1 Ane tesaronika, echî 3
3
Etûm í Timoti mbâ ane Tesaronika
1Nji é ka kpó kəp ḿbə́ŋé, nâ ńjə́ne é yími êt é kâm sê é kə́t, êt átíŋ, ka eték Aten.#Etûm 17.15. 2Kən e tûm Timoti sê a bhá kak ên ikom, a yim ḿbə́ŋé nnyi o kíi ên na Jisos a son. Timoti a ri ntem-mmon-i-nnyen owəré yót nnyo êt é chəm e kí yim etûm Obhasi nji é kpik ane otîp ogyebhá-ḿbə́ŋé Jisos Krayis. 3Echî aŋ? É ka wóm sê nne owəné kpe yót a fon efup na ḿbə́ŋé nnyi a kíi na Jisos ka ngun á kí karé yê onyʉk. Ó məŋe ên, ên áfoné, sê onyʉk mbí a ri Obhasi nâ a kamê. 4É səre ên ntə̂m etî-etî ta ka ebhú e ri na ên sê achot mma á fábha nná na êt mfá-mfá, tîk á fâp. Ó yen ên fə́ne ekpak nji á fábha ekan-ékân. 5Mme Pol, ń ka kpó kəp ḿbə́ŋé, nâ ńjə́ne n yighî Timoti n tûm bəre a bhá yen ájoé ḿbə́ŋé eyəné á nyə́ne na Jisos. A ri n kí fup bəre Satan a kâ yîm ó yíghi ên ḿbə́ŋé, etûm ejə́ré é tán ka chichi.
6Kən mfá-mfá, Timoti a bhâ náre êt ḿbə́ŋé na otîp mbi a dʉ ágo mbâ eyəné. A sə́re êt okot obhə́né na ekpak í ḿbə́ŋé eyəné a nyə́ne na Jisos nono. Se o nyə́ne ên o tirá êt kpe bhaghé ebhú na ogyebhá-ḿbə́ŋé. Se ên fə́ne noŋ êt, ó fon ên okot mbi sê é kpó yen atem.#Etûm 18.5.
7Atem-abhon-í-nnyen, nâ məŋê ên mân sê kpe noŋ é yena áno oseŋe, ekpak o kíi ên ḿbə́ŋé na Jisos a kí kak êt ḿbə́ŋé kpe-eji. 8Echî aŋ? Mfá-mfá ḿbə́ŋé a nâ êt nnyen enaám ka eji o nyə́ne ên nono na Ńtâ Jisos. 9É ka fon kpe nnyo mmi e kí kup Obhasi ka chénchén ogyebhá-ḿbə́ŋé mbi ên o karê êt ka ochî obhê. 10E kí goré yê na ḿbə́ŋé-a-ḿbə́ŋé atʉ́ na efín sê a kpó yim é yén ên atem, é jéghe okpí ên achot mma ó ka məŋé ên ka nchot i ḿbə́ŋé ekíím na Jisos.
11E kí goré sê Obhasi Ńsé na Ńtâ Jisos á tʉ́ri mbá á kí nnyi e kə́ bha ejen ejə́ré mbâ eyəné. 12E kí gore sê Ńtâ Jisos a yim okot obhə́né na atem é kpê na ane chénchén, ó kúí ó jî ochî, noŋ okot mbi e fonê na ên. 13Á yim áno, tîk ḿbə́ŋé a sôn ên, o gyími ên nono kpe akôp nne á bhó fon ka ochî Obhasi Ńsé, ebhú Ńtâ Jisos á chəbhé njəm a bhák na efun ejê fép.
Ejagham New Testament © Bible Society of Nigeria and Bible Society of Cameroon, 1996.