Aizaya 2
2
Luumuno lwa Shikwense.
(Mika 4:1-3)
1Izwi lelyo Aizaya, mwanakwe Amozi, ndyaakabona kukwatikizha Juda u Jelusalemu.
2Chilakachitika mu mazuba ezhiza kumbele,
kwaamba lupili lwaŋanda ya Yaahwe,
lulakashitikizhiwa kuba lulamfhunsha a mapili oonse,
lulakasumpulwa kubaala malundu;
shishi shoonse shilakakunkila kuli ndulo,
3shishi shinji-shinji shilakeza u kwaamba ati,
“Kamwiza, atulize tuukuya ku lupili lwa Yaahwe,
kuŋanda ya Leza waka Jakobo,
kwaamba atuyiishe shiyanza shakwe,
kwaamba tweendele munzhila shakwe.”
Nkaambo kuhwa mu Ziyoni kulakahwa injiisho,
yiizwi lya Yaahwe kuhwa mu Jelusalemu.
4 #
Jow 3:10; Mika 4:3 Ulakabeteka akati ka shishi,
ulakakosola twaambo twa shishi shinji-shinji;
balakafhula macheba abo kuba milomo ya mayamba,
masumo abo kuba ingobyo sha kukokozha masamu a masaansa;
chishi tachikazhimuni icheba kulwisha chishinina,
tabakaiyi linji mbukulwiwa inkondo.
5Uwe uŋanda yaka Jakobo,
kamwiza, atweende
mu mumuni wa Yaahwe.
Bushichisapi bulakazonaunwa
6Nkaambo wasanikizha bantu bako,
iŋanda yaka Jakobo,
ukuti bezula shiyanza sha kwiwe,
bezula basonda ukoya Bafilisiti,
balaampana matashi u bana ba bahwamashi.
7Inshi yabo yezula siluva u goludi,
lubono lwabo talubalika,
inshi yabo yezula imbizhi,
inkalaki shabo tashibalika.
8Inshi yabo yezula mituni;
balafhukama u kubika bushu anshi u kupaila,
ku mulimo wa matashi abo,
ku shipange sha minwe yabo beni.
9Ubobo muntu wabonzhewa,
umwi wuumwi wazholwa anshi
utabalekelela!
10 #
Cizu 6:15; 2 Batesa 1:9 Njila mu mwala,
zuba mu lufhuko
kuhwa kumbele lya kutizha kwa Yaahwe,
kuhwa ku bweebeshi bwa bulemu bwakwe.
11Kulitunda kwa muntu kulakazholwa anshi,
kulisumpula kwa bantu kulakabonzhewa,
Yaahwe ichenana, ulakasumpulwa mu buzuba bobo.
12Nkaambo Yaahwe wa makamu ulikwete buzuba
bwa kulwisha choonse chilitunda, ulimwi chilamfhusha,
bwa kulwisha choonse chisumpulilwe, chilakazholwa anshi;
13bwa kulwisha yoonse milombe ya Lebanoni
milamfhusha ulimwi isumpulilwe;
bwa kulwisha oonse mabanga a Bashani;
14bwa kulwisha oonse mapili malamfhusha,
bwa kulwisha oonse malundu malamfhu;
15bwa kulwisha boonse busanza bulamfhu-lamfhu,
bwa kulwisha boonse bwaanda bwa chizubilo chizumu,
16bwa kulwisha oonse mato makando a ku Talashishi,
bwa kulwisha shoonse shintu shibotelezha.
17Kulitunda kwa muntu kulakabonzhewa,
kulisumpula kwa bantu kulazholwa anshi,
Yaahwe ichenana, nguukaalemekwa mu buzuba bobo.
18Mituni ilakamana chakutabonwa linji.
19Bantu balakenjila mu maata a myala
u mu shilindi shaanshi,
kuhwa kumbele lya kutizha kwa Yaahwe,
kuhwa ku bweebeshi bwa bulemu bwakwe,
lelyo azhimuka kutizha inshi.
20Mu buzuba bobo bantu balakasowa
mituni ya siluva yabo u mituni ya goludi yabo,
yezho njibakalipangila beni kufhukama u kubika bushu anshi u kupaila,
ku bashilufhukwe u ku bashikaampaafhwa,
21kunjila munta sha myala
munta sha myala milamfhusha,
kuhwa kumbele lya kutizha kwa Yaahwe,
kuhwa ku bweebeshi bwa bulemu bwakwe,
lelyo azhimuka kutizha inshi.
22Amuleke kushoma mu muntu
ulya maila,
anu nguni?
Bible Society of Zambia