Incito 4
4
Pita u Johani Babetekwa Munkuta yaba Juda
1Ciindi Pita u Johani nibakaakucaamba ku bantu, kwakeza bapaizhi u mukando wa balindizhi ba muŋanda ya Leza u ba Saduki. 2Baba bantu bakalemana nkaambo Pita u Johani kabayiisha bantu ukukambauka ati Jeso wakabuka ku bafwu, calo citondezha ati bafwu boonse balakabuka. 3Inzho bakabakwata, mbwaakaakuli mangolezha bakababika muntolongo kulindila ati butaangune buce. 4Pele nikuba bobo, bantu banji banji bakateelela kukambauka kwa Pita u Johani bakashoma. Inzho mweelwe wabalombwana bakashoma wakakomena wakashika afwaafwi ushuulu shosanwe.
5Nibwakaca basololi baba Juda ubakando ba cishi, u balembi bakabungana mu Jelusalemu. 6Mumuswaangano wezo kamuli ba Anasi, wakaakuli ngu mupaizhi mukando u Kayafa u Johani ulimwi u Alekizanda kubicilizha ubamwi bakaakuli ba basazhiina mupaizhi mukando. 7Bakazhimika batumwa babo ku bushu bwabo, bakakanka kubabuzha ati, “No wezu mulimo mwakoocita munsana nzhi na ndizhina lyaani ndimwakasebezha?”
8Inzho Pita, mbwaakaakuzwile Moza Usalala, wakabaingula ati, “Umwe nubeendelezhi u nubakando babantu, 9sa mulatubuzha makani a mulimo mubotu wakacitwa ku muntu wezu mulema, ulimwi u mbwaapona? 10Inzho amuzhibe ceci, umwe antoomwi u bantu bamu Izilaili, wezu mulombwana ulizhimine ano ku bushu bwenu wakapona ukaambo kansana shezhina lya Jeso Kilisito wa Nazanleta. Wezo nguwena ngumwakakankamina a ciciinkano, pele Leza wakamubusha ku bafwu. 11#Inte 118:22Jeso inguwe waambwa mu maŋwalu ati,
“‘Ibwe ndimwakakaka umwe nubazashi,
lyaba ndiibwe lya cooko ca ŋanda lizandika.’
12“Inzho lufwutuko taluyanwa mu muntu uunji, nkaambo kwiina izhina linji ano anshi ndibapelwe bantu kwaamba libafwutule.”
13Nibakabona kubula bukandu kwa Pita u Johani bakazoowa, kwaambisha nibakateelela ati kabali bantu bulyo bayina nibakaliiya pe. Ngoonaawo bakazhiba ati kabali ba shiciiya ba Jeso. 14Cakabakacila kubakazha ba Pita u Johani nkaambo kabamubwenu muntu wezo ngubakaponya kazhimine ngubakaakubele. 15Bakabaambila bulyo ati bamuhwe munkuta. Ngoonaawo babeteshi bakalihwiya. 16Bakaamba ati, “No tubacite buti baba bantu? Nkaambo bantu boonse bakala mu Jelusalemu balizhi kabotu kwaamba aza maleele mbubakaacita, ulimwi tatukonzha kwaakaka pe. 17Pele kwaamba impuwo ya makani aza itazuwa koonse koonse, atubakonge kwaamba kutabi muntu ngubakaambila shezhina lya Jeso.”
18Bamane kulihwiya bakabeta ukubalailila ati, batabi nibaamba linji na kuyiisha mwizhina lya Jeso. 19Pele Pita u Johani bakabaingula ati, “Umwe nubeni amusale na nciciliye cintu ciluleme ku bushu bwa Leza, kuteelela umwe na kuteelela Leza. 20Uswe tatukonzha kuleka kushaamba shitu nshitwakateelela ukulibonena lwesu tubeni.” 21Nibakamana kubweelela kubakonga bakabaleka baya. Cakabakacila kukosola cisubulo cakubapa nkaambo bantu boonse kabatembaula Leza ku cintu ceco cakacitika. 22Nkaambo myaka ya muntu wezo ngubakaponya keebaala ku makumi one.
Bashomi Bakomba Kubula Bukandu
23Nibakalekwa ba Pita u Johani bakabweela kubalongwaabo baya kubakananina ncibakabaambila bakando babapaizhi ubakando ba cishi. 24#Kul 20:11; Neh 9:6; Inte 146:6Bashomi nibakateelela makani azo, bakakomba kwa Leza ati, Muninde Nameese, Chilenga wakalenga izeulu iinshi u lwaatele u shintu shoonse shili mu luundu! 25#Inte 2:1, 2Moza Usalala wakaamba kwiita mwa Taata Devidi musebezhi wako ati,
“Ncinzhi ncibalemanina bakunze?
Nkamboonzhi bantu ncibakanza shintu shabulyo?
26Bami baanshi balibambila,
baleli baswaangana kwaamba
balwe u Mwami Leza, u Munanike wakwe.”
27 #
Lk 23:7-11;
Mat 27:1, 2; Mk 15:1; Lk 23:1; Joh 18:28, 29 “Cini cini ba Helodi u Pontiyasi Pilato bakaswaangana mono mu munzhi, antoomwi u bakunze ulimwi u ba Izilaili, kwaamba bamulwishe Jeso musebezhi wako uusalala wezo nguwakananika. 28Bakabungana kucita shesho uwe nshiwakakanza kale nkwaamba shilaacitika munsana u mu luzando lwako. 29Inzho Mwami bona bolya mbubatukonga, twalomba utupe insana tubasebezhi bako, twaambe makani ako cakutalitibauka. 30Tandabika itashi lyako kwaamba ubaponye bantu ulimwi upe kwaamba maleele u shitondezho shizoosha acitwe mwizhina lya Jeso musebezhi wako uusalala.”
31Inzho nibakamana kukomba, abusena awo ngubakaakubungene akazungaana. Boonse bakenjilwa Moza Usalala, ngoonaawo bakakanka kwaamba mazwi a Leza cakutalitibauka.
Bashomi Bakabika Lubono Antoomwi
32 #
Inc 2:44, 45 Bashomi banji banji kabakala ca monzo womwi u moza womwi. Kakwiina muntu wakaakwaamba ati ceci cintu ncangu ndimwini, pele umwi uumwi kapa nshaakwete kwaamba shibe shabashomi boonse. 33Insana inkando sha Leza shakabasololela batumwa, bakapa bumboni bwa kubuka kwa Mwami Jeso ku bafwu, ulimwi luse lukando lwakabaselucila. 34Kakwiina muntu akati kabo wakaakupenga cintu. Babo bakaakukwete myuunda naaba maanda, bakauzha ukuleta mali ngubaakuyana. 35Azo mali kapewa ku batumwa, abo bakaakwaabanya akati ka bantu kwiingaina iipenzhi lya muntu umwi uumwi.
36Inzho kakuli muntu umwi wakaakutewa ati Jozefu wa luhubo lwa Levi wakazhalilwa ku cishi ca Saipulasi, wezo ngubakaulika batumwa ati Banabasi, nkukwaamba ati Shikuzumya zumya. 37Aze mbubona bobo wakauzha muunda ngwaakaakukwete amane waleta mali ku batumwa.
Currently Selected:
Incito 4: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.