Parahulit 10
10
1An gadan na mga langaw nakakapabata sa sarong botelyang pahamot, asin an kadikit na kalolongan pwedeng makaraot sa kadonongan asin onra.
2Natural para sa sarong madonong an paggibo nin tama, asin para sa sarong lolong an paggibo nin sala. 3An saiyang kalolongan mahahayag maski sa mga dayuhan na saiyang nasasabat sa dalan; ipinapaaram niya sa gabos na siya sarong lolong.
4Kun maanggotan ka kan pamayo, dai ka maghale sa saimong katongdan; huli ta an dakulang mga kasalan pwedeng patawadon kun dai ka sana maggirong.
5Nakahiling ako nin sarong karatan—karatan nin sarong namamayo. 6Mga lolong na tawo an tinatawan nin halangkaw na katongdan, mantang an mga mayayaman tinatawan nin harababang katongdan. 7Nakahiling ako nin mga oripon na nangangabayo mantang an mga kagurangnan naglalakaw na garo mga oripon.
8Kun magkalot ka nin bubon, mahuhulog ka diyan; kun maglusot ka sa sarong kudal, pwedeng makagat ka nin halas. 9Kun magtabas ka nin gapo, malulugadan ka kan mga gapo. Kun magtiak ka nin kahoy, makukulogan ka sa paggibo kaiyan. 10Kun bakong matarom an saimong patok asin dai mo iyan taison, kaipuhan dugangan mo an saimong kosog kun ginagamit iyan. An kadonongan nakakatabang sa pag-uswag. 11Mayong halaga an pakaaram mong magdakop nin halas, kun pabayaan mong kagaton ka ngona kaiyan. 12An tataramon nin sarong madonong na tawo nagdadara saiya nin kaomawan; alagad an lolong nararaot kan sadiri niyang mga tataramon. 13An lolong minapoon sa pagtaram nin kalolongan asin natatapos sa karungawan. 14An lolong taram sanang taram.
Mayong nakakaaram kun ano an sunod na mangyayari, asin mayong makakataram kun ano an mangyayari sato pakatapos na kita magadan.
15An lolong sana an dai nakakakua kan dalan pasiring sa saiyang harong, kaya pinapagal niya an sadiri sa pagtrabaho.
16Herak man sa sarong nasyon kun an naghahade diyan sarong hoben, asin an mga lider diyan nagpapaaga sa pagbangkete! 17Alagad paladan an sarong nasyon kun an naghahade diyan sarong tawong igwa nin sadiring kaisipan, asin an mga lider nagbabangkete sa tamang panahon, tanganing magkosog asin bakong tanganing magburat.
18Kun an tawo hugakon na maghirahay kan saiyang atop, matagdo iyan dangan magagaba an harong.
19An tinapay nakakapaogma, asin an arak nakakapagian sa buhay; alagad dai iyan makakamtan kun mayo nin kwarta.
20Dai mo pagmaldisyonon an hade, maski sa isip sana, asin dai mo pagmaldisyonon an mayaman maski sa laog kan saimong kwarto. Huli ta may pakpak an bareta asin may talinga an daga.
Currently Selected:
Parahulit 10: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
