IBRANIŊKO 5

1Yɔ anbɔ, Bɛtmaakwookya gbɔɔl yɔ hi herig sɛw a dood teesdu, hi gbaas doodɛ an gi woos Bɛt woosɛ, gi gaa Bɛt gaasɛ hi namb wɔ hi gbɛɛr an Bɛt gi bis hinha̧a̧l hi dɔŋgo. 2Ɗɛɛ an gi mɔms dood wɔ hi mɛɛhin gɛ hi wɔ hi wag gbɔnɔ hinɛ anyɔ gii gi a hɔntil wɔ hi gbaŋ hɛw.

3Yɔ anbɔ, gɔ gi kamzig maaknamb wɔ gbɛɛr an gi ha̧sin hinha̧a̧lɛ. Taa an gi ha̧sin dood ya̧nɛ kpɔdi, gi ha̧sin ɔ̧nɛ hɛw. 4Bɛt gi el doo za an Haruna gɛ, za̧a̧nɔ taa look Bɛtmaakwookya gbɔɔl mɔɔt gbɔlumsɛ. 5Yɔ gi anbɔ, Kristu lōō zulɔ an gi wɛɛ Bɛtmaakwookya gbɔɔl mɔɔt gɛ, Bɛt gii raage:

a mɔ gi waa beenɛ, nɛɛko be mɔɔmmɔ!

6Bɛt wɛɛ dɔg a lɛlza ɓɛ:

a mɔ gi maakwookya faa, mɔ fu̧u̧ a maakwookya gbɔɔl bɔ Mɛlsisedɛk dɔ̧ɔ̧t du.

7Yɔ Yeesu ginɛ hi muutɔ a waal du, zuun zɔ̧kɔ wɔ hi naandɛŋkɔ wɔ hi kaalɛ hi mɛɛko a Bɛt yɔ ɗɛɛ nɛ an gi za̧a̧sig a wɔrk du gedu. Bɛt wɛɛ ta̧a̧ zɔ̧kɔ zeg anyɔ hoob gig ha̧a̧ko. 8Anyɔ gi nɛ Bɛt waa gii hɛw, gok zultiisig hi ya̧a̧rhantɔ wɔ hiya. 9A ɔ̧tyɔ wɛɛ doo gbɔɔl gi ram gi da̧a̧, wɛɛs dood wɔ hi gisig tɔn kɛŋk sɛw za̧a̧tig faa zulɔya. 10Bɛt dɔ̧ɔ̧sig nuŋgɔ gɔ a Bɛtmaakwookya gbɔɔl mɔɔt yɔ fu̧u̧ a Mɛlsisedɛk dɔ̧ɔ̧t du.

11Dɔgl gis kittɔnɔ an wi dɔg a hin wɔrɔ hage hi hin zaadɛ ɓaatil wɔ dɔglɔ gaasugɔ, anyɔ nɛ sam nɛ dɔglɔ kɛŋk nɔɔktɔnɔ gɛ ya̧a̧nɛ. 12Yɛrɛ nɛya, wɔ nɛ ginɛ an nɛ wɛɛ hingokya adɛ amntɔnɔ, ha̧a̧n an hi wɛɛ hi gogsin hinwɔ hi yɛɛl a Bɛtdɔgl du giya. Ha̧a̧n an nɛ a̧a̧m wā̧ā̧lɛ, nɛ tɔ̄ɔ̄ an nɛ le kok ɓaatil gɛ.

13Yɔ anbɔ doo gi gi a̧a̧mik wa̧a̧lɛ, mɛ̄ɛ̄ hinriit gɛ̧ɛ̧k hi ya̧a̧gɔ̧ɔ̧n gɛ, gi waayɔ. 14Kok ɓaatil gɔys dood ɓatɛ wɔ hi rɔ̧ɔ̧s dɔglɔ hi wɛɛ hi gɛms zulya̧ an hi mɛɛ rɔb gɛ̧ɛ̧k hi ha̧a̧lɛ.

Currently Selected:

IBRANIŊKO 5: NTD

Highlight

Copy

Compare