “Tadaw ta mas marahay an mga nakaaging aldaw ki sa mga aldaw na ini?”
Huli ta bakong sa madonong an hapot na iyan.
11An gabos na tawong nabubuhay dapat magin madonong;
marahay iyan siring sa pag-ako nin kahirasan.
12Magtatao iyan saimo nin katiwasayan, siring sa itinatao nin kwarta.
Iingatan ka kan kadonongan—iyo ini an karahayan kan pakaaram.
13Horophoropa an gibo nin Dios;
siisay an makakatanos kan tiniko nin Dios?
14Mag-ogma ka sa mga aldaw nin kauswagan, asin sa mga aldaw nin kasakitan, giromdoma na an Dios nagpapadara nin kaogmahan siring na nagpapadara siya nin kasakitan. Dai mo nanggad maaraman kun ano an sunod na maabot saimo.
15Sa sakong mayong halagang buhay nahiling ko an gabos na bagay. An sarong matanos na tawo pwedeng magadan mantang an saro padagos na nabubuhay, maski siya sarong maraot na tawo. 16Kaya dai ka magpakamatanos o magpakamadonong nin sobra; tano ta gagadanon mo an saimong sadiri? 17Alagad dai ka man magpakatampalasan o magpakalolong nin sobra; tano ta magpapagadan ka sa bako pa tamang panahon? 18Likayan mo an duwang kasobrahan na ini. Kun may pagkatakot ka sa Dios, magigin mauswag ka.
19An kadonongan nagtatao nin kosog sa sarong tawo orog pa ki sa magigibo nin sampolong pamayo para sa sarong syudad.
20Sa kinaban, mayo nanggad nin sarong matanos na tawo na danay na naggigibo nin karahayan sa gabos na panahon asin dai nanggad nagkakasala.
21Hare pagdangog sa gabos na sinasabi kan mga tawo, ta tibaad madangog mong minamaldisyon ka kan saimong sorogoon; 22aram mong dakul na beses mo man na minaldisyon an ibang tawo.
23An gabos na ini binalo ko kan sakong kadonongan. Nagsabi ako, “Magigin madonong ako;” alagad dai ko iyan nakamtan. 24Siisay an makakaladop kan kahulogan nin buhay? Hararom iyan nin marahay, asin dipisil masabotan. 25Idinusay ko an sakong buhay sa pagsabot saka sa pagsiyasat, sa paghanap nin kadonongan saka nin kasimbagan sa sakong mga hapot, asin sa pagsabot kun gurano karaot asin kalolong an kamangmangan.
26Nakua ko na orog na mapait ki sa kagadanan an babae, na an saiyang pagkamoot arog sa sarong siod asin sa sarong hikot; dangan an saiyang mga kamot na pangkugos arog sa mga kadena. An lalaki na nakakapawili sa Dios makakadulag saiya; alagad an parakasala madadakop niya. 27Ini an dikit-dikit kong naaraman, mantang hinahanap ko an mga kasimbagan, an sabi kan Parahulit. 28Naghingowa akong makakua nin ibang kasimbagan, alagad mayo akong nakua. Sa sangribong lalaki, saro sana an nakua kong maninigong galangan; alagad mayo maski sarong babae. 29Ini sana an sakong nanodan: an tawo linalang na matanos nin Dios, alagad naghanap siya nin dakul na kapurisawan sa buhay.
Currently Selected:
Parahulit 7: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
