2 TESALONIKI 2
2
2 TESALONIKI 2
1Nɛya, yɛ̧ɛ̧dɛ mi wɛ, an hinyɔ gi seek Waar wɛ Yeesu Kristu zaakɔ hi mɔksig wɛ a gi dɔŋdi, wi gin zɔ̧ko: 2a nɛ kɛm Bɛtya̧a̧kɛŋkya za dɔglɛ, zaabe rams za, zaabe ɗɛɛrwol zayɔ gɔ hi raa a fu̧u̧z a wiige, gi dɔg a Waar Yeesu zaakɔ bɔ ɔ̧tɔ tuurɔ, bɔ kpoos nɛ gi nam nɔɔktɔnɔ, bɔ hinɔ gi yɔɔnɛ. 3Bɔnɛ ɔɔ doo gi maatin an hi nɔ hɛw, yɔ anbɔ, dood kittɔnɔ hi ɓats Bɛt zulɛ, wɛɛ doo ha̧a̧l bɔ gɔ gi wag faa gi midz kete ɓɔr ɔ̧tɔ gi ɔɔ tuuruko.
4Doo hinha̧a̧lya bɔrɔ gi ɓaas hinwɔ dood hi elik a bɛt ya̧a̧nɛ zulɔ, gi wɛɛ gi daarin zulɔ lɛl a hin wɔrɔ hi zulha sɛw gi re gi ɗɔɔt a Bɛtluk du gi raa a gii gi Bɛt hi zulɔ. 5Nɛ mɔ̄k nɛ mɛ̄ɛ̄ a mi da mi dɔgsin hin wɔrɔ yɔ mi gi nɛ waak hi nɛɛ gɛ ya? 6Yɛrɛ hinza giro gi a̧a̧nik hin wɔrɔ tuurukɔ ɓɔryɔ. Nɛ mɛɛ hinɔ mɛɛ be. Yɔ anbɔ doo ha̧a̧l bɔ gi midz a ɔ̧tyɔ Bɛt dɛ̧ɛ̧sig gedu.
7Yɛrɛ doo ha̧a̧l bɔ tɛŋkɔ bɔ dood hi mɛɛ gɛ gi wookwo ma an ɓɔri hɛw, hinɔ kpɔdi, hin wɔrɔ midigya̧ gɛ za̧a̧nyɔ gig ansig te gɔ gi wagɔ, hi ɔɔ midugo. 8Kuudu doo ha̧a̧l bɔ gi midz ma. Gɔ gi anbɔ Waar Yeesu gi gbɔŋg hi holumɔ yɔ ya̧a̧du, gi ha̧tirge hi zaakɔ bɔ gbɔlumsɔ sɛw.
9Doo ha̧a̧l bɔ zaakɔ gigi hi Saydanu woosɔ. Gi zaa hi gɛrs tɛŋkyaadɛ, gɛrs hintuusingoyaadɛ hi gɛrs gbɔlɛ ya̧a̧-gɔ̧ɔ̧nya zaadɛ wɔ hi gi sɛw, 10gi maatin dood wɔ hi wako hi gbɔnɔ bɔbtin yɔ gi sɛw. Ya̧a̧nɛ, dood wɔrɔ, an gɔ gi ha̧a̧hi rɔb hi kpoosya̧ sɛw an Bɛt gi wɛɛ gi za̧a̧sihi, hi inɔ. 11Yɔ anbɔ Bɛt gi yaaz mɔkil za maatilya tɛŋkya a hi kpoos du an hi ɗɔbs hinwɔ hi gi ya̧a̧gɔ̧ɔ̧nya, 12an za̧a̧nyɔ ɗɔbs rɔb bɔ gɛ gi ha̧a̧g hinyɔ rii gɛ giya, gi gbaasihi dɔglɛ.
13Yɛrɛ gi an wi waa Bɛt baaniki a nɛ zulɛ, nɛɛ yɛ̧ɛ̧dɛ wi wɛ. Waar Yeesu ha̧a̧g nɛya. Bɛt herin an nɛɛ nɛ za̧a̧ doosi. Woo hinɔ hi Mɔkilɔ bɔ wɛɛnin doodɔ hi tɛŋkɔ yɔ gaan an nɛ ɗɔbs rɔbo. 14Hinɔ lab ro Bɛt gi elin a gi dɔŋdi hi Dɔgl Rɔb bɔ wi dɔgsinɛ an nɛ dag Waar wɛ Yeesu Kristu gbɔlumsɔ nɛnɛ.
15Yɔ anbɔ yɛ̧ɛ̧dɛ wi wɛ, erin rɔbtɔnɔ, wa̧a̧n hingok wɔ wi dɔgsin hi ya̧a̧ wi, wi ɔɔnin a kpoos du, zaabe, hi wɔ wi bi̧i̧sin a ɗɛɛrwol du. 16Yɛrɛ an Waar wɛ Yeesu Kristu hi zulɔ, hi Baa wɛ Bɛt yɔ gaawɛ muulɓaasig wɛlɛ hi wɛlɛ hi ook rɔb a gi gɛmsil du, 17hi ɓatsin kpoosɛ, hi wɛɛ hi gaan tɛŋk nɛ woo hinrɔb sɛw, nɛ wɛɛ nɛ dɔg hin rɔb sɛw.
Currently Selected:
2 TESALONIKI 2: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.