Deuteronomio 32

1“Dangoga, O langit, an sakong tataramon.

Hinanyoga, O daga, an sakong sasabihon.

2Maghulog logod siring sa uran an sakong katukdoan,

siring sa ambon sa ibabaw nin daga,

siring sa tagiti sa mga doot saka mga tinanom.

3Oomawon ko an ngaran nin Kagurangnan,

asin an saiyang banwaan magpapahayag kan saiyang kadakulaan.

4“An Kagurangnan an saindong paraligtas,

sa gabos niyang gibo, matanos asin mayong kakulangan.

Dios na maimbod asin mayong karatan;

matanos siya asin banal.

5Alagad masombikal kamo, bakong maninigong apodon na saiyang banwaan,

sarong kapagarakian na madaya saka makasalan.

6Arog kaini an pagbalos nindo sa Kagurangnan,

kamo na sarong lolong asin mayong isip na banwaan?

Siya an saindong ama, saindong Kaglalang,

an nagpatindog saindo bilang sarong banwaan.

7“Giromdoma an nakaaging mga aldaw, an mga taon nin kadakul na henerasyon.

Hapota an saindong mga ama dapit sa mga nangyari,

an kamagurangan kun ano an nakaagi.

8An Kahorohalangkawe an nagtao sa mga nasyon kan saindang daga.

Kan siriblagon niya an mga banwaan,

asin bugtakan nin kasagkoran an mga daga, linaen na niya an mga aki ni Israel.

9Huli ta an kapagarakian ni Jacob saiyang pinili

na magin saiyang sadiring kahirasan.

10“Nakua niya sindang naglalagalag sa desyerto,

sarong mapungaw saka madoros na kalangtadan.

Ilinigtas niya sinda asin inataman,

namotan asin pinadangat nin marahay.

11Ilinigtas nin Kagurangnan an Israel.

Siring sa agila, na sa pagtukdo na makalayog an saiyang siwo,#32:11 na sa pagtukdo na makalayog an saiyang siwo; o na sa pagbantay kan saiyang siwo.

sinasalo niya sinda sa nakaunat niyang pakpak, tanganing dai mahulog.

12An Kagurangnan sana an nangenot sa saiyang banwaan;

mga dayuhan na dios-dios dai sinda tinabangan.

13“Pinapaghade niya sinda sa kabubuldan,

kinakan ninda an mga bunga kan kaomahan.

Nakakua sinda nin dugos sa kagapoan;

sa magapong daga, saindang mga oliba nagkaburuhay.

14Dakul na gatas itinao kan saindang mga baka asin kanding;

napasainda an mga pinakamatabang karnero, baka saka kanding,

an pinakamarahay na trigo, sagkod an pinakapiling arak.

15“Nagyaman an banwaan nin Kagurangnan, alagad nagsombikal;

sinda na nagtaba asin nabasog.

Tinalikodan ninda an Dios na saindang Kaglalang,

nginisihan an Gapo nin saindang kaligtasan.

16Pinapag-imon ninda an Kagurangnan kan saindang pagsamba sa mga dios-dios;

pinaanggot siya ninda kan saindang marigsok na mga gibo.

17Sa mga dios-dios sinda nag-atang;

mga bagong dios na dai midbid kan saindang ginikanan,

asin dai lamang natakotan.

18Nalingawan ninda an Gapo nin saindang kaligtasan,

an Dios na nagtao sainda nin buhay.

19“Nahiling ini nin Kagurangnan asin naanggot siya;

an saiyang mga aking lalaki saka babae tinalikodan niya.

20‘Dai ko na sinda tatabangan,’ siya nagtaram;

‘hihilingon ko an saindang aabotan,

sinda na bakong maimbod saka makasalan na henerasyon.

21Pinaimon ninda ako kan saindang mga dios-dios,

pinaanggot kan inaapod nindang mga dios-dios.

Kaya papaimonon ko sinda asin papaanggoton,

huli sa sarong lolong na nasyon.

22Siring sa kalayo, malaad an kaanggotan ko,

na matutong kan gabos na yaon sa daga,

sagkod sa kairaroman kan Sheol;#32:22 SHEOL: Hilingon sa Glosaryo.

matutong minsan kan mga gamot nin kabukidan.

23“‘Tatambakan ko sinda nin kasakitan;

gagamitan ko sinda kan sakong mga pana.

24Magagadan sinda sa gutom saka kalentura,

asin sa makatakot na mga helang.

Isusubol ko sa pagsalakay sainda

an mga maringis na hayop, asin an mga makamandag na halas na makagat sainda.

25An gera manggagadan sa mga tinampo.

An takot mahampak sa mga harong.

Mga hoben na lalaki saka babae magagadan,

sagkod an omboy na pasusuhon asin an ubanon na gurang.

26Gabos kuta sinda sakong gagadanon

tanganing sa sainda mayo nang makagiromdom.

27Alagad dai ko matutugotan na magpaabaw-abaw an saindang mga kaiwal

sa pagsabing sinda an guminadan sa sakong banwaan,

mantang ako an kaggibo kaiyan.’

28“An Israel sarong mayong isip na banwaan;

dai nin ano man na kadonongan.

29Kun sinda madonong, masasabotan ninda

kun tano ta sinda nadaog.

30Kun tano ta an sangribo nadaog nin saro;

an sampolong ribo, nadaog nin duwa.

Pinabayaan sinda nin Kagurangnan na saindang Dios;

isinikwal kan saindang mapangyaring Dios.

31Naaaraman kan saindang mga kaiwal na maluya an saindang mga dios,

bakong arog kakosog kan Dios nin Israel.

32An saindang mga kaiwal marompot siring sa Sodoma asin Gomorra,

siring sa balagon na namumunga nin ubas na mapait asin marara;

33siring sa arak na ginibo hale sa kamandag nin mga halas.

34“Dai linilingawan nin Kagurangnan an ginibo kan saindang mga kaiwal;

naghahalat siya kan tamang oras tanganing sinda padusahan.

35An Kagurangnan an mabalos asin mapadusa sainda;

maabot an panahon nin saindang pagkapadungkal;

harani na an panahon nin saindang pagkagadan.

36Ililigtas nin Kagurangnan an saiyang banwaan,

kun mahiling niyang mayo na sindang kapangyarihan.

Maheherakan niya idtong mga naglilingkod saiya,

kun mahiling niyang kadikit na sana sinda.

37Dangan hahapoton nin Kagurangnan an saiyang banwaan,

‘Haen na an saindong mga dios-dios na saindong sinarigan?

38Pinakakan nindo sinda kan taba kan saindong mga atang,

pinainom nindo sinda kan dolot na arak.

Padigdiha sinda tanganing tabangan kamo;

padoloka sinda sa pagligtas saindo.

39“‘Ako, asin ako sana, an Dios; mayo na nin ibang totoong dios.

Nakakagadan ako saka nakakabuhay; nakakalugad saka nakakapaomay,

asin mayong makakaolang sa gigibohon ko.

40Siring na ako an buhay na Dios,

iniitaas ko an sakong kamot sa kalangitan asin ako minasumpa

41na tataison ko an sakong nagkikinang na espada

tanganing gamiton para sa katanosan.

Babaloson ko an sakong mga kaiwal,

asin papadusahan idtong mga naoongis sako.

42Ipapainom ko sa sakong pana an saindang dugo.

Kakakanon kan sakong espada an laman kan gabos na minasuhay sako.

Mayo akong itatada sa mga minalaban sako;

magagadan maski an mga nalugadan asin an mga bilanggo.’

43“Mga nasyon, mag-omaw kamo sa banwaan nin Kagurangnan,

huli ta pinapadusahan nin Kagurangnan an minagadan sainda;

binabalos niya an saiyang mga kaiwal

asin pinapatawad an kasalan kan saiyang banwaan.”

44Inawit ni Moises asin ni Josue na aking lalaki ni Nun an awit na ini sa pandangog kan banwaan nin Israel.

Mga Huring Katukdoan ni Moises

45Pakatapos na ipahayag ni Moises sa mga Israelita an mga katukdoan nin Kagurangnan, 46nagsabi siya sainda, “Kuyogon nindo ining mga pagboot na itinatao ko saindo ngunyan na aldaw. Itukdo nindo ini sa saindong mga aki tanganing maotob ninda an gabos na katukdoan nin Dios. 47Mahalaga an mga katukdoan na ini; iyo ini an saindong buhay. Kuyogon nindo ini asin mahalawig an saindong buhay duman sa daga na nasa ibong kan Jordan, sa daga na saindong sasadirihon.”

48Kan aldaw na iyan, tinaraman nin Kagurangnan si Moises, 49“Magduman ka sa kabukidan nin Abarim, sa daga nin Moab na kahampang kan syudad nin Jerico. Magtukad ka sa Bukid nin Nebo dangan tanawon mo an daga nin Canaan na itatao ko sa banwaan nin Israel. 50Magagadan ka sa bukid na idto, siring na an tugang mong si Aaron nagadan sa Bukid nin Hor, 51huli ta dai kamo nagin maimbod sako sa atubang kan banwaan nin Israel. Dai kamo nagtubod sako asin dai nindo ako ginalangan sa atubang ninda, kan yaon kamo duman sa katubigan nin Meriba, harani sa banwa nin Kades sa desyerto nin Zin. 52Matatanaw mo an daga sa harayo, alagad dai ka makakalaog sa dagang itatao ko sa banwaan nin Israel.”

Currently Selected:

Deuteronomio 32: MBBBIK92

Highlight

Copy

Compare