TƆMSYAADƐ WOOSƐ 27

1Yɔ hi raa a wi rek a Itali hɛbto a lɛmb du, hi loo Pol hi luknɔya zaadɛ hi gaahi Waar Romaya layaadɛ ɔ̧ɔ̧ zul gbun gbɔɔlya̧ bɔ nuŋgɔ a Zuliyus naan du, an gi ka̧hi. 2Wi tal a lɛmb zayɔ fu̧u̧z a Adaramitiya gedu. Lɛmb yɔ gi rek a waal sɔmsɔm ge a Aaziya, wi ɗund wi re gɔ. Wal za Makeduniyaya fu̧u̧ a Tesaloniki gi hi wiya nuŋgɔ a Aristarkus.

3Yoosugɔ wi rek wi tuur a Sidɔŋg. Laaya gbɔɔl bɔ Zuliyus yɔ gi kaŋkig Pol rɔbtɔnɔ gaag gbɔnɔ an gi rek gi boo saamɔ hii an gi dag hinyɔ ha̧a̧ge. 4Yɔ wi ɗund hɔdi a Sidɔŋg wi daa a lɛlyɔ zɛk taa ge a Kiprus hɛbt yɔ mɛm rɔg ge, a ɔ̧tkazigi, anyɔ zɛk giw a̧a̧nik rek a ɔ̧tleki.

5Wi tal mɛmbal gbɔɔl lɛl bɔ sɛbtin hi Kilikiya hi Pamfila wi tuur a Mira a Likiya hɛbt du. 6Laaya gbɔɔl bɔ zɛm lɛmb za hɔ yɔ fu̧u̧z a Iskandariya gi rek a Itali, kasiw gedu wi re gɔ. 7Ɔ̧t kittɔnɔ wi rek di sɔ̧ɔ̧sɔ̧ɔ̧ a lɛmb du hi mɔɔt gbɔɔltɔnɔ wi tuur a Kinidis lɛlyɔ mɛm rɔg gi dɔŋdi. Anyɔ zɛk a̧a̧niw daakɔ lɛlɔ ge wi zɛmr wi daa a Kereta lɛlyɔ mɛm rɔg a bɛrk zaabɔ zɛk taa ge gɛ, a Salmuna dɔŋdi.

8Wi fɔb a mɛmbal gbɔɔl ya̧, wi tuur a lɛlyɔ gɔ hi elik a holumrɔb lɛl ge hi mɔɔt gbɔɔltɔnɔ a Lasaya waal gbɔɔlya̧ di. 9Anyɔ wi daas lɛl ha̧a̧ltɔnɔ, lɛl bɛr rekɔ hi lɛmb ma gɛ. Ya̧a̧nɛ hinha̧a̧l ha̧sig naab bɔ ɔ̧tɔ da taalɔ. Yɔ anbɔ Pol raahi:

10a dood wɛ, be gbɛn rɔbs yɔ wɛ rek gi bɛr gɛ. Lɛmb bɔ gi ha̧tir hi wɔd wɔ hi gi gedu sɛw; anbɔ kpɔd gɛ, wɛɛ wɛ wɔr be.

11Laaya gbɔɔl bɔ kɛms lɛmbnuukya bɔ hi za̧a̧n lɛmbya bɔ dɔglya̧, kɛ̄ms Pol ɔnɛ bɔ rɔbtɔnɔ gɛ. 12Yɔ lɛlɔ bɛr an zɛrk tee gi zɛ̧wi hɔ gɛ, dood lɛmbya kit wɔ hi raa a daar an wi rek doosɛ an wi goo tuurik a Finika, kinsa wi ɗɛɛ be. Finika bɔ lɛmb erk lɛlɔ gi a Kereta a ɔ̧tleki, wi ɗɛɛ an wi daa ga̧a̧k wi hɔ hɛw. 13Yɔ zɛk yɛɛl fɛk kaasikaasi a ɔ̧tkazig naanyɛ̧li, dood lɛmbya wɔ hi mɔk a gbɔnɔ gi an hi rekɔ anyɔ ha̧a̧hi, hinɔ gii hi ha̧s lɛmb doonis bɔ hi wɛɛ hi fɔb a Kereta hɛbt mɛmbal gbɔɔl ya̧.

14Hɔnɛ kuudu kaasi, zɛkzanɔ ha̧a̧l ɗun nɔɔktɔnɔ, zɛk ha̧a̧lɔ gɔ hi elig a ɔ̧tkazig naanrɔbo. Zɛkɔ yɛɛl fɛbzig a hɛbt lɛl yɔ mɛm rɔg tɔlya̧ sɛw ge. 15Zɛk bɔ zaa lɛb lɛmb bɔ be, wi ɗɛ̄ɛ̄ an wi zɛmr lɛmb bɔ wi wɛɛnig a zɛk lɛl bɔ gi fɛbzig ge gɛ. Wi ɔɔge an gi wɛɛnig a lɛl yɔ ha̧a̧g ge sɛw.

16Yɔ wi daa a hɛbtlɛl wans yɔ mɛm rɔg nuŋgɔ a Kakawda bɛrkɔ zaa bɔ zɛk taa fɛk ge gɛ, wi wɛɛ wi kɛɛ lɛmb wans bɔ dirk wɔkɔ a lɛmb gbɔɔl bɔ hage hi mɔɔt gbɔɔltɔnɔ. 17Hi diz lɛmb wans bɔ wɛɛha hi wɛɛ hi wɔb lɛmb gbɔɔl hi ba̧a̧ni. Yɔ hoobha̧a̧hi a kinsa lɛmb bɔ gi zu̧u̧y a hɔ̧ɔ̧l muul a Libiya dɔŋdi, hi sis lɛmb gbandil bɔ hi hā̧b wɛɛha an zɛk gi fɛb a lɛmb bɔ muulɔ ge kpɔd, gi kaŋg gi naan a mɛm bɔ hage.

18Bɛlzɛkya ha̧a̧l bɔ zɛksiw hi tɛŋko, yoosugɔ hi yɛɛl wɔd wɔ bilsigi a mɛm du. 19Yoosugɔ ɓɛ hi yɛɛl lɛmb wɔd wɔ bilsig hi naan ya̧a̧n ma. 20Ɔ̧t kittɔnɔ wi gbɛn ɔ̧t gɛ be, wi gbɛn sɛwaat gɛ be. Zɛk yɔ giw fɛk hi tɛŋko ɓɔr wi ɔɔ mɔkig ma a za̧a̧tig taa nɛ zaŋ. 21Yɔ dood hi gɔ nɛ ɔ̧t kittɔnɔ hi lehin gɛ, Pol er hi muut du raahi

a sà̧à̧nɛ, gi nɛ an nɛ kɛmsibe yɔ be raa nɛ a bɔwɛ ɔɔ Kereta, nɛ faa ya̧a̧ be faa. An wɛ èr nɛko yɔ wɛ dāg ya̧a̧rhant an yɛrɛ lɛ gɛ. 22Yɛrɛ be zɔ̧nɛ, ɓaasin kpoos nɛ, doo za gbun taa wɔrko, lɛmb bɔ gii gi ha̧tir kpɔd.

23Lel yɛms du Bɛt yɔ heribe an dooɔ, Bɛt yɔ be gi doo ɔ̧nɛ, bé wɛɛ bé gisig wooswooko yaaz walsɛrɔ zaa èr be dɔŋdi, raabe 24a Pol , bɔ hoob gi ha̧a̧m hinza, gi an mɔ rek mɔ er a waar Romaya bɔ Kaysara gi muutdu mɔ booya̧a̧ hi giya. Bɛt yɔ gi wook hinrɔbo, gààmɔ dood wɔ hi gi a lɛmb du kolya̧ naan du. 25Yɔ anbɔ, walɛ wɛ, bɔ kol gi tuunɛ, ɓaasin kpoos nɛ, be ɗɔbs a Bɛt gi woo anyɔ raasib sɛw. 26Yɛrɛ zɛk gi ka̧wɛ wɛ leg a hɛbtlɛl zayɔ mɛm rɔg tɔlya̧ sɛw ya̧a̧ɔ ge. Be dɔksin giya.

27A yɛms koobl daa nasums bɔ yɛmsɔ gedu, zɛk ha̧a̧l ka̧wi a Mɛmbal Gbɔɔl Teesum bɔ hage doosɛdoosɛ. À yɛms tees du dood lɛmbya wɔ hi mɔk a wi sɛ̧ɛ̧bik hɛbt zɛŋkyɔ.

28Hi goo mɛm bɔ hi zɛm dukɔ a dood erkil yɔ̧ɔ̧lgbun du, gɔ hi rek doos kaasi hi wɛɛ hi goo hi zɛm dukɔ a dood erkil du koobl daa nɔɔnɛ.

29Yɔ hoobha̧a̧hi a kinsa lɛmb bɔ gi zu̧u̧y a bet muul be, hi gbalk lɛmb doonis nasɔ a lɛmb kuu an hi esin lɛmb bɔ mɛm ha, hi wɛɛ hi zɔ̧b Bɛt an lɛl gi gaa nɔɔko. 30Yɔ dood lɛmbya wɔ ha̧a̧hi lɛmb bɔ ɔɔko, hi sis lɛmb wans bɔ, hi wɛɛ hi gɔ an hi gbalk doonis za a lɛmb muutdu hi wa̧a̧n lɛmb gbɔɔl bɔ. 31Yɔ anbɔ Pol raa laaya gbɔɔl bɔ hi laaya zaadɛ wɔ

a an dood wɛrɛ hi kɔ̄m a lɛmb bɔ gedu gɛ, nɛ ɗɛ̄ɛ̄ an nɛ za̧a̧ gɛ.

32Yɔ hi kɛm anbɔ laaya wɔ hi dɛ̧ɛ̧ lɛmb wans bɔ ba̧a̧nɔ wɔ hi ɔɔg mɛɛ mɛm du. 33Yɔ lɛl gɔ gi gaa, Pol zɔ̧hi an hi lehin hi sɛw,

a yɛms tal koobl daa nasɔ nɛ lehin gɛ be nɛ gi ooko. 34Hinɔ gii be zɔ̧nɛ an nɛ lehin nɛ dagn tɛŋko nɛ za̧a̧sin zul nɛ. Susug nɛ gbun a zulha taa wak nɛ zaŋ.

35Yɔ Pol dɔg anbɔ wɛɛ loo kok kimlɛ baan Bɛto a hi lɔlgbar sɛw, ɓɛɛdɔ yɛɛl leki. 36Yɔ anbɔ tɛŋkya̧ wɛɛz hi sɛw hi lehin gɔ. 37Kitig wi tuur dood yɔ̧ɔ̧l kooblɛ hi dumbili nɔɔn-erɛ daa nɔɔngbunu a lɛmb bɔ gedu. 38Yɔ dood sɛw hi hi̧i̧ buudu hi loo tot saa wɔ hi bisil mɛm du an lɛmb bɔ gi ɗagl du.

39Yɔ lɛl gaa lɛmbnuukya wɔ hi mɛ̄ɛ̄ hɛbtyɔ hi sɛ̧ɛ̧b dɔŋgɔ di nuŋgɔ gɛ. Gɔ hi see yɔ̧l doosɛ hi gbɛn hɛbt za yɔ mɛm rɔg tɔlya̧ sɛw hɔ̧ɔ̧l gi lɛlɔge be, hi mɔk a kinsa hi ɗɛɛ an hi ren lɛmb bɔ gi ɗɔɔt a hɔ̧ɔ̧l bɔ hage. 40Hi dɛ̧ɛ̧ lɛmb tus ɗɔbtɛ wɔ ba̧a̧nya̧ hi ɔɔhi a mɛm du, hi pid tɛ̧ɛ̧ wɔ gɔ hi nuun lɛmb bɔ ba̧a̧nya̧, hi wɛɛ hi kas zɛk gban bɔ hi gbaa a lɛmb gɔ̧ɔ̧s ha an zɛk gi kam lɛmb bɔ gi tuuringe a hɛbt tɔlya̧;

41wɛɛ lɛmb bɔ ki̧i̧ hɔ̧ɔ̧l bɔ be, wɛɛ gɔ̧ɔ̧sɔ i̧i̧y a hɔ̧ɔ̧l du ta̧a̧ naŋk zaa ma gɛ. Mɛmɗukil wɔ hi gi lɛbtig lɛmb bɔ sa̧a̧nɔ hi tɛŋko, hi gig ha̧tirgo.

42Laaya wɔ hi mɔk a hi gbɔm luknɔya wɔ an bɔhi gi̧i̧l mɛm du hi wirɔ. 43Yɔ laaya gbɔɔl bɔ ha̧a̧g an gi za̧a̧s Pol be iinɔ, gāāhi gbɔnɔ an hi woo anyɔ ha̧a̧hi gɛ. Wɛɛ raa dood wɔ hi mɛɛ mɛmfuk hi yɛɛl gi̧i̧lik mɛm bɔ gedu hi fubɔ hi kar a kasiŋ zaa. 44Wɔ hi zɛ̧ɛ̧r be hi gi̧i̧l hi wa̧a̧ tɛ̧ɛ̧ gbɔlɛ, zaa hi fub a lɛmb tɛ̧ɛ̧hɛɛk ɓɛrkil wɔ muulɔge hi kanɔ. Hinɔ anbɔ ro wi kar rɔbtɔnɔ sɛw a mɛmbal gbɔɔl kasiŋ za.

Currently Selected:

TƆMSYAADƐ WOOSƐ 27: NTD

Highlight

Copy

Compare