Balevi 2
2
Shipo sha Maila
1Lelyo kufhumbwa womwi aleta chipo cha maila kwa Yaahwe, chipo chakwe chilakaba cha bufhu bwa wiiti bulamushi. Ulakatila wo mafhuta u kubika wo fulankisensi. 2Amana ulakabuleta ku banakwe Aloni bapaizhi. Kuhwa ku bufhu bwa wiiti bobu bukwete mafhuta u fulankisensi, mupaizhi ulakatapula itashi lizwile lyomwi u kubutenta kwaamba chibe chipanzha cha chizhibalusho achipaililo, chipaizho chikwete bwema bubotelezha kwa Yaahwe. 3Pele checho chikaashaala kuhwa ku chipo cha maila, chilakaba chaka Aloni u banakwe. Chechi nchipanzha chisalalisha cha shipaizho sha mulilo sha Yaahwe.
4Lelyo mwaleta chipo cha maila chiike mu chitofhu, chilakaba shinkwa shiina bumena sha bufhu bwa wiiti bulamushi, buhwelelwe mafhuta na tupampasha twa chinkwa chiina bumena, tunanike mafhuta ezeulu. 5Kuti chipo cha maila chako ncha maila makange ampani, chilakaba cha bufhu bwa wiiti bulamushi bwiina bumena, pele buhwelelwe mafhuta. 6Ulakachikomauna mu shipanzha-shipanzha u kuchitila mafhuta; chechi nchipo cha maila. 7Kuti na chipo chako nchipo cha maila chiike ampani, chilakaba cha bufhu bwa wiiti bulamushi buhwelelwe mafhuta. 8Ulakaleta chipo cha maila chipange u shintu sheshi kwa Yaahwe. Lelyo chapewa ku mupaizhi, ulakachileta ku chipaililo. 9Mupaizhi ulakabweza kuhwa ku chipo cha maila chipanzha cha chizhibalusho cha cho u kuchitenta achipaililo, chipaizho cha mulilo chikwete bwema bubotelezha kwa Yaahwe. 10Pele shesho shikaashaala kuhwa ku chipo cha maila, chilakaba chaka Aloni u banakwe. Chechi nchipanzha chisalalisha cha shipaizho sha mulilo sha Yaahwe.
11Kwiina chipo cha maila checho nchimuleta kwa Yaahwe chiti chikapangwe u bumena, nkaambo tamweelele kutenta bumena nibuba buchi kuba chipaizho cha mulilo cha Yaahwe. 12Mulakaleta kwa Yaahwe chipo cha michelo mitaanzhi, pele sheshi tashikapewa achipaililo kuba bwema bubotelezha. 13Mukalunge mwino mu shipo sha maila shenu shoonse. Mutakaleka mwino wa chihuminano chenu u Leza wenu kwaamba utakabi mo mu shipo sha maila shenu; mukalunge mwino mu shipo shenu shoonse. 14Kuti na waleta chipo cha maila cha michelo mitaanzhi kwa Yaahwe, ulakaleta chipo cha maila cha michelo mitaanzhi yako ya bale mupiya, mukange a mulilo, bale mupiya mutwe. 15Ulakatila wo mafhuta u kubika fulankisensi; chechi nchipo cha maila. 16Mupaizhi ulakachitenta, chilakaba chipanzha cha chizhibalusho, amwi maila matwe u mafhuta amwi antoomwi u fulankisensi wa yo woonse; chechi nchipaizho cha mulilo kwa Yaahwe.
Bible Society of Zambia