Nùb róòm 13
13
Jəŋnáam nùb ge tií
1Nò lâs jə̀ŋ nùb ge tií, ɓetí Mèín ya tómwo nɨ́ ŋgáb lu, ŋgə́ ɨ́ ɗobce ŋgáb ə́r kɨ́ ru. 2Nò kù ɨ́ sàkkî nɨ́ nùb ge tií, ŋgə́ sakkɨ́ nɨ́ nɨ́m Mèín ta ndɨ̀ŋte á. Nùb ndɨŋce bɨ́ sàkɨ̂ɨ́ u̧nèé, ŋgáb nɨ̀miib naré bɨ́ ŋgwìn Mèèín só á. 3Nùb ndɨŋ nyɔ̧né bɨ lùnɨ nùb ge tií ɗàà, nùb ndɨŋ ɓáŋhɨ́nne ɨ́ du bɨ́ ŋgáb lùnɨ ru. Wu ɨ́ dù wú dùnɨ ɓéìn ɓéìn ɓe nùb ge tií, ndɨŋ wu nyɔ̧ɔ̧́, ŋgáb ɓa wu kúùmnɨ á. 4Ɓetí ŋgáb ə́nna bɨ Mèín á, kpɔ́knɨ wu wu ndɨ̀ŋ nyɔ̧ɔ̧́. Ɨ́dù wu ɨ́ dù wú ndɨ̀ŋnɨ ɓáŋhîn, lu wu ŋgáb, ɓetí nɨ sam sé ŋgáb du ɓe nyòm túmnɨ kùb jábɨ́rí. Ŋgáb ə́nna bɨ Mèín á, àm túumna nùb ndɨŋ ɓáŋhɨ́nne njùŋ Mèín du ɓe kíí. 5Àm kɨ́ á du nyɔ̧ɔ̧́ kùb jə̀ŋ nùb ge tií. Nɨ tàwá jə̀ŋɗóò ŋgáb àm Mèín tɨ̀ ók njù̧ú̧, ɨ́dù duɓwée nɨ àm njɔ̧̀ nɨ́mè du nɨ́m tànànɨ á nyɔ̧ɔ̧́ kùb ndɨ̀ŋ u̧ na rè á.
6Àm kɨ́ á nyí duɓwée njáàbnɨ làmpô ru, ɓetí nùb du bɨ́ ə́nnɨ ə́r ɓáhèé làmpóò ə́nnanyaaŋɓa bɨ Mèín á. 7Ndɨŋnanáam nùb lâs nɨ́m du ɗúnɨ nyí ndɨ̀ŋnà ŋgábè: duú làmpô, njáabnáam. Gómnà tàgɨ̀ nyí nà mwèìn nɨ́m kù, nanáam. Jəŋnáam nò du ɗúnɨ nyí jə̀ŋte, nyí a dɨ̀ɨ̀mcè nò du ɗúnɨ nyí dɨ̀ɨ̀mte.
Nɨ́m ɗúná kùŋ mwin yàá
8Nyí nɨ ɓe nyamandì só dùr. Nyamandì nyínè sóò dùhá kɨ́ du ɗúnɨ nyí dù ɓe ɗûnɨ́m mvókín nyínè noò. Nò ɗú kùŋ mwin yàá jəŋɓatɨ́ nɨ́ nɨ́ɨ́b lâs ɓíì ta ndɨ̀ŋte. 9Ɓetí ɓíì du tànɨ wu wu mààŋ ndɨ̀ŋ, wu wu ŋgwé kwíhɨ̀r, wu yúk yɨ̂r, wu nɨ́m kùbè súnɨ̀r rè, ɓe kɨ́b kù lâs ɗoŋwo kɨ́ mwi̧ du tànɨ: «Ɗúum kùŋ mwin yàá woò hȩ wu ɗú síí wu nɨ̀mɨrí» rè ya á. 10Nò du ɗúnɨ kùŋ mwin yàá sàmàìn ndɨŋ kùŋ no kɨ́ ɓáŋhɨ́nne ɗàà. Ɓe ɗûú kùŋ mwin yàá á kùb du jə̀ŋɓànɨ nɨ́ɨ́b lâs ɓíì ta ndɨ̀ŋte ru.
Dunáam nyaaŋkí̧i̧ ɓwâ Krístù ɓa cùwòniì
11Nyí ɗəəŋtɨ́ mvókín nɨ́m du nó ɗàròò; ɗú nyí sə̀mnɨ̀ wum á ɓetí ɓə́r á cɨ̀ nɨ ɓe nɨ́m ɗàrò kə́sə́k ndóóŋ nɨ́ ɓwâ nɨ́m ya yaré ə́mní. 12Á hȩ sɨ́mnɨ̀r gɨcií nɨ́, ye á cè ŋgóòbwònɨ rɨ u̧. Nɨ́m mbɨ́kná ə́rɨ́b sɨ́mnɨ̀rí, nɨ́m a ə́ə̀ŋnáà ə́ə́ŋ sɔk mwahɨ́nné. 13Nɨ́m gèná ɓà ɗɨ́m juu hàrák, hȩ du ɗúnɨ dù mwahɨ́nné. Nɨ́m gə́tɨ̀ná ɓe tɔ̧̀, ɓe mɨɨr, ɓe ŋguùŋ du nànɨ sə̀réé, ɓe ndɨ̧̀ɨ̧́ nɨ́m du hàrák ɗàwáá, mɨ̀ndárɨ̀b, ɓe ɓi̧í̧. 14Ánáam nɨ́ɨ́b lâs Yésù Krístù nò du Kéké nɨ́mè du nɨ́m nàniì, nyí a kàŋhȩ̀ síí ɓe kí. Nyí nɨ mɨ̀lə́m nyí nɨ̀mibi ŋgáŋ nyí ya mbɨ́kcɨ̀r.
© 2007 Alliance Biblique du Cameroun, B.P. 1133, Cameroon