IBRANIŊKO 7

1Mɛlsisedɛk bɔ za̧a̧nɔ gi nɛ Waar i a Salim waal gbɔɔl du, gi Bɛt a wɛɛha maakɔwookya rek a Abraham ge yɔ wɛɛz a waar ɛ wɔ gbɔŋkya̧ bɔ gedu, rɔbsige, 2Abraham ɓesig hinyɔ dag nɛ sɛw du kooblɛ an gaasɛ. Nuŋg bɔ a Mɛlsisedɛk hinɔ raakɔ a Rɔbgɔk Waar yɔ. Wɛɛ gi Salim Waar i, raakɔ a Boolum Waar yɔ. 3Taan baa, taan nàa, taan yaasɛɛ. Hi mɛ̄ɛ̄ mɔɔkɔ dɔgl gɛ, hi mɛ̄ɛ̄ wɔrkɔ dɔgl gɛ. Mɛlsisedɛk gi waak Bɛtmaak-wookya faa, riitin an Bɛt waa.

4Nɛ gbɛn Mɛlsisedɛk gbɔ-lumsɔ daar nɛ lɛl zaŋ yaa wɛ Abraham gi gaag gaas gbɔɔl yɔ wɔɔz a gabs du du kooblɛ. 5Dood wɔ hi fu̧u̧ a Lewi dɔ̧ɔ̧t du, hi gaahi Bɛtmaakwookya woosɛ, maakdɔgl raa an hi loo dim gaas a dood wɔ hi du kooblɛ, raakɔ a hi loo a nahiza Ibraniŋkoya wɔ hi fu̧u̧z a Abraham dɔ̧ɔ̧t du hi. 6Wɛɛ Mɛlsisedɛk dɔ̧ɔ̧tɔ fu̧u̧ a Lewi dɔ̧ɔ̧t du gɛ, loo Abraham gaasɔ gbun a koobl du, rɔbs za̧a̧nyɔ Bɛt raag nɛ a bé woosig hinza.

7Hi rɔbo, hinza faak taaɗu: za̧a̧nyɔ gi rɔbsugo gbɔ-lumsɔ daar za̧a̧nyɔ hi rɔbsig daarɔ. 8Yɛrɛ hɛdi a Lewi dɔ̧ɔ̧t du, wɔ hi look gaas yɔ dood gɔ hi gaa, hii gi dood wɔ hi wɔrko; hɔnɛ a Mɛlsisedɛk dɔ̧ɔ̧t du be, za̧a̧nyɔ gi look gaas yɔ dood gɔ hi gaa, gɛ doo za̧a̧tili. Hinyɔ Bɛt ɗɛɛrwol raa giibɔ. 9-10Lewi gi nɛ a yaaɔsɛɛ Abraham buudu kete a ɔ̧tyɔ Abraham dagtin hi Mɛlsisedɛk gedu. Hɔnɛyɔ Abraham gaa Mɛlsisedɛk gaas anbɔ, wɛ ɗɛɛ an wɛ raa dɔglɔ a Lewi za̧a̧nyɔ gɔ gi zek hinyɔ dood hi gaako gii gaa Mɛlsisedɛk gaas hɛw a Abraham naan du.

11Bɛt gaa Israhilaya wɔ maakdɔglɛ, es a Lewiya wɔ Bɛtmaakwoosya̧ wɔ hage. À woosya̧ bɔ ɗɛɛ nɛ an gi wɛɛn dood rɔbwookyaadɛ gi da̧a̧, yɔ taa nɛ an Bɛt gi her maakɔ-wookya za dɔɔm yɔ fu̧u̧ a Mɛlsisedɛk dɔ̧ɔ̧t du. Yɔ lòò nɛ doo za yɔ fu̧u̧ a Haruna dɔ̧ɔ̧t du giya. Yɛrɛ ɔnɛ, Bɛt her za̧a̧nɔ a Mɛlsisedɛk dɔ̧ɔ̧t du. 12Bɛtmaakwookya gi bɛɛ zɛmruko, maakdɔglɔ gi zɛmr gɔ be. 13Yɔ anbɔ Mɛlsisedɛk za̧a̧nyɔ hi dɔg hin wɔrɔ gi zulha, gi dɔ̧ɔ̧t zaayɔ. A dɔ̧ɔ̧t wɔrɔ hi teesdu, doo za wōō nɛ woos a Bɛtmaaksɛŋk bɔ hage zaŋ gɛ;

14ya̧a̧nɛ hi mɛɛ sɛw a Waar Yeesu fu̧u̧ a Yahuda dɔ̧ɔ̧t du, yɛrɛ Muusa dɔ̄g hinza a gi an Bɛtmaakwookya za gi fu̧u̧ a dɔ̧ɔ̧t bɔrɔ gedu gɛ. 15Hin bɔ lab dɔglɔ wɛɛ gaaga anyɔ Bɛtmaakwookya za dɔɔm mid gi riitin hi Mɛlsisedɛk. 16Hí gbāag Bɛtmaak-wookya a dɔ̧ɔ̧tɔ dɔŋg an hinyɔ hi wɔya̧a̧ hage gɛ, gii wɛɛ Bɛtmaakwookya hi za̧a̧tigɔ yɔ gɔ da̧a̧ gɛ tɛŋkɔ. 17Bɛt ɗɛɛr-wolɔ dɔg dɔgl segya

a gi zulha be a mɔ gi Bɛtmaakwookya faa yɔ fu̧u̧ a Mɛlsisedɛk dɔ̧ɔ̧t du.

18Yɔ anbɔ hi bis dɔgl amnt bɔ anyɔ da taan tɛŋko, wɛɛ gi hintɔsyɔ. 19Muusa maakdɔglɔ bɔ dā̧ā̧s hinza gɛ - yɛrɛ wɛ dag mɔkilgbaak rɔb yɔ tɔɔ gi daarlɛlɛ, wɛ dagn gii gbɔnɔ sɔɔk a Bɛt dɔŋdi. 20A gedu be, Bɛt hindɛŋglikɔ giiro. Ya̧a̧nɛ anyɔ Lewiya wɔ hi wɛɛ Bɛtmaakwookya amntɔnɔ hindɛŋglik gi taa du gɛ, 21Yeesu wɛɛ Bɛtmaakwookya hi hindɛŋglikyɔ, a Bɛt raag hi hindɛŋglikɔ bɔ:

a Waar Bɛt dɛŋglɔ, taa an gi wɛɛ gi zɛmr mɔkilɔ: mɔ gi Bɛtmaakwookya faa.

22wɛ mɛɛ gɔ rɔbtɔnɔ a Yeesu kamz ya̧a̧wɔk yɔ daar zaa amnt bɔ. 23Yɔ daarɔ, Bɛtmaakwookya hi da hi gi kittɔnɔ yɔ wɔrk taahi nɛ ɔɔk aŋko. 24Gii ɔ̧nɛ yɔ gi waak faa, gin Bɛtmaak wooswook yɔ taa an gi gaa doo za be. 25Hinɔ anbɔ ro gi ɗɛɛ an gi za̧a̧s dood wɔ hi sɛ̧ɛ̧bik hi gii ɓɔryɔ hi faa a Bɛt dɔŋdi gaattɔnɔ anyɔ gi za̧a̧til faa an gi zɔ̧bsihi Bɛto. 26Rii nɛ an wɛ dag Bɛtmaakwookya gbɔɔl mɔɔt an giya, gi gi doo gaat a Bɛt muut du yɔ taan hinha̧a̧lɛ. Doo yɔ taan hin-a̧a̧b nɛ zaŋ, yɔ hɛɛtin hi hinha̧a̧lyaadɛ, yɔ hi dɔɔnig a Bɛt dɔŋgdi,

27rı̄ı̄tin an Bɛtmaakwookya zaadɛ gɛ; hā̧a̧g namb gbɛɛrik ɔ̧t nuŋgo an gi gɔs Bɛt maak an Bɛtmaakwookya gbɔlɛ amntɛ wɔrɔ gɔ hi wook gɛ - an gi yɛls zul ɔ̧nɛ wooko, kuudu gi woos dood ya̧nɛ gɛ. Gaa zulɔ an Bɛt gaas dɔɔ gbunu gaatɔ giya. 28Muusa maakdɔglɔ gbaa dood hɔntil wɔ an Bɛtmaakwookya gbɔlɛ; yɛrɛ hindɛŋglik dɔgl bɔ zaa kuudu a Bɛtmaakdɔgl bɔ gi kalɛ, gbaa Bɛt waa bɔ an Bɛtmaakwookya gbɔɔlɛ an gi gáa a Bɛt muutdu faa.

Currently Selected:

IBRANIŊKO 7: NTD

Highlight

Copy

Compare