Tushimpi 26
26
1Mbubona mbuli chaandwa chilimo na inhula akutebula,
mbubona umulimbushi mbwaateelelwe bulemu.
2Ukoya kashise mbwaatakalikila, na shikamiimbya uuya buuluka,
mbubona ukushinganyiwa kwiina kaambo mbukutahwililila.
3Chiswepu nchambizhi, chizongo nchambongolo,
musako ngwaanuma ya mulimbushi.
4Utainguli mulimbushi cha bulimbushi bwakwe,
ulaba nuuba ukoya nguwe.
5Ingula mulimbushi cha bulimbushi bwakwe,
ulaba naasongwaala mu menso akwe mwini.
6Ukosola matende akwe mwini u kunwa bulwati,
uli ukoya muntu utuma mulumbe yiitashi lya mulimbushi.
7Ukoya maulu a mulema mbwaalengelela bulyo,
mbukabele kashimpi mukanwa mwa balimbushi.
8Mbubona buli waanga ibwe munkwisho,
mbwaabele upa bulemu ku mulimbushi.
9Ukoya buya bwayasa mwitashi lya chakolwa,
mbukabele kashimpi mu mulomo wa balimbushi.
10Mbubona shibuta mbwaayasa woonse muntu,
mbwaabele usebezha mulimbushi na chakolwa.
11 #
2 Pita 2:22
Mbubona mubwa mbwaapilukila ku chilushu chakwe,
aze mulimbushi mbwaabweelela ku bulimbushi bwakwe.
12Sa ulabona muntu musongo mu menso akwe mwini?
Kuli bulangizhi bwa mulimbushi kubaala wezo.
13Mukata ulaamba ati, “Kuli shuumbwa munzhila!
Kuli shuumbwa mu mikwakwa!”
14Mbubona buzumbaana chitendele a mulyango,
mbwaachita mukata a bulo bwakwe.
15Mukata ulatoomeka itashi lyakwe mu mutiba,
ulakatala kulibweezha ku mulomo wakwe.
16Mukata musongosha mu menso akwe mwini
kubaala bantu chiloba baingula cha maanu.
17Wezo ukwela matwi a mubwa,
uli ukoya muntu unjila mwizwanga litali lyakwe.
18Ukoya muntu musondoshi ufhusa shishishi sha mulilo, mihwi u lufhu,
19mbwaabele muntu uchenga shimukobonina
waamba ati, “Ndasobana bulyo!”
20Kwabula inkuni, mulilo ulazhima,
kwabula muhwizhi, kuzwangana kulamana.
21Mashimbi ku makala azaka, inkuni ku mulilo,
mbwaabele mulwati akubusha inkondo.
22Mazwi a muhwizhi nchilyo chiinu,
alanjila mwifhu mwini.
23Ukoya bushingulule bwa chisebezho chibumbe,
mbwiibele milomo ya monzo mubiyabi.
24Kufhumbwa usula, ulalizhibinganya umulomo wakwe,
u kuseseka luchengo mu monzo wakwe,
25Lelyo amba chantenda, mutamushomi,
nkaambo mu monzo wakwe muli shisesemyo chiloba,
26nikuba kwaamba bubiyabi bwakwe bulasesekwa uluchengo,
busofhwaazhi bwakwe bulakazubululwa mumbungano.
27Kufhumbwa washa chilindi, ulakawila mo,
ibwe lilakazhoka kulimba ulikunkulusha.
28Mulaka wa bubeshi ulasula babo mbuuchenga,
mulomo mubauba-uba ulaleta buzonaushi.
Bible Society of Zambia