Etûm ágbán~í jisos, echî 8

1É gyébhe Sol nji á yúi nná Stibhen.

Ekpatə́m achot á kí təm ane mba á kíi ḿbə́ŋé na Jisos

É róghé ka ofú mbi á yúi áno Stibhen, ane echəme atóbhá Jisos ka Jerusarem á róghe ekpatə́m oseŋe eyéném, á róghe ábho ekpatə́m onyʉk ekarám. Á bhâ nyáne ka ngûm ka ngûm təm ágbán í Jisos nâ á kə́re ka Jerusarem. Mba ngá á jak ngûm i Judiya na Samariya. 2Etʉ̂ ane mba á rî tə́mé-tə́mé ka nchot Obhasi nnyí á jî kô Stibhen á kə̂n. Ekʉ̂ ejê nji á yími é rə̂m kpe-eji.

3Kən Sol se yê á tana echəme atóbhá Jisos otáné. A róghe ejeném a gyék ka ojû ka ojû, a tʉk ane mba á kíi ḿbə́ŋé na Jisos, ane-akáé na ane-arûm, a kaghá ka ókúmí.#Etûm 22.4-5; 26.9-11.

Etûm í Firip ka Samariya

4Ane echəme atóbhá Jisos á bée á nyáne ka ngûm ka ngûm, á chə́bhe á səra ane achot Obhasi mbá-mbá á jíi. 5Yót a kamá se Firip a jiî ka eték etat ka ebhat í Samariya. Ágo nâ yê a jî jóe a sə́rá ane nchot i Krayis, nne nnyo Obhasi a túmi se a yim ngun á sém. 6Nji ane á chə́me á yûk nji yê á chorá, á yên fə́ne iyîm okpógha-biji mbi á yimá, á kî mân echî ka nchot eye. 7A yîm abhə́né na ane mba emaŋé é yim ábho á bhəne á jên. A yîm fə́ne ojê ó mághe ane na ekûk. 8Ka obhô mbí, ekpatə́m ogyebhá-ḿbə́ŋé ó bhak ka eték njí.

9Nne yót a kamá se Simun a ri ka eték áji. A jóe nne-ajom ka nyâ na nyâ. Ekpak iyîm mbi á yimá, í kpôk ane biji kpe-eji. 10Á səra se yê a chíŋi obhô. Ejûm njí é yîm ane kpe á rî akpák kpe á rî ane-ntí, á chə́bhe fə́ne á kebha yê sê a chîŋ ochíŋ. Á sə́ra sê, “Nne nnyó a ri ikom Obhasi áfi mfi á bhíŋa áno sê Ndûm Ikom!” 11Simun nnyó a yîm iyîm mbí mfín a râp, ane á chəbhe á yugha nchot eye. 12Kən nji ane á kpó kam na otîp ogyebhá-ḿbə́ŋé otúi Obhasi na Jisos Krayis mbi Firip á tibha, á fûk ábho ayép, ane-akáé na ane-arûm. 13Kpe Simun fə́ne a yûŋ ḿbə́ŋé a kî, á fûk yê ayép. Nji á kpô fúk yê ayép, a kə̂t yák-yák na Firip. Biji í kpô yê kpe-eji na ntûm okpógha-biji na biriŋ mbi Firip á yimá.

14Ágbán í Jisos á kpó yuk ka Jerusarem sê ane Samariya á kam na otîp Obhasi, á tûm Pita na Jon ágo mbâ ábho. 15Nji mba Pita á síi ágo, á góre biji á káre Obhasi sê a túm Obhasi Ebhare Ntʉgantʉ mbâ ane mba á kíi ḿbə́ŋé na Jisos. 16Kpe noŋ á káme áno, á nyə́ne á ká fon Obhasi Ebhare Ntʉgantʉ. Á fúghi ábho ayép a ri ka mbiŋ i Ńtâ Jisos ńnyə́ne-nnyənê. 17Nji Pita na Jon á kpó kuní ábho obhô ka echî, Obhasi Ebhare Ntʉgantʉ a bhák ábho ka biji.

18Kən nji Simun a yéne se nji mba Pita á kuní ane obhô ka echî, á kí fon Obhasi Ebhare Ntʉgantʉ, a kô ntí a káre ábho a sə́re ábho se, 19“Karê ên ə̂m ikom mfí eróŋ, ń kəmé nne obhô ka echî, a fôn Obhasi Ebhare Ntʉgantʉ.”

20Kən Pita se, “Deê we na ntí imâ ámi ó kpó ó tán, ka ó kera áno se kə́n o nâm ekəp Obhasi na ntí. 21Məŋê se ó ka fon kpe obhô, kpe nkiri, ka etûm ejə́ré, ka ḿbə́ŋé eya cháŋ ka nnyen-i-mbá ka ochî Obhasi. 22Ó məŋé ejûm, fon nsôn maghê íkíkéré ibhí áfi, gorê Ńtâ Obhasi, ebhú tat tîk a rî nsôn a sû obhí obhâ mbí. 23Echî aŋ? Ń yen bəre onyaghá-ḿbə́ŋé ó faŋ wâ ó chiŋ. Ó gbo osʉ́ŋ ó kare obhí.”

24Biji í mân Simun kpe-eji a sə́re Pita na atem abhê se, “Ítəbhé, gorê ên Ńtâ Obhasi ka obhô obhámé, iyîm mbi o chorê ên nná, kpe jə́t é kâ fâp na mme.”

25Pita na Jon á kâ, á kpik ane achot í Ńtâ Obhasi á sə́re iyîm chénchén mbi a yimî mbâ ábho. Á chə́bhe mân njəm nnyi Jerusarem. Nji á jâk ka mbá, á kpik ane otîp ogyebhá-ḿbə́ŋé ka nték i Samariya etî-etî.

Firip na mbə́na-ékpô yót nnyo a dʉ Etiyopiya

26Énjel Ńtâ Obhasi a sə́re Firip se, “Tʉrî biji choŋ óséré ka mbá etə́m nnyi a dʉ áno nnyi Jerusarem a kí ji nnyi Gasa.” 27-28Firip a tʉ́ri fə́ne biji, a yə̂p a kí ji. Ka ebhú njí fə́ne, mbə́na-ékpô nne Etiyopiya yót a dʉ Jerusarem, a kí kʉri. Nne nnyó nâ á fîk achot í ntí chénchén ka ókʉ́rí nne-nkáé nnyo a ri ntûfâm Etiyopiya, á bhíŋa sê Kandas. A bháe Jerusarem a bhá jighi Obhasi. Kən ebhú a kí kʉri a gyê ka okpi-nsi obhê mbi ofoŋ anyanyâ ó tʉ̂k. A kun áfo, a bhiŋá achot Obhasi mma nkara-otîp Obhasi nnyo á kamá se Asaya a séŋe. 29Obhasi Ebhare Ntʉgantʉ a sə́re Firip se, “Choŋ ojen yák-yák na okpi-nsi mbi ofoŋ anyanyâ ó tʉ̂k ńnô.”

30Firip fə́ne a bhéne a jak. A yûk nne nnyó noŋ á bhiŋá ka nwet Asaya nnyí. A bhə̂p yê se, “O ri ágo o tóbhá ejûm nji ó bhiŋá áno a?”

31Nne nnyó se, “N kí yim nan ń tóp nji nne á ka joé a sə́rá ə̂m kən é jáé ə̂m.” A bhîŋ fə́ne Firip se a gyʉ́t a kumí na yê ka okpi-nsi. 32Nchot Obhasi nnyi nne nnyó á bhiŋá áno a ri sê:

“Nne ányo a joê noŋ mbúi nnyi á kóe sê á jí yúí.

A joê noŋ mmon i mbúi na anyot nnyi á bhó jok kpe ejok,

kpe noŋ á gbúra áno anyot amê.

Kpe eyum, nne nnyó á ka támé.

33Á káre yê ísonê, á séŋe yê ka chichi.

Nne nnyo a kí toŋe se ńgyê mmon owe cháŋ

ka ekpin í nne nnyó ka ngun é man.”#Asa 53.7-8.

34Kən nne-ndûm nnyó a bhə̂p Firip se, “Nne nchane nnyo nkara-otîp nnyó a séŋe a kpê a ri énê? A séŋe a kpê na nne etat kən yê ḿfoné?”

35Firip mân a róghe na nchot nnyi Asaya a séŋe nná, a sə́re nne-ndûm nnyó chénchén otîp ogyebhá-ḿbə́ŋé mbi ó kpée na Jisos.

36Nji á jéna á jak, á sî ka eji ayép etat, nne-ndûm nnyó a bhə̂p Firip se, “Ńgyê ayép, ejûm etat é rî nji é kí gbʉi ə̂m n kâ fûk ayép a?”

[ 37Firip a sə́re yê se, “Ó yuŋ ḿbə́ŋé eya chénchén o kî na Obhasi, nji é kí gbʉi wâ ayép efúghúm cháŋ.”

Nne nnyó se, “Ń yuŋ ń ki. Ń kam bəre Jisos Krayis a ri Mmon Obhasi.”]

38Nne nnyó a sə́re okpi-nsi obhê ó gyími. Á bhə̂t ka nsi, Firip a fûk yê ayép.

39Nji á gyʉ́ri, Obhasi Ebhare Ntʉgantʉ a kô Firip a jak. Nne nnyó á ka kpó yen yê, kən a kʉ́rá na ekpatə́m ogyebhá-ḿbə́ŋé. 40Kən Firip a kpo to a yén, a ri ka ebhat Asotus. A róghe fə́ne a jená a fará chénchén nték, a sə́rá otîp ogyebhá-ḿbə́ŋé. A sə́re tata a sî Sesariya.

Currently Selected:

Etûm ágbán~í jisos, echî 8: ETUNT

Highlight

Compare

Copy