EFESU 3

1A hin bɔrɔ gi dɔŋgo, mii Pol mi gisin Bɛt zɔ̧ko. Mi gi a luknɔ du a Yeesu Kristu dɔŋgo. Yɔ mi dɔgs nɛɛ wɔ nɛ taa Yahuduya gɛ Bɛt dɔglɔ, gii hi wa̧a̧m hi yaam luknɔ du.

2Nɛ nɛ kɛm hi book gɛmsil woos yɔ Bɛt gaam naan du dɔglɔ an mi woo a nɛ zul ma mi? 3Bɛt zunsim gɛmsil bɔrɔ dɔglɔ dubt yɔ dood hi mɛɛnɛ gɛ mi bi̧i̧sin dɔglɔ kaasi. 4Gɔ nɛ gi zaŋgugo, nɛ zol hinyɔ mi kɛŋk bɛttɔnɔ a Kristu dɔgl dubt yɔ dood hi mɛɛ nɛ gɛ gedu. 5Da amntɔnɔ Bɛt zuns dood wɔ zaŋgya̧ dɔglyɔ dood hi mɛɛ nɛ gɛ gɛ. Yɛrɛ ɓɔryɔ Bɛt Mɔkilɔ mits Bɛt tɔmsyaɔ wɔ hi ya̧a̧kɛŋkɔya gaatɛ wɔ hii hinɔ.

6Nɛ hinɔ gɛrɛ: a dood wɔ hi taa Yahuduya gɛ hi dag rɔɔs a bɛtha hi Yahuduya wɔ lɛlgbunu, hi ɔks gbunu hi hiya a Yeesu muulɔ gbun bɔ gedu, hi wɛɛ hi dak rɔbs bɔ Dɔgl Rɔb raa a Bɛt gi gaawɛ a ɔksil wɛ bɔ gedu hi Yeesu Kristu ya̧nɛ!! 7Mi wɛɛ Bɛt woosɔya an mi dɔg Dɔgl Rɔb yɛrɛ giya, an Bɛt gɛmsilɔ gaasɔ bɔ gaami a tɛŋkɔ hinwookya gbɔɔl bɔ gedu.

8An mi gi wans mi daar dood wɔ hi gi Bɛt ɔ̧nɛ sɛw si̧, Bɛt her mii gi gaam gɛmsil yɛrɛ an mi dɔgs dood wɔ hi taa Yahuduya gɛ Kristu rɔɔsɔ bɔ dɔglɔ kɛŋkɔ ɓaa, 9wɛɛ an mi zuns dood sɛw dɔgl dubt bɔ hinɔ gaattɔnɔ. Bɛt yɔ kim hin sɛw mɔk nɛ dɔglɔ amntɔnɔ ginɛ gbaak a kpoos du; dood hi mɛ̄ɛ̄ nɛ hinɔ gɛ zaŋ.

10Mi gis dood hinɔ walkugo an Bɛt walɛsɛrɛ wɔ hi waar ɛya̧ a bɛtha hi gbɛn Yeesu fɔkya wɔ ɔksilya̧, hi wɛɛ hi mɛɛ Bɛt hinmɛɛkɔ dubt sɔmsɔm bɔ gɔ dā̧ā̧ gɛ. 11Bɛt woohin anbɔ an hinyɔ da mɔk nɛ amntɔnɔ an gi da̧a̧s hi Waar wɛ Yeesu Kristu. 12Yɔ wɛ ɗɔbsig Yeesu Kristu wɛ ɔks gbun hi giya, wɛ dag gbɔnɔ gɔ an wɛ sɔɔn a Bɛt dɔŋdi, bɔ hoob gi ha̧a̧wɛ hinza ma.

13Ya̧a̧nɛ mi gin zɔ̧ko, an bɔ muul nɛ gi ɓorɔ, anyɔ nɛ lag a mi ya̧a̧ryɔ̧k a nɛ dɔŋgo. Mɛɛn a nɛ́ dag gbɔlums a ya̧a̧rhant mi bɔ gedu. 14Ya̧a̧nɛ, mi zaglik a Baa wɛ Bɛt muutdu. 15Hinyɔ hi elik a baaba sɛw, a bɛtha hi hɛbtdi, nuŋgɔ bɔ a baaba fu̧u̧ a Baa wɛ Bɛt ge.

16Mi gig zɔ̧k an gi woo hin hi Mɔkilɔ a nɛ kpoos du, gi gaanin tɛŋk gbɔɔl yɔ fu̧u̧ a gbɔlumsɔ yɔ tɔɔ gi daarlɛl gedu, 17an ɗɔbsig nɛ gi gɔ an Kristu gi waak nɛ kpoos du. Gɔ gi anbɔ, gi ha̧a̧n kpoos du gbɔɔltɔnɔ an tɛ̧ɛ̧ yɔ yaa yɛ̧ɛ̧sɔ dubtɔnɔ hi luk yɔ hi wɔm a sɛŋk betya ha. 18Yɔ anbɔ nɛ ɗɛɛ an nɛ kɛm Yeesu Kristu hatɔ fɛɛtigɔ, zi̧i̧bilɔ, hɔɔtigɔ hi dukɔ hi dood wɔ hi gi Bɛt ɔ̧nɛ lɛlgbun sɛw; 19nɛ wɛɛ nɛ mɛɛ Kristu ha̧a̧tigɔ yɔ daar hinmɛɛk sɛw, an kuudu Bɛt hi zulɔ hi kpoosɔ sɛw gi waa nɛ kpoos du gi tɔɔ gedu.

20Yɛrɛ Bɛt gii ɗɛɛ wook hi tɛŋk yɔ gi wook wɛ muul du gi gɔ da̧a̧ gɛ, daar hinyɔ wɛ zɔ̧ko hi hinyɔ wɛ mɔkig sɛw. 21Gbɔlums gige, a Yeesu fɔkya wɔ hi teesdu, a Yeesu Kristu nuŋg du, a dood zaŋg teesdu wɛlɛ hi wɛlɛ! Aanbɔ.

Currently Selected:

EFESU 3: NTD

Highlight

Copy

Compare