1 TESALONIKI 2

1Yɛ̧ɛ̧dɛ mi wɛ, nɛɛ hi zul nɛ nɛ mɛɛ hɛw a wí rēk a nɛ lɛl ya̧a̧rtɔs gɛ. 2Nɛ mɛɛ a hi ha̧a̧niw nɛ ya̧a̧r a Filipi hi niiwi wi ɔɔ tuurik a nɛ lɛl a Tesaloniki. Yɛrɛ Bɛt gaaw tɛŋk an wi dɔgn Dɔgl Rɔb bɔ gi fu̧u̧zig a ge, hoobhā̧a̧w dood wɔ zulya̧yɔ hi ɓaasig yɛ̧ltɔnɔ a wi gbaŋg gɛ. 3Ya̧a̧nɛ, dɔgl wi dɔk bɔ er a mɔkilmɛlya ha gɛ, zaabe a mɔkilha̧a̧l ha gɛ, zaabe a maatil ha gɛ.

4Bɛt see an wi rii an gi gaaw Dɔgl Rɔb bɔ wi kaŋkɔ, ya̧a̧ gii gɔ wi book dɔgl an gbuna bɔ be, wi taa tɛk an wi bɛs doodɛ, wi tɛk an wi bɛs Bɛt yɔ gi gook kpoos wɛ. 5Nɛ mɛɛ bɛttɔnɔ a wi bōōsirnɛ dɔgl za hi mɛlhɛmnt gɛ. Zaabe dɔgl za ɗɔkumya yaatingoya gɛ. Bɔrɔ ɔnɛ Bɛt gii gi segya wi. 6Wí tɛ̄b gbɔlums a dood gɛ, wí tɛ̄b a nɛɛge gɛ, zaabe a dood zaadɛ gɛ.

7Rɔbo anyɔ wi gi Kristu tɔmsɔyaadɛ, wi ɗɛɛ nɛ an wi zunsin gbɔlums wi, wɛɛ wi saŋgɔ, yɔ wi ginɛ a nɛ lɛlɛ. Wi saŋg an nàayɔ gi ook waatɔ rɔbtɔnɔ. 8Ha̧a̧siw nɛ gbɔɔltɔnɔ a nɛɛ ge, wi ginɛ di bed an wi gaan kol wi, wi gaan Bɛt Dɔgl Rɔb bɔ gii kpɔd gɛ. Hat wi tɔɔ a nɛɛge anbɔ. 9Yɛ̧ɛ̧dɛ mi wɛ, gɔ nɛ mɔk nɛ mɛɛk woos yɔ wi woo hi mɔɔt yɔ wi dagɔ. Yɔ wi gisin nɛ Bɛt Dɔglɔ Rɔb bɔ dɔko, wi woo yɛms du hi lurk du sɛw an bɔwi ɗɔbs doo za gbun a nɛ tees du.

10Nɛɛ ɗɔbsigya wɛ, nɛ gi segyaadɛ wiinɛ, Bɛt be, gi segya wi hɛw. Ɗɔɔtil wi yɔ wi ɗɔɔt a nɛ teesdu wi gi doo gaatyɔ, doo riityɔ, wi taan hinza a̧a̧bi. 11Nɛ mɛɛ a wi woosin nɛ hin an baa gɔ gi kaŋkig waatɔ; 12wi waa wi gisinnɛ muul ɓaasig gbunu gbunu, wi gi kpoos nɛ rɔɔko, wi gisin raak hi tɛŋko an nɛ woohin an ɛmbil nɛ gi riis Bɛt yɔ ginɛ elik an nɛ gul a gi waat du hi a gi gbɔlums du.

13Wɛɛ ɓɛ, hinyɔ wi waak Bɛt baanik dɔŋgɔ ge gɛ: a yɔ nɛ ta̧a̧ Bɛt dɔgl yɔ wi dɔgsinɛ, nɛ kɛmɔ nɛ́ tā̧ā̧ an ɗoo za dɔgl gɛ, nɛ ta̧a̧ an Bɛt dɔglɛ, anyɔ gi hi rɔbo. Dɔglɔ wɛɛ gi wook nɛ kpoos du anyɔ nɛ ɗɔbsige.

14Nɛya, yɛ̧ɛ̧dɛ wɛ, nɛ fɔb Yeesu fɔkya ɔksil wɔ hi gi a Yahuduya, wɔ hi gi Bɛt doodɔ hi ɔks gbun hi Yeesu Kristu, nɛɛ nɛ riitin an hii be. Nɛ mɔm ya̧a̧rhant wɔ an hii be, nɛ yɔ̧ya̧a̧r a dood nɛ wɔ hi naan du an hii yɔ hi yɔ̧ a Yahuduya wɔ hi naan du. 15Yahuduya wɔ hi gbɔm Waar Yeesu , hi Bɛtya̧a̧kɛŋkya wɔ hɛw, hi wɛɛ hi niniw be. Hí hās Bɛt kpoosɔ gɛ, hi gi dood sɛw lɔlya̧ hɛ̧ɛ̧nikyaadɛyɔ. 16Ya̧a̧nɛ, hi giw a̧a̧nik hi tɛŋk an bɔwi dɔks dood wɔ hi taa Yahuduya gɛ Bɛtdɔglɔ an hi za̧a̧; anbɔ ro, hi waa hi hi̧i̧sig hinha̧a̧l goon bɔ hi hinha̧a̧lɛ gi guk hɛbtdi. Yɛrɛ Bɛt nɔɔtigɔ zaa gɔ hi zulha ma ɓɔrɔ.

17Nɛya yɛ̧ɛ̧dɛ wɛ, wɛ hɛɛtin am kaasi hi nɛya, wɛ gbɛntin gɛ, mi rāā a wɛ hɛɛtin kpoos du gɛ. Ha̧a̧siw gbɔɔltɔnɔ daarlɛlɛ an wi wɛɛ wi seenɛ wi gbɛn muut nɛ ɓɛ. 18Ha̧a̧w an wi zaa a nɛɛge. Mii Pol , ha̧a̧sim anbɔ dɔɔ kittɔnɔ, wɛɛ Saydanu a̧a̧nuw-a̧a̧nɔ. 19Nɛ kpoos wi gbaak bɔ gi seek bɔ zaanɔ? Wi laatig a bɔ dɔŋgo? Bɔ gi ɗɛɛt wi gbɔlums hinyɔ gɔ wi gɔs zul wi gbɔlums dɔŋgɔ ge a ɔ̧tyɔ waar wɛ Yeesu Kristu gɔ gi zaa gedu nɔ? Nɛ gɛ nɛɛ ma mi? 20Hɔɔ! Nɛɛ gi gbɔlums wi hi hat wi!

Currently Selected:

1 TESALONIKI 2: NTD

Highlight

Copy

Compare