Etûm ágbán~í jisos, echî 13

Á kí saŋ Banabas na Sol sê á túm

1Ka echəme atóbhá Jisos ka Antiyok akpíghá-ane achot á rî, akará-otîp fə́ne á rî. Ane noŋ Banabas, na Simun nnyo á bhíŋa yê sê Ényaghé-nne, na Lusiyus nnyo nne Sirin, na Manayen nnyo á gyée ka ókʉ́rí Ntûfâm Erot, na Sol eróŋ. 2Nji echəme ane njí á kí goré Obhasi, á kak njaé sê á jíghí yê, Obhasi Ebhare Ntʉgantʉ a sə́re ábho se, “Sâŋ ên Banabas na Sol, kî ên ə̂m, á yîm etûm nji n kíi mbâ ábho.”

3Echəme ane njí á kâ njaé á góre Obhasi, á kúni Sol na Banabas obhô ka echî á yóre ábho, á tûm ábho se á jí yîm etûm nji Obhasi a túmi ábho.

Ebhú Banabas na Sol á rî ka eték í Sayiprus

4Nji Obhasi Ebhare Ntʉgantʉ a kpô túm Banabas na Sol ejen, á mághe á jak Serusiya. Á kpó maghé Serusiya á jak aya-áyâ ta á sî Sayiprus. 5Á jak Salami á jî gyê áchâm Obhasi ane Jus á sə́re ane achot Obhasi. Jon Mak nâ nkagha-ábho-obhô.

6-8Á jên á fáre nték i Sayiprus a mân. Nji á síi eték í Pafos, á kpúghi nne Jus yót nnyo á yimá ajom a kamá se Bajisos. Ka eyum í Grik sê Erimas. Á səra se yê nkara-otîp Obhasi, kən a ri áfúbhí. Nne nnyó a ri nyima-etûm yót ka ane mba á kágha Ntûfâm Sejiyus Poros obhô. Ntûfâm nnyó a fonê aron kpe-eji. Kən ofú bhə́t ntûfâm nnyó a bhîŋ Banabas na Pol se á bhá sə́ré yê achot Obhasi. Kən nne ajom nnyó, Erimas, a nôk ekpak nji a kí gbʉi ábho se á kâ bhâ oyim ntûfâm nnyó a chəbhé ntóbhá Jisos. 9Kən Sol, nnyo á kamá fə́ne se Pol, a kêp nne nnyó ka ochî nyamḿ. Obhasi Ebhare Ntʉgantʉ a súi yê ka biji kpúk. A sə́re nne nnyó se, 10“We mmon i Satan, we nnyo ó bhaná chénchén ejûm nji é rî nono, oka ndibhí mbi ó rî wâ, we nnyo ó noghá ó yóŋé mfoné nchot i Ńtâ Obhasi a chəbhé nnyi áfúbhí. 11Ńtâ Obhasi a kí toŋe wâ indəré mfá-mfá. Amə̂t amâ á kí tan ka ngyím nnyí, ó ro kpó yen ebhát ta ebhú é jak.”

Ka ngyím ányi Erimas a yûk noŋ ejûm é bhúi yê amə̂t, a róghe fə́ne ejeném a fará, yê a wóm kpe nne nnyo a kí fi yê na obhô a tóŋá mbá.

12Nji ntûfâm nnyó a kpô yén ejûm nji é fábhe, a yûŋ ḿbə́ŋé eye a kî na Jisos. Biji í mân yê na okpígha-ejûm mbi ó kpée Ńtâ Jisos.

Ebhú Pol na Banabas á rî ka Antiyok Pisidiya

13Pol na ane mba á jéna na yê á mághe Pafos á jak nnyi Pega ka Pamfiriya, aya-áyâ. Jon Mak a mághe mân ábho áfo a chə́bhe njəm nnyi Jerusarem. 14Kən Pol na ane mba ngá á yə̂p ka Pega á jak ta á sî Antiyok ka Pisidiya. Ka ofú oyoá-biji, á jak ka óchâm Obhasi, á kúmi. 15Nji ane á kpó man esə́re Obhasi ka nwet ebhín na nnyi akará-otîp á séŋe, ane-echî óchâm Obhasi mbí á sə́re baPol sê, “Atem-abhon-í-nnyen, ájoé ó fon ên kpe nchot nnyi kə́n o kâk ên êt ḿbə́ŋé, sə́re ên êt.”

16Pol a rúi fə́ne ngyím a nyíŋi obhô se ane á mághe ejok, a róghe mân echoróm se, “Atem-ane Isrel abhámé na ên ajéné chénchén mba ó jigha ên Obhasi, yûk ên nchot amé. 17Obhasi ane Isrel nâ a sáŋe ásé abhə́ré éməné a yîm ábho ekpatə́m ane nji á rî ka ojéné ka nsi Ijip. Na ekpatə́m ikom ifê, a yíghi ábho nji á jóe ka osʉ́ŋ ka eték Ijip.#Ane 1.7; 12.51. 18A kə̂p ḿbə́ŋé na ekpin ábho ka nsam i nyâ ébháe nnyi á rî ka etə́m.#Mfana 14.34; Otira 1.31. 19A bhíbhi ane nték anígisá ka nsi Kanan, a kô nsi nnyí a káre ábho ka ane abhê.#Otira 7.1; Jos 14.1. 20Achot mmá chénchén á kóe nyâ ntem-esam na ejûm (450).

“Nji achot mmá á máne, a káre ábho atáŋá-eték mba á kí toŋe ábho mbá ta é si ka ebhú Samuwel nnyo nkara-otîp Obhasi.#Atáŋá 2.16; 1 Sam 3.20. 21Ane mbá á bhâ bhə̂p mân se ábho á kí wom ntûfâm nyúp nnyo á fik ábho fép. Obhasi a káre ábho Sol nnyo mmon i Kis. A ri nne ndə́p-i-njû Benjamen. Sol a fî otúi ka nsam i nyâ ébháe.#1 Sam 8.5; 10.21. 22A kpô yighí Sol ka otúi, a kâk Debhit. Yê ḿfoné Obhasi nâ a sə́re ka nnyo imê se, ‘Ń yen Debhit nnyo mmon i Jesi, a gyê ə̂m ka ḿbə́ŋé. A kí yim chénchén nji n wóme.’#1 Sam 13.14; 16.12; Nkôn 89.20. 23A ri ka biyábhé-abhon í Debhit nâ Obhasi a sáŋe nne nnyó sê Jisos, se a yim ane Isrel á sém ka ekpak nji yê a chimî. 24Kən Jisos nnyó a bhá, Jon a raŋê mbá a sə́re ane Isrel se á yóŋé ḿbə́ŋé, á mághe obhí ábho, á fûk ayép.#Mak 1.4; Luk 3.3. 25Nji Jon a kə́ bha ojeghé etûm ejê, a bhə̂p ane se, ‘Ó kera ên sê mme a ri énê? Mme nne ányo asík. Kpák! Yê ḿfoné a kə́ bha ə̂m mbá-njəm. Ń ka bhik nnyo ḿ kpará kpe arík iyîm akát ibhê.’#Mat 3.11; Mak 1.7; Luk 3.16; Jon 1.20,27.

26“Atem-abhon-í-nnyen abhámé mba o ri ên abhon Abraham, na ên ajéné chénchén mba ó jigha ên Obhasi, Obhasi a tûm ane mbâ eyəré na otîp mbi ó kí yim êt é sém. 27Ane Jerusarem na atúi-ofâm ábho á ká kam sê yê nâ Obhasi a túmi se a bhá yim ngun á sém. Á bhíbhi esup ejê sê á yúi yê. Ka ekpak njí nâ é yími kən achot mma akará-otîp Obhasi á séŋe á fâp ekan-ékân. Kpe á bhíŋa achot mmá chénchén ka ofú oyoá-biji, echî á bhó məŋé. 28Kpe ejûm ebhí á ká yen nji a yimî, kən á sə́re Piratus sê a yúí yê.#Mat 27.22-23; Mak 15.13-14; Luk 23.21-23; Jon 19.15. 29Á kpo jeghé eyimím achot chénchén á fáp noŋ akará-otîp Obhasi á séŋe á kpê na nne nnyó, á yíghi yê ka ego njí, á kə̂n.#Mat 27.57-61; Mak 15.42-47; Luk 23.50-56; Jon 19.38-42. 30Kən Obhasi a yîm yê a nyə́me ka ekʉ̂. 31Ka mfín etî-etî nji a nyəmê ka ekʉ̂, a fâp ka ochî ane mba á dʉ̂ na yê nnyi Gariri á bhak nnyi Jerusarem. Ane mbá mfá-mfá nâ á rî atî-isê abhê mbâ ane Isrel.#Etûm 1.3.

32“Nâ ńjə́ne é ko otîp ogyebhá-ḿbə́ŋé mbí é bha mbâ eyəné. Otîp mbí Obhasi a chími a káre ásé abhə́ré. 33Ńgyê ḿbə́ne a yîm a kpô karé êt, abhon ábho, ka nji a yimî Jisos a nyə́me ka ekʉ̂. Nâ noŋ fə́ne á séŋe ka osúí nkôn ébháe ka Nwet i Nkôn Obhasi sê,

‘We a ri Mmon omé.

Égyé, ń chəbhe Ńsé owa.’#Nkôn 2.7.

34Nji Obhasi a yimî Jisos a nyéme ka ekʉ̂, á ka kpó a chá, Obhasi se,

‘Tîk n káre wâ enare áji

nji kpe akôp cháŋ, echáám, ó bhó cha.

Ńjə́ne nâ n karê Debhit.’#Asa 55.3.

35Nâ ńjə́ne fə́ne nne a chorê ka eji etat sê,

Obhasi, ‘Nne owa ányo nnyo Obhô-orûm obhâ,

tîk ó bhó maghé yê a kpó a chá.’#Nkôn 16.10.

36Ka ekpin í Debhit, nji a jeghê etûm nji Obhasi a wóme yê a yim ka nsi nnyí ka ebhú ejê, a kpô a tôp ásé abhê. Á kə̂n yê. A kə̂t a châ. 37Nne nnyo Obhasi a yimî a chə́bhe njəm ka ekpin, á ka ka oyəm, a tán.”

38“Atem-abhon-í-nnyen, nâ məŋê ên mân sê ka obhô nne nnyó Jisos nâ á kí səre áno ane otîp mbi sê Obhasi a kí ri nsôn a su obhí ane. 39Məŋê ên fə́ne sê nne nnyo á yuŋ ḿbə́ŋé a kî na yê, tîk a sêm ka chénchén obhí mbi ebhín í Mosis é bhó bhik oyim yê a sém. 40Kó ên mân ebhú, ejûm nji akará-otîp Obhasi á chóre é kâ fâp na ên. 41Á chóre nná sê,

‘Ên mba ó kaghá ên atem-ane ntuŋ,

biji tîk í kpô ên kpe-eji kən o kpô ên.

Echî aŋ? N kí yim ejûm ka ebhú ejə́né

nji kpe kə́n á sə́re ên osə́ré,

ó bhó kam ên sê kə́n á yîm ntʉ́ghi ejûm áji.’ ”#Abh 1.5.

42Nji Pol a manê na achot mmá, yê na Banabas á róghe emaghám óchâm mbí sê á jî, kən ane ábha á góre ábho sê á kpó səre ábho achot mmá ka ofú oyoá-biji mbi ochî. 43Ekumi é kpó to é chát, ane Jus etî-etî na ajéné mba á chəbhe á tobha Obhasi ka mbá ane Jus, á chə̂m baPol, á kubhá á jak. Pol na Banabas á səra ábho á kpek sê deê á fî ka onobhá-eji Obhasi mbi a tóŋe ábho.

Ane mba Jus asík á kí yuk otîp Obhasi

44Ofú oyoá-biji ó kpó si, ane á bhak, á sîk obhik eték í ndə́m, á jí yúk otîp í Ńtâ Jisos. 45Kən ane Jus á kpó yen ekam ane njí ndə́m, é chəbhe é yama ábho ḿbə́ŋé kpe-eji na baPol, á kə̂t á tuk ábho, á yoá okpígha-ejûm ábho.

46Kən Pol na Banabas á chôt, kpe efup á ká fon, sê, “E fonê ka esə́rə́m ên otîp Obhasi kpá, kən ó taŋe ên ḿbə́ne. Məŋê ên mân sê ka etaŋám njí, ó ka kpó kep ên biji sê ó bhik ên efonóm ekpin ótúm-ótúm. Êt e kí ko mân otîp mbí é jî mbâ ajéné. 47Ńgyê ebhín nji Ńtâ Obhasi a karê se,

‘Ń ki wâ bəre ó jóe noŋ ebhát mbâ ajéné,

ó tóŋe mbá ngun ndə́m á sém.’ ”#Asa 42.6; 49.6; Luk 2.32.

48Ajéné á kpó yuk nchot nnyí, é gyébhe ábho é kpô. Á káre Ńtâ Obhasi ekûp ka otîp obhê mbí. Nchot nnyí a kpô fáp áno, ane chénchén mba Obhasi a sáŋe se tîk á fôn ekpin ótúm-ótúm, á kî ḿbə́ŋé na yê. 49Nchot Obhasi a jên mân a jábhe kpe bhaghé eji ka ebhat áji.

50Kən ane Jus á kâk anyoghe na etʉ̂ ane-ayúp mba ane-akáé mba á jígha Obhasi, é kpê na ane-echî ka eték, á tûp nchot ta á bhîm Pol na Banabas ebhat áji. 51BaPol á bhûk ebhəm ebhat áji á mághe mbá-njəm noŋ eriŋ sê Obhasi tîk a kpə́re ane mbá. Á bhâ mághe mân á jak nnyi Ikoniyum.#Mat 10.14; Mak 6.11; Luk 9.5; 10.11. 52Kən atem-abhon-í-nnyen ka Antiyok á fôn ekpatə́m ogyebhá-ḿbə́ŋé, Obhasi Ebhare Ntʉgantʉ a ri na ábho tə́mé-tə́mé.

Currently Selected:

Etûm ágbán~í jisos, echî 13: ETUNT

Highlight

Compare

Copy