Etûm ágbán~í jisos, echî 6

Á saŋ ane-echî anígisá mba á kí fi achot ekəp

1Ka ebhú áji, nji atóbhá Jisos á róghe etíím, okpóŋe ó bhâ gbô. Ane Jus mba á chóra Grik sê ane Jus mba á chóra Ibru á kí kirâ ekəp kpe bhaghé ofú, á bhó karâ mbâ ane-akáé ekə́t ábho.

2Nji ágbán í Jisos ófó na ábháe á yúghi nchot nnyí, á bhîŋ chénchén atóbhá Jisos á chə́me. Á sə́re ábho sê, “Atem-abhon-í-nnyen, tîk é bhó nop sê é mághe nchot Obhasi ekpíím, é gyé ka achot ekəp. 3Nâ sâŋ ên ane anígisá ka ekam ejə́né mba ó məŋe ên sê Obhasi Ebhare Ntʉgantʉ a súi ábho ka biji, á məŋe ejûm nono. Tîk e kâk ábho á fik achot ntʉ́ghi mmá. 4Êt áfoné mân tîk e kará biji ibhə́ré ka egoróm Obhasi na nchot eye ekpíím.”

5É gyébhe chénchén ane kpe-eji na íkíkéré mfí. Á bhâ sâŋ Stibhen, nne yót nnyo ḿbə́ŋé eye nnyi a kíi na Jisos a sonê kpe-eji. Ikom Obhasi Ebhare Ntʉgantʉ í rî yê fə́ne ka biji tə́mé-tə́mé. Á sâŋ fə́ne Firip na Prokorus na Nikano na Timon na Pamenas na Nikoros. Nikoros a ri njéné nnyo a dʉ Antiyok kən a chə́bhe noŋ nne Jus. 6Á kô mân ane mbá á tóŋe ágbán í Jisos. Ágbán mbá á kúni fə́ne abhô ábho ka echî ane mbá á góre Obhasi.

7Ka ekpak njí, nchot Obhasi a kə̂t a jabhá. Ka Jerusarem, ane mba á tóbha Jisos á kə̂t á chəma ka ofú ka ofú. Kpe etî-etî akará-agore Obhasi á kâm fə́ne na ńnyə́ne.

Á fi Stibhen

8Stibhen a jóe nne yót nnyo a súi na onobhá-eji na ikom Obhasi. Á yimá ntûm okpógha-biji, a tóŋá biriŋ ane á yena. 9Kən etʉ̂ ane á ká kam na yê. A ri ane óchâm Obhasi mbi á bhíŋa sê Asʉ́ŋ Asík#6.9 Asʉ́ŋ Asík: A ri ane Jus mba á káre ntí kən á yíghi biji ábho ka osʉ́ŋ. Ka ngûm etat a ri ásé ábho nâ á yíghi ábho ka osʉ́ŋ.. Ane mbá á dʉ̂ Sarin na Areksandriya. Ábho é kpê na ane Jus etat mba á dʉ̂ Sirisiya na Esiya á róghe áfírí na Stibhen. 10Kən Obhasi Ebhare Ntʉgantʉ a káre Stibhen oməŋá-ejûm mbi nchot eye, kpe mfírá cháŋ.

11Ka obhô mbí, ane mbá á chîŋ obhô-njəm á káre ane etat sê á sə́ré sê ábho á yûk Stibhen a chorá a túk Mosis na Obhasi. 12Ka ekpak njí, á yîm ane-akúí eték na atóŋá-ebhín na ane chénchén, á yâm ḿbə́ŋé na Stibhen, á fî yê á jak ka ochî echəme Atáŋá-eték.

13Á kô ane etat á bhâ róghe áfúbhí esə́rə́m á kpek na yê. Ane mbá á kí səre sê, “Nne nnyó, e yûk yê a chorá kpe bhaghé ebhú a túk ókʉ́rí achot Obhasi na ebhín í Mosis. 14Á səra se Jisos nnyo nne Nasaret, a kí joghe ókʉ́rí achot Obhasi obhə́ré mbí, a yóŋe chénchén erû ejə́ré nji Mosis a karê êt.”

15Chénchén ane ka echəme njí a yûŋ amə̂t a kí kep Stibhen. Á yên ochî obhê ó runá noŋ mbi énjel.

Currently Selected:

Etûm ágbán~í jisos, echî 6: ETUNT

Highlight

Compare

Copy