Deuteronomio 29
29
An Pakipagtipan nin Kagurangnan sa Israel sa Daga nin Moab
1Iyo ini an mga tataramon kan tipan na ipinagboot nin Kagurangnan ki Moises na gibohon sa mga Israelita sa daga nin Moab; kadagdagan an mga ini sa tipan na ginibo nin Kagurangnan sainda duman sa Bukid nin Sinai.
2Inapod ni Moises an bilog na banwaan nin Israel asin sinabihan, “Nahiling nindo an gabos na ginibo nin Kagurangnan sa hade, sa saiyang mga opisyal asin sa bilog na daga nin Egipto. 3Nahiling nindo an mga makatakot na peste, an mga tanda saka mga ngangalasan na ginibo niya; 4alagad sagkod ngunyan na aldaw, dai pa niya ipinapasabot saindo an saindong naeksperyensyahan. 5Pinangenotan ko kamo sa desyerto sa laog nin kwarentang taon; dai nagdaan an saindong mga gubing asin dai napudpod an saindong mga sandalyas. 6Mayo kamong tinapay na makakakan asin arak na maiinom, alagad tinawan kamo kaiyan nin Kagurangnan tanganing maaraman nindo na siya an saindong Dios. 7Kan makaabot kita sa lugar na ini, sinalakay kita ni Sihon na hade kan Hesbon asin ni Og na hade kan Basan, alagad dinaog ta sinda; 8kinua ta an saindang daga asin satong itinao bilang pamana ki Ruben, ki Gad, sagkod sa kabanga kan tribu ni Manases. 9Kaya kuyogon nindo an gabos na tataramon kan tipan na ini, tanganing mag-uswag kamo sa gabos nindong gibo.
10“Nagtitindog kamo ngunyan sa atubang nin Kagurangnan na saindong Dios, kamo gabos—an saindong mga lider saka mga opisyal, mga kalalakihan, 11kababaehan, kaakian, sagkod an mga dayuhan na nakikihimanwa saindo, na nagpuputol nin kahoy asin nagsasakdo para saindo. 12Uya kamo gabos ngunyan tanganing makipagtipan sa Kagurangnan na saindong Dios, asin mag-ako kan saindong katongdan 13tanganing midbidon kamo nin Kagurangnan bilang saiyang sadiring banwaan, asin siya an saindong magin Dios, siring sa ipinanuga niya saindo saka sa saindong mga ginikanan na si Abraham, si Isaac, asin si Jacob. 14Nakikipagtipan an Kagurangnan bako sana sa saindo na yaon digdi. 15Nakikipagtipan siya sa lambang saro sato na uya digdi sagkod sa satong mga kapagarakian na dai pa namumundag.
16“Aram nindo kun ano an nagin buhay nyato sa Egipto, asin kun paano kita naglakaw sa teritoryo kan ibang nasyon. 17Nahiling nindo an saindang makauuyam na mga gibo, an saindang mga dios-dios na gibo sa kahoy, gapo, plata asin bulawan. 18Maglikay kamo ta tibaad igwa saindo digdi ngunyan nin lalaki o babae, pamilya o tribu na matalikod sa Kagurangnan na satong Dios, tanganing maglingkod sa mga dios-dios kan ibang nasyon. Nakakaagid ini sa sarong kahoy na nagin mapait asin nakakahudong an bunga. 19Aramon nanggad nindo na mayo nin siisay man digdi na pakatapos na madangog an mga tataramon kan tipan na ini, magsaboot na makakaligtas siya maski maglakaw siya sa katagasan kan saiyang puso. An tawong iyan an magigin dahelan kan pagkagadan nin gabos, marahay man o maraot. 20An siring na tawo dai nanggad papatawadon nin Kagurangnan; maglalaad laban sa saiya an bilog na kaanggotan saka pagkamaimon nin Kagurangnan, asin mapapasaiya an gabos na maldisyon na nasusurat sa librong ini, sagkod na mapara an saiyang ngaran sa ibabaw nin daga. 21Isisiblag siya nin Kagurangnan hale sa komunidad nin Israel tanganing ipanamit saiya an gabos na maldisyon kan tipan na nasusurat sa librong ini nin mga katukdoan.
22“Sa maabot na mga henerasyon, an saindong mga kapagarakian sagkod an mga dayuhan na gikan sa mga harayong lugar makakahiling kan mga kasakitan saka mga kahelangan na ipinadara nin Kagurangnan sa saindong daga. 23Magigin alang asin tutong an kaomahan na natatambonan nin asupre saka asin; dai iyan tatanoman asin dai tataluboan nin ano man maski kan doot. An saindong daga magigin siring sa mga syudad nin Sodoma saka Gomorra, nin Adma asin Zeboiim, na tinunaw nin Kagurangnan kan siya maanggot nin marahay. 24Dangan mahapot an bilog na kinaban, ‘Tano ta ginibo ini nin Kagurangnan sa saindang daga? Ano an dahelan kan saiyang dakulang kaanggotan?’ 25Ini an magigin simbag, ‘Huli ta nagtalikod sinda sa tipan na ginibo ninda sa Kagurangnan na Dios kan saindang mga ginikanan, kan iluwas niya sinda hale sa daga nin Egipto. 26Naglingkod asin nagsamba sinda sa mga dios-dios na dai pa ninda sinamba kaidto, mga dios-dios na ipinangalad nin Kagurangnan na sambahon ninda. 27Kaya naanggot an Kagurangnan asin ipinadara sa dagang iyan an gabos na maldisyon na nasusurat sa librong ini. 28Sa dakulang kaanggotan nin Kagurangnan ginabot niya sinda sa saindang daga asin itinapok sa sarong dayuhan na daga na pinag-eerokan ninda ngunyan.’
29“May mga bagay na pinagmarahay nin Kagurangnan na satong Dios na magin hilom, alagad ipinahayag niya an saiyang Togon tanganing kuyogon nyato asin kan satong mga kapagarakian sagkod lamang.
Currently Selected:
Deuteronomio 29: MBBBIK92
Highlight
Copy
Compare
Share
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
