Tushimpi 7
7
1Mwanangu, sunga mazwi angu,
zobola malailile ngundakupa;
2sunga malailile angu kwaamba ukwate bumi,
sunga injiisho shangu ukoya chintu nchuufhwinishi.
3Aange aminwe yako;
alembe ukoya ebwe mu monzo wako.
4Amba ku busongo ati, “Ulimukwesu,”
ku kuteelelesha ati mweenzhinokosha,
5kukuhuna kuhwa ku mukaintu muhwamashi,
kuhwa kwa kumuhwamashi wa mazwi mainu.
Mukaintu Shimamambe
6Ukuti ampulungwilo yaŋanda yangu
ndalanga kwiita mu kanyandi,
7ndabona akati ka balimbushi,
ndabona akati ka bakubushi,
mukubushi wiina maanu,
8ulaya bweenda munzhila kufhwaafhwi yiikona lyakwe,
watola mukwakwa uuya kuŋanda yakwe,
9ku mabililo ezuba, mangolezha,
achiindi cha mashiku u mushinze.
10Bona, mukaintu wamuswaanganya,
ulisamine ukoya muhuule, monzo usesekele makanze.
11Ngunachaamba, utabulwa,
matende akwe taakalikila aŋanda,
12nguwezo uli ansengwe, nguwezo uli mu mikwakwa,
ulabenda mu makona oonse.
13Wamukwata mukubushi, wamushonta,
cha kubula insoni wamwaambila ati,
14“Ndapa shipaizho,
bwasunu ndalipila shishomezho shangu,
15inzho ndeza kukuswaanganya,
kukukapula cha nchobeni, ubobo ndakuyana.
16Bulo bwangu ndabuzala masani
amabala-mabala kuhwa ku butonge bubotu bwaku Ijipiti.
17A bulo bwangu ndasansaila mafhuta anunka kalonze a mila,
isengwe-sengwe u kinamoni.
18Kweza, toone cha lufhuno kushikila chifhumo-fhumo,
atutangale cha lufhuno.
19Nkaambo mulumyaangu teko kuŋanda,
waya mu lweendo lulamfhu,
20wakatolelela inkomo ya mali a siluva,
ulakazhoka kwaita mwezhi.”
21Wamoongelezha umazwi mainu,
ukwaamba kwiinu wakamulozha mukubushi.
22Ndilyona-ndilyona mukubushi wakamuchilila,
ukoya musune uya kuyaiwa,
ukoya nakafhwifhwi muchende mbwaawila mwilambwe,
23limwi muni wakwe wayaswa umuhwi,
ukoya muzuni mbwaabindaana kunjila mu kooze
tezhi kwaamba chechi chikalamunanga bumi bwakwe.
24Iinzho banangu, amumpupulale,
amuteeleleshe mazwi ahwa ku mulomo wangu.
25Utaleka monzo wako kuchindulukila kunzhila shakwe,
utaleyi kuya munzhila shakwe,
26nkaambo mbanji-banji mbakooneka,
mbaakayaya mbanji-banji.
27Iŋanda yakwe njiinzhila iya Kumuyabafhu,
kuya anshi ku shimpetu sha lufhu.
Bible Society of Zambia