HINWƆ HI MITS YOHANA 18

1Kuudu mi wɛɛ mi gbɛn Bɛtwalsɛr za gi sizig a bɛtha. Gin tɛŋk gbɔɔlɛ, lɛlgaalɔ gaas waal sɛw. 2Ɓooya̧a̧ ha̧a̧ltɔnɔ

a waal gbɔɔl bɔ Baabila ɛ̧ɛ̧bɔ! Waal gbɔɔl bɔ Baabila ɛ̧ɛ̧bɔ! Wɛɛ loorɛha̧a̧l waal lɛlɛ, wɛɛ loorɛ bɔbtin wɔ hi gi sɛw ɛmbilya̧ lɛlɛ. Nɔɔs ha̧a̧l ɓi̧i̧limya wɔ, nɔɔs ha̧a̧l wɔ hi bɔ̧ɔ̧hi sɛw hi waak gedu. 3Yɔ̧n dood hɛbtdi sɛw mans ɓi̧i̧limya bumɔ bɔ. Waar ɛ gbɔlɛ wɔ hɛbtdi hi gɔ mans hi giya; hinriŋsgɔkya wɔ hi dag rɔɔs a zɛlkɔ bɔ gedu dɔk gɛ.

4Mi wɛɛ mi lag ya̧a̧ za booyz bɛtha:

a dood be wɛ, tuuzin a Baabila waalɔ gbɔɔl bɔ gedu! Tuuzinɛ an bɔnɛ ɔks hi gii a gi hinha̧a̧l du, an bɔnɛ dag ya̧a̧rhantɔ wɔ nɛnɛ! 5Hinha̧a̧lɔ hi tɔɔ hi tuur a bɛtha, wɛɛ Bɛt zɛ̄n woos ha̧a̧lɔ wɔ gɛ. 6Wɛnsinge hinwɔ da gaanɛ, toosinge hinyɔ woosin du dɔɔ eerɛ. Hi̧i̧tsinge dakwaaɔ bɔ hi bum du dɔɔ eerɛ gi daar yɔ da bɔɔsinɛ. 7Tɔɔsin kosgumnɔ hi wɔrkya̧a̧rumsɔ gi riitin an ɗɔbsig yɔ ɗɔbs zulɔ hi waak yɔ waa a waabil hɛmnt du gi gbunu. Yɔ anbɔ mɔk hi zulɔ

a be ɗɔɔt hɛdi an niswaar gbɔɔlɛ, be taa kuuri, wɛɛ be taa mɛɛk wɔrkya̧a̧rums zaŋ.

8Yɔ anbɔ ya̧a̧rhantɔ wɔ hi gi a gi zulɛ, hi zaa hi lɛg ɔ̧t gbun bɔ gedu sɛw: ya̧a̧rhant wɔ an gumsɛ, wɔrkya̧a̧rumsɛ, tɔsɛ, wɛɛ laa gi dɔ̧ɔ̧sige. Ya̧a̧nɛ, Waar Bɛt yɔ gisig dɔgl gbaako gin tɛŋk gbɔɔltɔnɔ.

9Waar ɛ gbɔlɛ wɔ waal du hi gɔ mans hi giya hi waabil hɛmntigi, gɔ hi gbɛn waal gbɔɔl bɔ gi dɔ̧ɔ̧k hi laa-uusɔ, hi kaage hi ɓolsigya̧a̧. 10Gɔ hi gbɛn waal gbɔɔl bɔ kosgumnɔ gi ha̧a̧sihi hoobo, hi er hɛmltɔnɔ hi raa:

a wey! wey! Baabila, waal gbɔɔl gbɔɔlɛ, waal gbɔɔl tɛŋkya! A ɔ̧t gbun yɛrɛ gedu ro kpɔd, hi gbaasum dɔgl ya?

11Hinriŋsgɔkya wɔ waal du hi gig kaako, hi ya̧a̧ɓoolik a gi dɔŋgo anyɔ doo taa ma an hi zeb wɔdya̧ wɔ hi riŋnuko. 12Hɛɛlmɔt wɛ, tus kɛ̧ɛ̧t wɛ, bet rɔbɛ wɔ gɔ hi wɔmnik wɔdɛ, root wɛ, gbandil buudɛ rɔbɛ wɛ, gbandil hobɛ bɛlbɛl wɛ, gbandil hɔntil rɔbɛ wɛ, gbandil hobɛ kɛŋ wɔ, tɛ̧ɛ̧ ki̧i̧lhɛmntya wɛ sɔmsɔm, hin wɔ hi gɔn namnɔɔ nuŋgo, hinwɔ hi gɔn tɛ̧ɛ̧ tus sa̧a̧tya wɛ sɛw, tus hobɛ wɛ, tus wilɛ wɛ, bet wɛ gɔ hi el nuŋgya̧ a astayɔ,

13tɛ̧ɛ̧mɔt ki̧i̧lhɛmntya wɛ, kurum ki̧i̧l-hɛmntya wɛ, tɛ̧ɛ̧ ki̧i̧lhɛmntya yɔ gɔ hi dɔ̧ɔ̧ts Bɛto, kurum okt ki̧i̧lhɛmntya yɔ gɔ hi el nuŋgɔ a ɗaasɛrɛyɔ, tɛ̧ɛ̧ uus ki̧i̧l-hɛmntya wɛ, bumhobɛ wɛ, kurum wɛ, zum rɔbɛ wɛ, totfolk wɛ, naa wɛ, tam wɛ, dɔy wɛ, mɔɔta wɛ, gbaarɛ wɛ hi dood kol wɛ hɛw. 14Gɔ gi anbɔ hinriŋsgɔkya wɔ hi raa waal gbɔɔl bɔ:

a wɔd mɔ rɔbɛ wɔ ha̧a̧ kol mɔ sɛw hi hɛmlumhɛmlɔ, rɔɔs mɔ wɔ hi gbɔlums mɔ wɔ sɛw hi wagumɔ, mɔ taahi zaa gbɛnik nɛ ma zaŋ!

15Wɔd wɔrɔ hinriŋsgɔkyaya̧ wɔ hi dak nɛ rɔɔs a waal bɔ gedu hi er hɛmltɔnɔ a waal gbɔɔl bɔ kosgumnɔ bɔ gihi hoobha̧a̧sig gi dɔŋgo, hi gbuu kaalɛ, hi ɓoolya̧a̧, 16hi dɔgɔ:

a wey, wey! Waal gbɔɔl yɛrɛ! yɔ heg nɛ gbandil buu ɗaktili, hi gbandil hob bɛlbɛl, hi zaa hob kɛŋg; root nɛ muulɔ hi kɔ̧ɔ̧tig wɔ hi gɔn hɛɛlmɔto, hi bet za rɔbɛ wɛ, hi root wɛ. 17-18Ɔ̧t kaasi, rii an waal gbɔɔl yɛrɛ gi waks rɔɔs wɛrɛ sɛwi!

Dood lɛmbzulya̧ wɛ sɛw, hi rɔbsrekya wɔ hi gi gedu, hi lɛmbnuukya wɔ hi waak a mɛmbal ha hi dood hinriŋsgɔkya wɔ gɔ hi rek lɛmb du sɛw hi gbɛn waal gbɔɔl bɔ gi dɔ̧ɔ̧k a laa-uus du hi er hɛmltɔnɔ; hi ɓoolya̧a̧:

a waal gbɔɔl za tɔ̄ɔ̄ nɛ gi riitin an waal gbɔɔl yɛrɛ gɛ!

19Hi kpuu luus hi muul hi kaako, hi ya̧a̧rkaako, hi ya̧a̧ɓooluko:

a wey, wey! Waal gbɔɔl yɛrɛ gin ya̧a̧rhanto! Dood wɔ hi gin lɛmb a mɛmbal ha sɛw hi da̍g rɔɔs a gi rɔɔs du. Ɔ̧t kaasi, rii an gi waks hin sɛwi!

20Bɛtha, mɔya, yɔ waal gbɔɔl bɔ ha̧tiro, dagum hato. Bɛt doodɔ wɛ, tɔmsya wɛ, hi Bɛtya̧a̧kɛŋkya wɛ, dagin hat be. Bɛt yɔ gbaasig dɔglɛ, gɔs nɛɛ hinrɔbo.

21Hɔnɛyɔ anbɔ, Bɛtwalsɛr za tɛŋkya loo bet za yɔ riitin hi naal gbɔɔlɛ, gbal a mɛmbal gbɔɔl du raa:

a hí bis waal gbɔɔl mɔɔt bɔ Baabila a wɛɛdis hi tɛŋk anyɔ lɛ be, doo taag zaa gbɛnko. 22Hi taa hin-ɛɛn za kɛŋk a mɔ lɛl bɔ ge, hi ɗɛŋɗɛŋnɔɔ ɓaak wɔ, hi hinnak wɔ, hi waŋg-ulk wɔ, hi pɔ̧r-ulk wɔ, hi taa zaa kɛŋk a mɔ lɛl bɔ ge. Hi taa woosya za an tɛ̧ɛ̧hɛɛkya, zaabe siltɛɛkya gbɛnik gbunu. Hi taa naal-gbɔɔl nams zaa kɛŋk a mɔ lɛl bɔ ge.

23Laa taa gaak a mɔ lɛl bɔ ge; hi taa wal looba hi nis looba ya̧a̧ zaa kɛŋk a mɔ lɛl bɔ ge. Hinriŋsgɔkya mɔ wɔ hii gi tɛŋkyaadɛ duhɔ gi daarlɛl a waal du, ya̧a̧nɛ; wɛɛ mɔ maatin dood sɛw sees mɔ wɔ. 24A Baabila hi zɛm Bɛtya̧a̧kɛŋkya wɔ hi Bɛt doodɔ wɔ hi dood zaadɛ wɔ hi gbɔ̧hi hɛbtdi sɛw ga̧a̧mya̧ giya.

Currently Selected:

HINWƆ HI MITS YOHANA 18: NTD

Highlight

Copy

Compare