Nùb róòm 10
10
1Mwin yàá bɨ ə́mní, nɨ́m mɨ du ɗúɓànɨ, mɨ duce ɓwèìnɨ Mèín ɓe ɨ́r Jwîf ɓoò á ɨnayâna Mèín ɓátɨ̀ ŋgáb. 2Á sàmàìn mɨ taɓa wááŋ ɓe ɨ́r Jwîf bɨ ɨnayâna ŋgáb á ɗúɓànɨ àm Mèèín, ɨ́dù kɨ̀cáàb ɗûú Mèèín ŋgábè kɨ́ nɨ hàrák ɗàà. 3Ɓetí ŋgáb bɨ ɗə̀ə̀ŋwá i̧ á Mèín du ndɨ̀ŋnɨ nɨ̀vɨ́tè sèì no tíí nò ɗɨ́ɗɨ̧́. Ŋgáb nɨ̀miib ya ta vúm yè kwaháá kɨ̀cáb vúm fɨ́tɨ ndɨ̀ŋnɨ vúm a dù Mèèín tíí nùb ɗɨ́ɗɨ̧́ɨ̧́. Ɓe ndɨ̧̀ɨ̧́ u̧nè kɨ́ á ŋgáb mvú jə̀ŋnɨ nɨ́m Mèín yi ta ndɨ̀ŋtɨ àm nɨ̀vɨ́tè a dù nò ɗɨ́ɗɨ̧́ɨ̧́ ru. 4Ɓetí Krístù ndɨŋtɨ́ ɓíì Mòyíìs kɨ́k ŋgwé, àm nùb ə́əmndé lâs a dù ɗɨ́ɗɨ̧́ Mèèín tíí.
Ɓə́r duna nò lâs ə́mne Kékéé á
5Nɨ́m Mòyîs yi tɨin ɓe ɨ́r ju ɗɨ́ɗɨ̧́ kùb fɨ́tɨ dùnɨ Mèèín tíí ɓè kùb jəŋ ɓíhì á ɨnè: «Nò ndɨŋ nɨ́m ɓíì ta ndɨ̀ŋte ɓa ɓáínɨ ɓe ɓíì kɨ́ á.» 6Ɨ́dù nɨ́m du ta̧á̧ ɓe ɨ́r ju ɗɨ́ɗɨ̧́ kùb fɨ́tɨ dùnɨ Mèèín tíí àm nò kɨ́ du ɓe ə́mní á ɨnè: «Wu wu lə́mnɨ̀r wu a tà: na ɨ́ ɓaye wúínɨ ɓɨllin?» (Kí ta: gìnɨ ɓésówònɨ Krístù na á). 7Wu wu lə́ə̀mɓwéhɨ̀r wu a tà: «Na ɨ́ ɓaye lénɨ ko̧ó̧?» (Kí ta gìnɨ ɓécùhó̧nɨ Krístù mvókín nɨ̀kwíbí na á). 8Á hà ta̧á̧ ɨnè ye: «Kìn á ɗàrɨ́, á wó ɓɔ̧ɔ̧, á cè wó sumí». Kìn kɨ́ du kìn du ɓe ɨ́r ə́mní nɨ́m du ɓéènɨ rè á. 9Wu ɨ́ tàhó̧ɓà wo ɓɔ̧ɔ̧ nɨ̀vɨ́tɨ̀b lâs tíí ɨnayâna Yésù ɨ́ du Kéké, wu ɨ́ ə́ə̀mcè wo sumí Mèín ya səəmcuhó̧ó̧ ŋgə́ mvókín nɨ̀kwíbí, wu ɓa ɓáínɨ á. 10Ɓetí nò ə́əmɓa no sumíì, Mèín ɓa ndɨ̀ŋnɨ nò kɨ́ sèì no tíí nò ɗɨ́ɗɨ̧́ á, nò tahó̧ɓace no ɓɔ̧ɔ̧ Yésù Kéké á rɨ, Mèín ɓa ɓátɨ̀nɨ nò kɨ́ á. 11Káàtà Mèèín á wáàɓàcéyènɨ ɨnè: «Nò lâs ə́mne ŋgéé nɨ njɔ̧̀ lòm.» 12Hȩ dùnɨ u̧nèé, gɔ̀ nɨ mvókín Jwîf ɓe nùb du Jwîf séé no ɗàwá, ŋgáb á lâs ɓe Kéké mwi̧, du nànɨ nò lâs kɨ́ŋɓé ŋgéé nyɔ̧ɔ̧́ noò. 13Ɓetí káàtà Mèèín á wáànɨ ɨnè: «Nò lâs kɨ́ŋɓé Kékéé ɓa ɓáínɨ á.»
14Ɨ́dù i̧ á cè ŋgáb ɓa ŋgə́ kɨ́ŋɓénɨ, ɓè ŋgáb du bɨ́ ŋgə́ ə́ə̀mwáá? I̧ á cè ŋgáb ɓa ŋgə́ ə́ə̀mnɨ ɓè ŋgáb du bɨ́ ókwa kùb nyìnnɨ àm noò? I̧ á cè ŋgáb ɓa óknɨ àm noò ɓè kùb du ŋgáb ɓéènàwáá? 15I̧ á cè kùb ɓa ɓéènɨ kìn kɨ́ ɓè tɨ́kɨ̀nɨ́b du bɨ́ ɗàwáá? Hȩ káàtà Mèèín du wáànɨ ɨnè rè: «Gwɨ̀ì kùb gewo kìn nyɔ̧ɔ̧́ rè duɓa nɨ́m nyɔ̧ɔ̧́ á.» 16Ɨ́dù nɨ nùb lâs ya ók ɓéhèé Kìn Nyɔ̧né sé ya ə́mne. Èsáyà taɓacéyeé ɨnè: «Kéké, nɨ nùb lâs sé ə́mne Kìn nɨ́m ɓéeré.» 17Hȩ dùnɨ u̧nèé, ə́ə́m ɗoŋwo nɨ ô kùb ók Kìn Nyɔ̧né ya á. Kìn Nyɔ̧ɔ̧́ duce nɨ́ àm Krístùù kùb du ɓéèniì á.
18Ŋgáb ma ɗú tànɨ vúm ya bɨ́ Kìn Nyɔ̧ɔ̧́ kɨ́ ókwa á hàye? Ŋgáb ya ókɓagií. Káàtà Mèèín á wáànɨ ɨnè:
«Kùb ya óktɨ́ kúu ŋgábè ɗɔ̀ɔ́b lè bɨ̂ŋ,
nyindí ŋgábè ɓɔ̧ne ɨ́ féìn há̧á̧ ndúkín ɗɔ̀bí.»
19Kí du gbàŋ Ísràyéèl ɗúɓwée tànɨ ɨnayâna ní ya nɨ́ ókwa kúu ŋgábè kɨ́ á hàye? Duú kɨ́ pìí fɔ́ kíì, tíí yàyè, Mòyîs ya taá ɨnayâna Mèín taá ɨnè:
«Mɨ á ndɨ̀ŋnɨ nyí ɓə̀ndɨ̀ nùb du bɨ́ tɨb àmiib séé.
Mɨ ɓa ə́tɨ̀nɨ njùŋ nyínè ɓe ɨ́r tɨb du ɓe kɨ̀cáàb ɗàwáá á.»
20Èsáyà wáatɨ́ ɨnayâna Mèín taá ɨnè:
«Nùb yi du bɨ́ mɨ mánɨ ɗàwáá ɨ́ kwa bɨ́ mɨ ru.
Nùb yi du bɨ́ mɨ nɨ́m kù fɔ́nɨ ɗàwáá, mɨ nɨ̀mɨ́r ɨ́ túùmnà ŋgáb síí.»
21Ɨ́dù ɓe ɨ́r gbàŋ Ísràyéèl, ŋgə́ taá ɨnè:
«Ye lâs, mɨ ya yaamnaá nɨ̀vɨ́tɨ̀b ŋgáár,
mɨ ya yaamna gbàŋ ya du ɓe sàkɨ̂ɨ́, ya duɓwée ŋgwé ɓáŋhɨ́nne á.»
© 2007 Alliance Biblique du Cameroun, B.P. 1133, Cameroon