2 KƆRƐŊGTU 10

1Mii Pol hi zul mi, mi gin zɔ̧k hi Kristu kpoosɔ saŋti hi rɔbtigɔ, gɔ mi gidi, muul mi hɔnɔ, wɛɛ yɔ gɔ mi hɛmlinɛ, muul mi gɔ ɓaa be! 2Mi zɔ̧nɛ, gɔ mi gi hi nɛya, bɔnɛ fɛ̧ɛ̧mi an mi ɓaas muul mi, mi zuun tɛŋk yɔ mi mɔkig an mi zuns dood zaadɛ wɔ hi giwi seek an wi ɛmbik an dood waaldu. 3Yɔ anbɔ, an wi ɛmbik a waaldu si̧, wi taa nɔkgɔk an dood waaldu.

4Ya̧a̧nɛ nɔkgɔk wɔd yɔ wi woonik nɔko, taa doo nɔkgɔk wɔdɛ. Nɔkgɔk wɛ wɔd wɔ hi gin tɛŋk hi Bɛt tɛŋkɔ an hi ha̧tir mɔkil mɛlya wɔ. 5Wi gi ha̧tirgo mɔkil yɔ doo waal du gi mɔkugo hi mɔkil zulgbɔɔlya wɔ hi ansig dood gbɔnɔ an bɔhi mɛɛ Bɛt sɛw, wi wɛɛ wi kamzig mɔkil wɔ wi wa̧a̧zihi an luknɔyaadɛ sɛw an hi kɛms Kristu tɔnɛ. 6Nɛɛ gɔ nɛ kɛmtɔn gi da̧a̧, wi gidi bed an wi gaa hinyɔ gɔ gi kɛmtɔn gɛ ya̧a̧rhanto.

7Seen hinyɔ gi a nɛ muutdu! Doo za gi ta̧a̧ zulɔ a be gi Kristu doo ɔ̧ɔ̧nɛ, raag zulɔ gi mɛɛ a wii hɛw wi gi Kristu dood ɔ̧ɔ̧nɛ an giya. 8Ya̧a̧nɛ an mi pɛɛzul gi daarlɛl kaasi a tɛŋk yɔ Waar Yeesu gaawi geha si̧, - tɛŋkɔ yɔ gaawi an wi ɗaansinɛ a nɛ ɗɔbsig du, gāaw an wi ha̧tirnɛ gɛ, wɛɛ seem taam ha̧a̧k a nɛ dɔŋg be. 9Yɔ anbɔ an bɔgi gi an mi ha̧a̧sin hoobo hi dɔgl wɔ mi bi̧i̧sinɛ.

10Ya̧a̧nɛ hi dɔk a Pol dɔglbi̧i̧kɔ wɔ hi ɗɔɔbɔ, hi ɓaa be, wɛɛ gɔ gi wɛ teesdu muulɔ hɔnig be, wɛɛ ya̧a̧boonɔ gi hintɔs be. 11An za̧a̧nyɔ gi dɔk hin anbɔ gi mɔk gi mɛɛ a gik yɔ wi gi hi dɔgl wi bi̧i̧k bɔ yɔ gɔ wi taadi gɛ, wi gi anbɔ a wi woos du ro yɔ gɔ wi gidi. 12Ya̧a̧nɛ winɛ wi taa an wi goo zul wi riitingo hi dood zaadɛ wɔ hi ɗɔbsig zulya̧, zaabe an wi gootin zul wi hi hiya. Gɔ hi gootingo zulya̧ anbɔ hi wɛɛ hi seetingo an hi riitinu, hi kɛ̄m hin hi zul du gɛ.

13Winɛ hā̧ā̧wi an wi ɗɔbs zul wi gi daar wel yɔ Bɛt gaawi gɛ; ha̧a̧wi an wi woo gi tuur a Bɛt gɛmsilɔ bɔ winɛ yɔ gaawi welɔ bɔ gedu an wi zaa wi tuur a nɛɛge hɛw. 14An gɔ hi raa a wí tuur nɛɛge gɛ, nɛ wi tuur ma mi? Wii donz nɛ Kristu Dɔgl Rɔb bɔ kamzugɔ a nɛ lɛlɛ. Yɔ anbɔ tɛŋk wi tuur a nɛɛge be, rii an wi gaan dɔgl an Kristu tɔmsya wí dāār tɛŋk wi bɔ welɔ gɛ.

15Wi taa zul wi ɗɔbsig an gi daar wel yɔ Bɛt gaawi, wi taa zul wi ɗɔbsig hi dood zaadɛ woosya̧, wi mɔkig a yɔ ɗɔbsig nɛ gi tɔɔko, woos wi lɛl be, gi fɛɛ gi rek doos gbɔɔltɔnɔ a nɛ teesdu be, 16wɛɛ an wi dɔg Dɔgl Rɔb bɔ a hɛbt lɛl wɔ hi gi a nɛnɛ bɔ doosɔ ge. Hā̧a̧w an wi ɓaas muul wi a woos yɔ dood zaadɛ hi yɛɛl wook a hi bak du muulɔ gɛ.

17Za̧a̧nyɔ mɔk an gi ɓaas muulɔ, ɓaasig a hinyɔ Waar Bɛt woo gedu. 18Ya̧a̧nɛ za̧a̧nyɔ ɗɔbs zulɔ taa doo rɔbo. Ya̧a̧nɛ Waar Yeesu tā̧ā̧ za̧a̧nyɔ ɗɔbs zulɔ gii gɛ, ta̧a̧ za̧a̧nyɔ gii hi zulɔ boo rɔb gi zulha giya.

Currently Selected:

2 KƆRƐŊGTU 10: NTD

Highlight

Copy

Compare