1 PIYƐR 5

1Mi ɓaasig ɗɛntɛ Bɛtwooskaŋkigya wɔ a nɛ teesdu muulɛ. Mii yɔ mi gi ɗɛnt Bɛtwooszulya an nɛɛ be, mi gbɛn Kristu ya̧a̧rhantɔ bɔ yɔ̧, mí wɛɛ mí dag gbɔlums yɔ gɔ gi mida minɛ be. 2Oon tam wɔ Bɛt gaan naan du an nɛ kaŋkihi; oonɛhi hi kpoos nɛ sɛw an hinyɔ Bɛt ha̧a̧ge, hi taan fɛ̧ɛ̧ko. Oonɛhi hi hato, taa hi rɔɔsɗɔkum ha̧a̧l a kpoos du. 3Bɔnɛ wɛɛ waar ɛ a dood wɔ Bɛt gaanɛ hi zulha. Lab gɛ, yɛrɛ wɛɛsin tam wɔ gbɔnɔdorkya rɔbɛ.

4Gɔ gi anbɔ, Nɛɛra Gbɔɔl bɔ gɔ gi midza, nɛ dag waar umskal gbɔɔl yɔ gɔ haŋs gɛ an dɔɔrɔɔs nɛ. 5Gbunɔ, nɛɛ walɛsɛrɛ wɛ, tiisin zul nɛ a ɗɛntɛ wɔ hi dɔŋdi. Nɛɛ sɛw wɛɛtinnɛ zulhɔnikyaadɛ. Hi bi̧i̧ a Bɛt ɗɛɛrwol du a Bɛt gɔ kpɛ̧ɛ̧ zulpɛɛkya wɔ gbɔnɔya̧,

Bɛt gɔ ɓaas zulɔ a zulpɛɛkya wɔ hi gbaŋgi, wɛɛ gi zultiisigya wɔ rɔbtig gaako.

6Yɔ anbɔ, tiisin zul nɛ a Bɛt Tɛŋkya bɔ gi dɔŋdi, an ɔ̧tyɔ Bɛt gɔ gi ha̧a̧ge gi wɛɛnin gbɔlɛ. 7Bɔnɛ mɔk hinza, gaan mɔkil nɛ sɛw a Bɛt ge, anyɔ gin ooko, gi gin kaŋkugo. 8Kɔmbin lɔlɛ, oonɛ. Loorɛha̧a̧lɛ, lɔlhɛ̧ɛ̧niknɛya bɔ gi gbɛ̧ɛ̧kig lɛl sɛw gi tɛk dood an naamnɔɔ yɔ gi tɛk nambo an gi tɔbrige gi hirk nɔɔha.

9Yansinɛg gbɔnɔ hi ɗɔbsil nɛ yɔ er bɛttɔnɔ a nɛ kpoos du hi tɛŋko. Nɛ mɛɛ a yɛ̧ɛ̧dɛ Yeesu fɔkya wɔ waal du sɛw hi yɔ̧k ya̧a̧rhant gbun bɔ gii an nɛya. 10Yɛrɛ gɔ nɛ yɔ̧ya̧a̧r gi am kaasi, Bɛt hi zulɔ, gi gɛmsinɛ, gi esinɛ, gi gaan tɛŋko, an nɛ er bɛttɔnɔ an hɛɛlkpari a zɛɛ du. Bɛt yɔ gi waasig dood sɛw rɔbtig gɔk hi gbɔnɔ sɔmsɔm, elin an nɛ ɔks hi gii a gbɔlumsɔ yɔ gi faa gedu a Kristu naan du. 11Tɛŋk gi ge faa. Aanbɔ!

12Mii Piyɛr , Silas yɔ mi ta̧a̧ge an yɛ̧ɛ̧ mi rɔb Yeesu fɔkya gii ɗaasum ɗɛɛrwolwaa yɛrɛ bi̧i̧ko. Ha̧a̧m an mi ɓatsin muulɛ mi dɔgsin hin bɛttɔnɔ: a hinyɔ nɛ zaŋgik yɔ gi Bɛt gɛmsilɔ rɔb dɔglɛ. Waan hi kpoos nɛ sɛw a Bɛt gɛmsilɔ bɔ gedu. 13Yeesu fɔkya wɔ hi gi a Baabila, dood wɔ Bɛt sɛ̧ɛ̧hi an nɛya hi boon du hi waa mi Markus hɛw. 14Bootinnɛ hi yɛ̧ɛ̧dums hato. Wɔ nɛ gi Kristu doodɔ, an boolum gigi hi nɛɛ sɛw. Aanbɔ!

Currently Selected:

1 PIYƐR 5: NTD

Highlight

Copy

Compare