Bahibulu 3
3
Jeso Mukando Kubaala Mozesi
1Inzho umwe nubakwesu basalala numwaabana bwite bwa kwizeulu, amutweluke sha Jeso mutumwa ulimwi Mupaizhi Mukando ngutushoma. 2#Mye 12:7Wakashomeka kwa Leza wakamusala, umbona Mozesi mbwaakashomeka muŋanda ya Leza yoonse. 3Muntu uzaka iŋanda ulalemekwa kubaala iŋanda. Umbona bobo, Jeso ulalemekwa kubaala Mozesi. 4Nkaambo iŋanda yoonse ilikwete wakeezaka, pele Leza ngumuzashi wa shintu shoonse. 5Kwiingaina umutwanga mbwaayelele kuba, Mozesi wakaakushomeka ku bantu ba muŋanda ya Leza. Ulimwi wakapa bumboni ku shintu shesho Leza nshaakaakuzanda kwaamba kumbele a mazuba. 6Pele Kilisito mbwaali mwana wa muŋanda, uleendelezha ba muŋanda ya Leza boonse cakushomeka. Uswe tuli iŋanda yakwe kuti twatolelela kukwatisha mubulanjizhi mbutulyeensheensha cakutazungaana.
Kulyoocezha Kwa Bantu ba Leza
7 #
Inte 95:7-11
Inzho mbubona bwaamba Moza Usalala ati,
“Na mwateelela izwi lya Leza bwasunu,
8mutazumya myonzo, ukoya muciindi cakupapa, mu buzuba bwakusunkwa mulukula.
9Momo ba shaakale benu bakansukusha,
nikuba kuti bakabona shesho nshindakabacitila kumyaka iili makumi one.
10Ubobo ndakalilemanina leli izhalane u kwaamba ati,
‘Lyoonse mbantu bazhiminine mu myonzo yabo,
ulimwi tabashizhi inzhila shangu.’
11Ndakalemana ukupinga ati,
‘Kwiina nibaya kunjila mukulyoocezha kwangu.’ ”
12Bakwesu amulanjishe kwaamba kutabi ukwete monzo mubiyabi wakutashoma, kwaamba amuzandule kuhwa kwa Leza mumi. 13Pele amubone kwaamba kwiina naaba womwi wenu ucengwa u cibi u kupapila Leza, kamuyohwana mazuba oonse kufwumbwa bwatewa ati “Bwasunu.”
14Uswe toonse tulaabana mwa Kilisito kuti twakwatisha mu lushomo ndutwakakukwete ku makancilo kushika ku mamanino.
15 #
Inte 95:7, 8 Mbubolya mbwaamba maŋwalu ati,
“Kuti na mwateelela mazwi a Leza bwasunu,
mutazumya myonzo yenu ukoya muciindi cakupapa.”
16 #
Mye 14:1-35
No mbubani bantu bakateelela izwi lya Leza ukumupapila? Sa tabali babo mbaakasololela Mozesi kuhwa mu Ijipiti? 17Ulimwi mbubani mbaakalemanina Leza kwa myaka iili makumi one? Sa tabali babo bantu bakabisha, ubali mitunta yakashaala mulukula? 18No nkukuli bani Leza nkwaakapinga ca bukali ati, “Kwiina nibaya kunjila mukulyoocezha kwangu,” sa tabali babo bakanyansha? 19Twabona ninzho ati bayina nibakenjila nkaambo kabatashomi.
Currently Selected:
Bahibulu 3: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.