FILIPI 2

1Nɛ yɔ anbɔ, gbɔnɔ gi an doo gi ɓaasin muul kaasi a ɔksig nɛ bɔ gedu hi Kristu ya? Nɛɛ nɛ dak tɛŋk a Kristu hatɔ bɔ dɔŋg ya? Bɛt Mɔkilɔ gi ɔks kpoos nɛ nɛ waatingo ɔksig gbunu hi gii ya? Nɛ rɔbtingo ya? Nɛ ya̧a̧r-mɛɛtingo be ya? 2Nɛ gigi labɔ, mi zɔ̧nɛ, ɔksin ya̧a̧ nɛ bɛttɔnɔ, yɛgi ha̧a̧tinnɛ bɛttɔnɔ a nɛ teesdu, kɔmbin an doo gbunu, ginin kpoos nɛ gbunu, mɔkil nɛ gbunu. Gɔ gi anbɔ mi dag hat gbɔɔltɔnɔ gi da̧a̧ a nɛ dɔŋgo. 3Bɔnɛ woo hinza hi ka̧a̧si, zaabe hi zulgbɔɔlɛ, yɛrɛ woonhin hi zultiisig gbunu, bɔbe sèeg dood zaadɛ an hi daarigdaar hi gbɔlumsɛ. 4Bɔ za̧a̧nza gi mɔk zulɔ dɔgl gii kpɔd, bɔbe yɛgi mɔk naaza zaadɛ dɔgl hɛw.

5Ginin mɔkil nɛ gbun bɔ gii anyɔ gi fu̧u̧zig a Yeesu Kristu ge. 6Anyɔ gii gi nɛ Bɛt riitinsɔ gii si̧, wɛɛ an gɔ gi in Bɛt gbɔlumsɔ ɔɔko, in gɛ. 7Tiis zulɔ fɛŋwaanɔ, wɛɛn zulɔ an gbaari, wɛɛn muulɔ an doo hɛbtdi, yɔ wɛɛn muulɔ an doo hɛbtdi, 8tiis zulɔ wɛɛdisɛ, laks Bɛt tɔnɛ tuur a wɔrkɔ bɔ dɔ̧ɔ̧r hage.

9Ya̧a̧nɛ, Bɛt gbaag gbɔɔl a hin sɛw ha, gaag nuŋg yɔ daar nuŋg sɛw, 10an gɔ hi lak nuŋgɔ bɔ Yeesu , hinwɔ Bɛt kim a bɛtha a hɛbtdi hi a wɔrkɛ ɗɔɔtillɛlɛ hi zagl gi muutdu hi ɗɔbsige. 11Wɛɛ hinwɔ hi gin ya̧a̧boon sɛw hí raa dɔglɔ a Yeesu Kristu giigi Waar i, hi wɛɛ hi ɗɔbs Baa Bɛto.

12Yɔ anbɔ, sa̧a̧m mi rɔbɛ wɛ, nɛ yɔ mi gi a nɛ teesdu, nɛ nɛ waasim tɔnkɛŋk ma mi? Nɛ yɛrɛ ɓɔryɔ, anyɔ mi taadi gɛ, kɛmsinmi tɔn gi daarlɛl gbɔɔltɔnɔ, nɛ woo zul nɛ za̧a̧tig woos gbunu gbunu hi hoobo, hi kpoosbeeki. 13Ya̧a̧nɛ Bɛt gii waak wook hin nɛ kpoos du an gi gaan tɛŋk an gi ha̧a̧n wook hinyɔ ha̧a̧g rɔbtɔnɔ an gi za̧a̧sinɛ.

14Hinyɔ nɛ wook sɛw, bɔnɛ dɔntinu, bɔnɛ kit dɔglɛ, 15an nɛ wɛɛ dood kpoosrɔbya wɔ hi taan hin-a̧a̧b a Bɛt muut du. Nɛ wɛɛ Bɛt wāātɔ wɔ kpoosya̧ gaa rɔbtɔnɔ a dood bɔbtin wɔ hi waak ɔ̧ti gi zul hi teesdu, wɔ mɔkilya̧ wag gbɔnɔ gi da̧a̧. Nɛ gaak a hi teesdu an lɛlgaal a waaldu. 16Wa̧a̧n za̧a̧tig dɔgl bɔ hi tɛŋko, gɔ gi anbɔ muul mi gi ɓaa gɔ a Kristu zaakɔ ɔ̧ti, an bɔ rɔbs lɛl wɔ gɔ mi reko hi woos mi hi wɛɛ hintɔs. 17Ɗɔbsig nɛ gi an gaas yɔ hi gbaas Bɛto, kinsa ga̧a̧m mi yɔ gɔ gi gub a ɗɔbsig nɛ bɔ gi dɔŋgo gi wɛɛ gaasɛ a gaas nɛnɛ bɔ geha. À anbɔ, kpoos mi gi kpɛ̧ɛ̧kpɛ̧, wɛ́ dagtin hat lɛlgbunu.

18Nɛɛ hɛw dagin hat anbɔ be, wɛɛn nɛ dag hat hi mii be. 19Yɛrɛ mi mɔkig an Waar Yeesu gi gaam tɛŋk an mi yaa Timɔte a nɛɛge kuudu kaasi, an gɔ mi lag dɔgl nɛ, kpoos mi gi kusɔ. 20Mi taan doo za yɔ gin zul gi riitin an ɔnɛ bɔ gi mɔɔs zulɔ gi ɗaasin hi rɔbo. 21Dood sɛw hi wook hinyɔ kpoos ya̧nɛ ha̧a̧hi giya, hi wōō Yeesu Kristu woos ɔnɛ gɛ.

22Hɔnɛ nɛ mɛɛ Timɔte dɔglɔ be. Woo Dɔgl Rɔb woos hi mii an waa yɔ gi ɗaasig baatɔ woosɛ. Yɔ anbɔ, zuun a gin mɔkil rɔbo. 23Ya̧a̧nɛ mi mɔkig an mi see hinyɔ gɔ gi tursim kete ɓɔr mi ɔsin Timɔte yaak nɔɔko. 24Yɛrɛ mi gbaak kpoos mi a Waar Yeesu ge a mii hi zul mi hɛw, mi zaak kuudu kaasi a nɛɛge.

25Mi see gi an mi yaa Epafortitus, yɛ̧ɛ̧ wɛ yɔ gi fɔk Yeesu gbɔnɔ, yɔ gi wooswook hi miya, gi ɗaak nɔk hi mii ɔksi, gi wɛɛwɛ. Nɛ yààzig nɛ miige an tɔmsya nɛ an gi ɗaasim a hinyɔ ha̧a̧m gedu sɛw. 26Yɛrɛ kol gig kaŋk a nɛɛge sɛw. Wɛɛ, yɔ lag a nɛ kɛm gumsɔ yɔ wa̧a̧g dɔglɔ, kpoosɔ ɗɔ̄ɔ̄t zaa ma gɛ, gig ha̧a̧sig an gi rek a nɛɛge gi ɓaas muul nɛ. 27Da gums nɛ ha̧a̧ltɔnɔ, wagdi kaasi an gi wɔrɔ, yɛrɛ Bɛt mɛɛsigya̧a̧r baasig zelɛ. Bɛt mɛ̄ɛ̄s gii ya̧a̧r kpɔd gɛ, mɛɛs mii hɛw an bɔ kpoos mi gi waa miŋki.

28Ya̧a̧nɛ mi gig yaak a nɛɛge nɔɔktɔnɔ an nɛ wɛɛ nɛ gbɛnige gi harinɛ, mii be an kpoos mi gi sil kaasi. 29- 30Gii be sɛ̧ɛ̧b nɛ wɔrk dak a Kristu woos dɔŋgo. Gaa zulɔ wɔrko an gi da̧a̧s hinyɔ zɛ̧ɛ̧r nɛ an nɛ woos miya. Yɔ anbɔ, zenɛg hi hat gbɔɔltɔnɔ a Waar Yeesu nuŋg du, bɛr an nɛ ɗɔbs dood wɔrɔ labɔ.

Currently Selected:

FILIPI 2: NTD

Highlight

Copy

Compare