Baloma 3
3
1Anu ba Juda balababaala buti bakunze? No kupalulwa kulaleta bubotuunzhi? 2Pele kuli bubotu bukando buyanwa. Nkaambo ukutaanguna, Leza wakapa ba Juda mazwi akwe. 3Wakabapela nzhi? No kuti naa bamwi kabatashomeki, sa kutashomeka kwabo kulakonzha kupa ati aze Leza atashomeki? 4#Inte 51:4Bobo imbo pe! Pele bantu balyeelele kuzhiba ati, Leza ulashomeka, nikuba ati bantu boonse mbabeshi. Umbona mbuli mbukulembelwe ati,
“Ulyeelele kubonwa ati uliluleme ciindi nuukanana,
ulimwi utazulwa ciindi nibakubeteka bamwi.”
5Pele na bubeteshi bwesu butaluleme bulatondezha ati lubeta lwa Leza luliluleme, no tulaamba acani? Sa tulakonzha kwaamba ati Leza taluleme naatupa cisubulo? Awa ndaamba ukoya muntu uutashomi. 6Bobo imbo pe! Kuti Leza nataakululeme, no ulakonzha buti kubeteka bantu ba anshi?
7Pele na kuti kwiita mububeshi bwangu, bushomeshi bwa Leza bulalibonya ukumuletela bulemu, no nkaamboonzhi ncimpewa mulandu wabushishibi? 8No nkaamboonzhi bamwi bantu ncibatutamicizha ati tulaamba ati, “Atucite cibi kwaamba bubotu buzhize?” Babo balakapewa cisubulo cibeelele.
Kwiina Ululeme
9Anu twaambe acani? Sa uswe tuba Juda tuliluleme kubaala bakunze? Pe pe, tatubabaali, nkaambo twaamba kale ati boonse ba Juda uba Giliki baleendelezhewa u cibi. 10#Inte 14:1-3; 53:1-3Mbuli mbukulembelwe mu Malembe ati,
“Kwiina ululeme, naaba womwi pe,
11kwiina uteelela, nikuba kwiina ukapula Leza.
12Boonse baleya, boonse bulyo babisha.
Kwiina naaba womwi ucita ciluleme, kwiina naaba womwi pe.
13 #
Inte 5:9;
Inte 140:3
Mimino yabo, nshuumbwe shili bukwazhi.
Balasebezha milaka yabo kwaamba shabubeshi. Mu milomo yabo muli bulohu bwabazoka buyaya.
14 #
Inte 10:7
Mu milomo yabo mulizwile bukali u kushinganya.
15 #
Aiz 59:7, 8 Maulu abo alafwambaana fwambaana kutila bulowa.
16Munzhila shabo muli kuzonauna ukupenzha.
17Ulimwi tabeezhi inzhila ya luumuno.
18 #
Inte 36:1
Kumenso abo tabamutiyi Leza.”
19Inzho tulizhi ati shoonse shaamba Mulawo wa Leza shilakwatilizha babo bali mu Mulawo, kwaamba ati babule matamino, kwaamba Leza azule luundu loonse. 20#Inte 143:2; Bag 2:16Nkaambo kwiina muntu naaba womwi ukonzha kululamikwa kwa Leza kwiita mukucita cizanda mulawo, kaambo mulawo ulapa kwaamba bantu bazhibe ati babisha.
Bululami Kwiita mu Lushomo
21Inzho bululami bwa Leza bwazubululwa kutali ku mulawo, nikuba ati mulawo u bashinshimi mbubakamboni babululami. 22#Bag 2:16Bobu mbululami bwa Leza kwiita mu lushomo mwa Jeso Kilisito kuli babo boonse ba shoma nkaambo kwiina lusalululo pe. 23Nkaambo boonse bantu bakabisha, ukulela kubulemu bwa Leza. 24Pele ninzho balalulamikwa bulyo ukaambo ka luse lwa Leza, kwiita mulunununo lwa Jeso Kilisito. 25Leza wakapa Mwanakwe, kwaamba lufwu lwakwe, ibe inzhila yakulekelela shibi shabantu bamushoma. Ceci ncitondezho cabululami bwa Leza. Kale kale Leza, kaleka bulyo shibi shabantu. 26Kazanda kutondezha ku ciindi ceno kwaamba ati uliluleme, ulimwi ulakonzha kululamika wezo ushoma mwa Jeso.
27No nciinzhi cikonzha kupa muntu kulyeensheensha? Kwiina pe! Mulawo nzhi? Sa mulawo wa milimo? Pe pe! Kaambo cintu cikando kwa Leza ndushomo. 28Nkaambo tulaamba ati muntu ulalulamikwa u lushomo kwa Leza, ukutali kucilila milimo ya Mulawo. 29Sa Leza ngwa ba Juda balo? Sa balo bakunze tali Leza wabo? Ee abo bakunze ngwabo. 30#Ciz 6:4; Bag 3:20Nkaambo Leza uli womwi bulyo, uu lulamika ba Juda kwiita mu lushomo nguubalulamika u bakunze kwiita mu lushomo. 31Sa cilaamba ati, tusowe Mulawo kwiita mu lushomo lolu? Bobo imbo pe. Meni meni ngakuti mu lushomo tulazumya Mulawo.
Currently Selected:
Baloma 3: ILL
Highlight
Copy
Compare
Share
Want to have your highlights saved across all your devices? Sign up or sign in
Ila New Testament © Bible Society of Zambia, 2015.