Nùb róòm 4
4
Túúm ə́ə́m Àbɨ̀ràhâm ya du ɓe kíí
1Ɗàrò, ní á nɨ́m ɓa nyìnnɨ ɓe ɨ́r Àbɨ̀ràhâm tákɨ̀r nɨ́mè ndùtì ndútí? Ní á ŋgə́ yi kwa ɓe nyòm ŋgə́ nɨ̀mɨ́rí? 2Ɓè Àbɨ̀ràhâm yi sei nò ɗɨ́ɗɨ̧́ ɓe nɨ́ɨ́b ŋgə́ yi ndɨŋndé, yaá sàmàìn ŋgə́ á síhé, ɨ́dù nɨ Mèèín tíí sé. 3Ɓetí káàtà Mèèín á wáànɨ ɨnè: «Àbɨ̀ràhâm ya səŋtɨ́ gíí ɓe Mèín, ɗà Mèín ɨ́ â ŋgə́ nò ɗɨ́ɗɨ̧́ ɓe àm ə́ə́m nó kíì.» 4Nò éí ə́ré, kùb a njáblè ŋgə́ mwèìn nóò. Mwèìn kɨ́ nɨ nyər sé, du nɨ nɨ́m du ɗúnɨ kùb nà ŋgéé á. 5Ɨ́dù, nò kù ɨ́ dù nɨ́ nɨ́m kù éíwa, ŋgə́ ɨ́ sə̀ŋɗóò nɨ́ gíí ɓe Mèín nò du ndɨ̀ŋnɨ cɨcóm sèì nò ɗɨ́ɗɨ̧́ɨ̧́, Mèín góom nɨ ə́ə́m nò kɨ́ du ɓe kíí á, ŋgə́ a ndɨ̀ŋ nò kɨ́ sèì nò ɗɨ́ɗɨ̧́ ru. 6U̧ á ɓwê Dàvît du nyìnnɨ ɓe ɨ́r mɨ̀tù nò Mèín á nɨ́ nò ɗɨ́ɗɨ̧́ ŋgə́ góòmwá nɨ́m nò kɨ́ yi ndɨŋndé rɨ.
7«Mɨ̀tù á ɓe nùb Mèín du góòmnɨ íí cuum ŋgábè ya ɗàwáá,
ŋgáb nùb Mèín ákɨ́na cumí.
8Mɨ̀tù á ɓe nò Kéké du árénɨ cuum noò ɓɔ̧ɔ̧ ɗàwáá!»
9Dɨmɨɨr kɨ́ duna nɨ nùb lə́ ndɨ̀ɨ́ ɓe nùb ndɨ̀ lə́waá cúk á. Nɨ́m tahaá hò̧ ɨnayâna «Àbɨ̀ràhâm, ɓe ə́ə́m ŋgə́ ya du ɓe kíí, Mèín ɨ́ â ŋgə́ nò ɗɨ́ɗɨ̧́ ye?» 10Nɨ́m kɨ́ ya ndɨŋ ɓwâ ŋge? Cùr Àbɨ̀ràhâm ya lə́ ndɨ̀ɨ́ kèè, ŋgə́ ndɨ̀ lə́yèwá? Nɨ́m kɨ́ yi ndɨŋ nɨ ŋgə́ ndɨ̀ lə́ɓàyèwá á! 11Cùrì ɓàcɨ̀ ɗoróó á Àbɨ̀ràhâm lə́gɨ nɨ́ ndɨ̀. Yɨɨ́m lɨ̀m túmnɨ ɨnayâna, ŋgə́ ndɨ̀ lə́ɓàyèwá, Mèín yi ácií nɨ́ ŋgə́ nò ɗɨ́ɗɨ̧́ àm ə́ə́m ŋgə́ ya du ɓe kíí yáá na á. Hȩ dùnɨ u̧nèé, Àbɨ̀ràhâm du ŋgwé nùb lâs ə́mne Mèín u̧ kɨ́ ŋgáb ndɨ̀ lə́yèwáá á, Mèín á cè ŋgáb ánɨ nùb ɗɨ́ɗɨ̧́. 12Àbɨ̀ràhâm duɓwée ŋgwé nùb lə́cɨ bɨ́ ndɨ̀ɨ́ á. Kí ta nùb lə́ bɨ́ ndɨ̀, ɨ́ dùɓwê bɨ́ tùnɨ guur gùrí tákɨ̀r nɨ́mè Àbɨ̀ràhâm ɓwâ ŋgə́ ya du ndɨ̀ lə́ɓàyèwáá á.
Ɓwáár Mèèín duna nùb lâs ə́əmndé á
13Mèín ya ɓwáínaá Àbɨ̀ràhâm ɓe nyȩrɨ́b noò ɨnayâna ɗɔ̀ɔ́b kwá ók ɓe ŋgáb. Ɓwáár kɨ́ yi nɨ́ àm Àbɨ̀ràhâm ya jəŋ ɓíì Mòyíìs nɨ sé, yi nɨ́ àm Mèín yi á nɨ́ ŋgə́ nò ɗɨ́ɗɨ̧́ ɓe àm ə́ə́m ŋgéé rè á. 14Tɨ tàyè nyɔ̧ɔ̧́ yi du ɓwánne ókhó̧ɗóo nɨ ɓe nùb jəŋ ɓíì Mòyíìs á na, ə́ə́m yè nɨ́ nɨ́m sam á, ɓwáár Mèèín a dùcè nɨ́ ɓe dɨmɨɨr dùr. 15Ɓetí ɓíì á ndɨ̀ŋnɨ Mèín ók njù̧. Ɨ́dù yɨ́ ɓíì du ɗàwáá, ɓə̀ré ɓíhì cè nɨ́ ɗàà.
16Hȩ dùnɨ u̧nèé, ɓe ə́ə́m á kùb fɨ́tɨ kwànɨ nɨ́m Mèín ya ɓwállé ru, duce nɨ́ nyər ŋgə́ naɓa samí á. Àm kɨ́ á du hàrák ɨnayâna nyȩrɨ́b Àbɨ̀ràháàm lâs kwàɓwê nɨ́m Mèín ya ɓwállé ru. Nɨ tàhó̧ɗóòwá nùb ɓíì du kɨ́niì, duɓwée nɨ ɓe nùb du ɓe ə́ə́m hȩ kɨ́ Àbɨ̀ràhâm tákɨ̀r nɨ́m lâs ya du ɓe kíí á. 17Káàtà Mèèín wáatɨ́ ɨnè: «Mɨ ndɨŋtɨ́ wu dù tákɨ̀r gbàŋ bɨ ví̧ne.» Àbɨ̀ràhâm ɨ́ du tá nɨ́mè, Mèín nò ŋgə́ ya ə́əmndé tíí ru. Mèín du nàcùnɨ nɨ̀kwííb mè, ŋgə́ a ndɨ̀ŋ nɨ́m du ɗàwáá sə̀mte. 18Ɓwâ ya kɨ́ sə̧̀ə̧́ gírí yi nɨ́ ɗàɓàcɨ̀wá, ɨ́dù Àbɨ̀ràhâm ɨ́ sə̀ŋ nɨ́ gíí, ŋgə́ ɨ́ ə́mnè Mèín, á ŋgə́ sei tákɨ̀r gbàŋ bɨ ví̧ne, ɗóhîn ɓe nɨ́m Mèín ya tana ŋgə́ ɨnè: «Nyȩrɨ́b woò kwá ví u̧» na rè. 19Àbɨ̀ràhâm yaá cɨ̀ ɓe dáín sàmàìn təmərì. Ŋgə́ yaá lə́ə̀mnɨ hȩ ní ducɨ gbòkjòk, gwi níì Sárà cè nɨ́ sàmàìn feincɨ muní ɗàwáá. Dugɨ nɨ́ u̧, ə́ə́m nóò ɨ́ dù nɨ́ gókwa. 20Ŋgə́ yi nɨ́ sə́ndɨ̀wá ɓwáár Mèín yi ɓwáína ŋgéé, ə́ə́m nóò yi nɨ́ gùwá, ə́ə́m nó kɨ́ yi taamnaɓacéyetɨ́ ŋgə́ njɔ̧̀, ŋgə́ ɨ́ yà mgbíìnɨ Mèín. 21Ŋgə́ yi ɗəəŋɓatɨ́ ɨnayâna nɨ́m Mèín ɓwáí ndɨ̀ŋniì, ŋgə́ á ɓe nyòm ndɨŋ nɨ́m kíì. 22Àm kɨ́ á, Àbɨ̀ràhâm, ɓe ə́ə́m ŋgə́ ya du ɓe kíí «Mèín yi á ŋgə́ nò ɗɨ́ɗɨ̧́». 23Ɨ́dù, «Mèín yi á ŋgə́ nò ɗɨ́ɗɨ̧́» na rè, kùb yi bɨ́ tɨ̀ìnɗóòwá ɓe ɨ́r Àbɨ̀ràháàm mwi̧í̧, 24kùb yi tɨinɓwée bɨ ɓe ɨ́r nɨ́m nùb du ɗúnɨ Mèín á nɨ́m hȩ nùb ɗɨ́ɗɨ̧́ rè á, nɨ́m nùb du ə́ə̀mnɨ nò ya səəmcuhó̧ Yésù nò du Kéké nɨ́mè mvókín nɨ̀kwíbí rè. 25Mèín ya kaikíí ŋgə́ ɓe ɨ́r cuum nɨ́mè, àm ndɨŋ nɨ́m sèì Mèèín íhín nùb ɗɨ́ɗɨ̧́ɨ̧́.
© 2007 Alliance Biblique du Cameroun, B.P. 1133, Cameroon