2 Samweele 2
2
Devidi Waba Mwami wa Juda
1Nichakamana chechi, Devidi wakabuzha kwa Yaahwe, “Sa ndize kuya mu munzhi mukando uli woonse wa Juda?” Yaahwe wakamwiingula ati, “Koya liza.” Devidi wakabuzha ati, “Nje ku munzhi uliye?” Yaahwe wakamwaambila ati, “Ku Hebuloni.” 2Ubobo Devidi wakaliza kuya koko, antoomwi u benakwe bobile (2), Ahinowamu Mujezileelu u Abigelo mukamufhu waka Nabali Mukalimelu. #1 Sam 25:42, 43 3Devidi wakaliza u bashikalumamba mbuchakaakulyaabo, umwi wuumwi u baŋanda yakwe, bakakala mu minzhi mishoonto ya Hebuloni. 4Balombwana ba ku Juda bakeza, koko nkubakamunanika Devidi kuba mwami waŋanda ya Juda.
Lelyo nibakamushimwina Devidi ati, “Ubakamuzhika Saulu, mbalombwana ba ku Jabeshi Gileyadi,” #1 Sam 31:11-13 5Devidi wakatuma batumwa ku balombwana ba ku Jabeshi Gileyadi u kubaambila ati, “Mulilongezhelwe kwa Yaahwe, nkaambo mwakatondezha luse luteeli kwa Saulu shimatwangeenu u kumuzhika. 6Iinzho Yaahwe atondezhe luse luteeli u lushomo kulyuumwe. Ume ndakachita chibotu kulyuumwe nkaambo kachintu chechi nchimwachita. 7Iinzho ubobo mutafhwi bukandu, amuzume, nkaambo Saulu shimatwangeenu wafhwa, ulimwi baŋanda ya Juda bananika ume kuba mwami wabo.”
Ishi Bosheti waba mwami wa Izilaili
8Pele Abineli mwanakwe Nelu, musololi wa bashikalumamba baka Saulu, wakatola Ishi Bosheti mwanakwe Saulu u kumuleta ku Mahanaimu, 9wakamubika kuba mwami wa Gileyadi, Baashuli, Jezileelu, Efulaimu, Benjamini u Izilaili yoonse. 10Ishi Bosheti, mwanakwe Saulu kakwete myaka makumi one (40) naakakanka kulela Izilaili, wakalela kwa myaka yobile (2). Pele iŋanda ya Juda yakachilila Devidi. 11Iinzho Devidi kali mwami mu Hebuloni u kulela iŋanda ya Juda kwa myaka chiloba (7) u myezhi chisambomwi (6).
Inkondo akati ka Bashikalumamba Bakando: Abuna u Jowabu
12Abineli mwanakwe Nelu u batwanga baka Ishi Bosheti mwanakwe Saulu, bakahwa ku Mahanaimu u kuya ku Gibeyoni. 13Jowabu mwanakwe Zeluiya u batwanga baka Devidi bakaya kubaswaanganya ku chizhiba cha Gibeyoni. Bamwi bakakala kuluya lomwi lwa chizhiba, abo bamwi kuluya lumwi. 14Abineli wakaambila Jowabu ati, “Baleke bana bakubushi bazundane kumbele lyesu.” Ngoona Jowabu wakahumina ati, “Abazundane.” 15Ngoona bakazhimuka u kubalwa, bana bakubushi ikumi u bana bakubushi bobile (12) baka Benjamini u Ishi Bosheti mwanakwe Saulu, ulimwi batwanga ikumi u batwanga bobile (12) baka Devidi. 16Umwi wuumwi wakakwata nguchizundanaaze mwisusu u kumuyasa icheba mu chiteku, ubobo boonse bakafhwa antoomwi. Busena bobu buli kumbali ku Gibeyoni, bwakatewa ati Helikati-hazulimu.#2:16 Helikati-hazulimu chaamba ati muunda wa macheba 17Bobo buzuba, lumamba lwakakomena chini-chini. Abineli u balombwana ba Izilaili bakaumwa kumbele lya batwangaakwe Devidi.
18Banakwe Zeluiya botatwe (3) kabaliko koko, Jowabu, Abishayi u Asaheli. Iinzho Asaheli kafhwamba ku lubilo ukoya nakafhwifhwi. 19Asaheli wakatandaanya Abineli, lelyo nakaakulukanka, kataleyi ku chilyo na ku chimonsho kuchilila Abineli. 20Ngoona Abineli wakachebuka kumanuma akwe u kubuzha ati, “Sa ndiwe Asaheli?” Wakamwiingula ati, “Eyee ndime.” 21Abineli wakamwaambila ati, “Nyonena kuluya lwa chilyo na lwa chimonsho chako, kwaamba ukwate mwana mukubushi womwi, wamana umunange shilwisho shakwe.” Pele Asaheli wakaka kuleka kumuchilila. 22Abineli wakamwaambila alimwi Asaheli ati, “Nyona, leka kunchilila. Nkaamboonzhi nchinkakuyaila? Mbubuti mbunkaamulanga a menso Jowabu munyoko?” 23Pele wakakaka kunyona. Ubobo Abineli wakayasa yiisumo lyakwe mwifhu cha kwaamba lyakapola munuma. Asaheli wakawa awo ngoona u kufhwa. Boonse babo bakeza abusena awo ngaakafhwila, bakaakuzhima nchi!
24Pele Jowabu u Abishayi bakamutandaanya Abineli. Kuya kumabililo ezuba, bakashika ku mulundu wa Ama, wezo uli kunzhila yiiya kwisokwe lya Gibeyoni kutana kushika ku Giya. 25Bantu ba Benjamini bakabungana antoomwi kumanuma aka Abineli. Bakaba inkamu yomwi ulimwi bakazhima ezeulu a mulundu. 26Ngoona Abineli wakoompolola Jowabu ati, “Sa icheba lilaakuyaya shikwense? Sa twizhi ati mamanino alakabiya? Anu chilatola chiindi chilamfhu buti kutana kubaambila bantu bako kuleka kutandaanya banyokwabo?” 27Jowabu wakamwaambila ati, “Mbubona Leza mbwaali mumi, kuti na niwataamba, nchobeni balombwana nibataleka kutandaanya banyokwabo kushikila chifhumo-fhumo.” 28Ubobo Jowabu wakalizha mweembo, boonse balombwana bakazhima, bakachileka kutandaanya Izilaili linji, nikuba kulwa linji.
29Abineli u balombwana bakwe bakeenda mashiku oonse kwiita mu Alaba. Bakalanduka mulonga wa Joodani, ulimwi bakeenda mafhumo-fhumo oonse, bakeza ku Mahanaimu. 30Jowabu wakapiluka kuhwa kutandaanya Abineli. Lelyo nakababunganya bantu boonse antoomwi, kwakayanwa kuhwa ku batwangaakwe Devidi, balombwana bali ikumi u balombwana ifhuka (19) tabewo, kukusha Asaheli. 31Pele batwangaakwe Devidi kabayaile bantu ba Benjamini bali myaanda yotatwe u makumi chisambomwi (360), ba balombwana baka Abineli. 32Bakooliza mutunta waka Asaheli u kuuzhika mu chuumbwe chaka ushi, chakaakuli ku Betelehemu. Jowabu u balombwana bakwe bakeenda mashiku oonse, izuba lyakabahwila ku Hebuloni.
Bible Society of Zambia