Mairk 15

Jesus up afore Pilate

1At tha scraich o day, tha heid preeshts got thegither wi tha eldèrs an maistèrs o tha Laa, an tha hale Cooncil#15.1 The' caad ït tha “Sanhedrin” taakt aboot whut the' wud dae nixt. The' tyed Jesus up an maircht hïm aff, an hannit hïm ower tae Pilate. 2An Pilate axt hïm, “Ir you tha Kïng o tha Jews?” Jesus answert, “You hae saed ït.” 3An tha heid preeshts brocht forrit monie chairges agin hïm, [but he niver saed a wurd bak.] 4Sae Pilate axt hïm agane, “Ir ye no fer sayin ocht? Whut aboot aa these chairges brocht agin ye?” 5But whaniver Jesus wud say naethin mair, Pilate wus quare an tuk bak.

6Noo iverie yeir at tha Passower Faist, Pilate uist tae let yin o tha prisners oot, whaiver tha fowk axt fer. 7Yin o thaim at tha time, a man bi tha name o Barabbas, wus ïn fer murdèr alang wi ither rebels frae tha Risin agin tha Romans. 8Tha thrang gaed up an the' axt Pilate tae let a prisner oot, as he aye daen yinst a yeir. 9Pilate axt thaim, “Dae yis want me tae let oot tha ‘Kïng o tha Jews?’ ” 10Fer he knowed richt weel ït wus jist oot o spite that tha heid preeshts haed hannit Jesus ower tae hïm. 11But tha heid preeshts egged tha thrang on tae say, “Na, no Jesus! Let Barabbas oot!” 12“Sae whut wull A dae then wi tha yin yis caa ‘Kïng o tha Jews’?” axt Pilate agane. 13“Crucyfie hïm!” the' cryed oot. 14“Whut fer? Whut's he daen wrang?” Pilate axt thaim. But tha thrang jist roared aa tha mair, “Crucyfie hïm!” 15Noo, Pilate wus wantin tae plaise tha crood, sae he lut Barabbas oot tae thaim. He haed Jesus gien a guid whalin wi a whup, an then he hannit hïm ower fer tae be crucyfied.

Tha sodgers mock Jesus

16Tha sodgers tuk Jesus awa tae tha coortyaird o tha Guviner's Bïg Hoose#15.16 tha Praetorium , an the' brocht thegither tha hale regiment. 17An the' rigged hïm oot ïn a purple robe, an the' plettit thoarns thegither ïntae a croon an the' püt ït on hïs heid. 18An the' begoud tae salute hïm, cryin oot, “Lang leeve tha Kïng o tha Jews!” 19The' hut hïm ower tha heid agane an agane wi a stav, an sput on hïm. The' got doon on thair knees afore hïm an lut on tae woarship hïm. 20An eftèr the' haed daen makkin a mockerie o hïm, the' tuk tha purple robe aff hïm, an püt hïs ain claes bak on, an tuk hïm oot fer tae crucyfie hïm.

Tha crucyfixion

21Thair wus thïs man the' caad Simon frae Cyrene, tha faither o Alexander an Rufus, makkin hïs wye ïn frae tha kintrie. An the' gart hïm tae cairrie tha cross. 22An the' brocht Jesus tae a place bi tha name o Golgotha, mainin “Tha Place o tha Skull.” 23Then the' püt wine mixt wi myrrh tae hïs mooth, but he wudnae tak ït. 24An tha sodgers nailt hïm tae tha cross. Then the' divïd hïs claes amang thaim bi cloddin dice, tae see wha wud get whut.

25It wus nine ïn tha moarnin whaniver the' crucyfied hïm. 26An the' püt a signboord abain hïm wi tha chairge, “THA KING O THA JEWS” writ on ït. 27The' crucyfied twa robbers alang wi hïm, yin on hïs richt han side, an tha tither on hïs left. 28[An sae ït cum aboot laik tha Scrïptures saed aforehan: “He wus coontit amang tha laa brekkers.”] 29Thaim at waakt bye yellt abuse at hïm, shakin thair heids an sayin, “Hey you, ye saed ye wur gaun tae desthroy tha Hoose o God, an big ït agane ïn thrie days, 30sae cum doon aff that cross noo an save yersel!” 31In tha same wye tha heid preeshts an tha maistèrs o tha Laa mockt hïm an saed amang thairsels, “He saved ithers, but he cannae save hissel. 32Thïs Christ, thïs kïng o Israel, shud cum doon aff that cross noo! Then we'll believe!” An tha twa that wus crucyfied alang wi Jesus hurlt abuse at hïm forbye.

Tha Deith o Jesus

33An dairkness cum ower tha hale lan frae nuin tae thrie ïn tha eftèrnuin. 34An jist then, Jesus gien a lood cry, “Eli, Eli, lama sabachthani,” mainin, “Ma God, ma God, why hae ye forsook me?” 35An some o tha yins stannin nearhan heerd thïs an saed, “Lïsten, he's caain oot fer Elijah!” 36Yin o thaim run an wat a sponge wi soor wine, püt ït on a lang stïck, an hel ït up fer Jesus tae drïnk. “Lea hïm alane an we'll see ïf Elijah cums tae tak hïm doon,” qo he. 37An wi anither lood cry Jesus gien hïs last breath. 38Tha curtin ïn tha Halie o Halies wus tore ïn twa frae tap tae bottom. 39An whaniver tha centurion#15.39 Tha yin ïn chairge o a hunnèr Roman sodgers. that stud fornent Jesus heerd hïm cryin oot an saen tha wye he deed, he saed, “Thair can be nae doot; thïs man wus tha Sinn o God!”

40Some weemen wus stannin awa bak takkin ït aa ïn; amang thaim wus Mary Magdalene, an Mary tha mither o young Jeames an o Joses, as weel as Salome. 41These wur tha weemen that uist tae follae Jesus an luk eftèr hïm whaniver he wus bak ïn Galilee. An monie ither weemen that haed cum up wi hïm tae Jerusalem wur thair forbye.

Jesus ïs buriet

42It wus Preparation Day - tha day afore tha Sabbath. Sae, as ït wus wearin on tae evenin, 43Joseph o Arimathea, a man weel up ïn tha Cooncil, wha wus waitin on tha Kïngdom o God hissel, tuk hïs courage ïn hïs hans, an he went up tae Pilate fer tae ax fer tha bodie o Jesus. 44Pilate wus fair tuk bak whan he heerd that Jesus wus aareadie deid. He caad tha centurion an axt hïm wus that richt. 45Whaniver he heerd frae tha centurion that Jesus wus aareadie deid, he lut Joseph hae tha bodie. 46Sae Joseph bocht some lïnen claith, tuk doon tha bodie, happt ït ïn tha claith, an layed ït ïn a tomb cut oot o tha roak. Then he rowlt tha stane agin tha apenin o tha tomb. 47An Mary Magdalene, an Mary tha mither o Joses saa whar the' layed oot hïs bodie.

Currently Selected:

Mairk 15: USNT

Highlight

Copy