1 PIYƐR 3

1Gbunɔ, nɛɛd wɛ, tiisin zul nɛ a wal nɛ hi dɔŋdi. An zaadɛya̧ hi ɗɔbs Bɛt dɔgl gɛ, gɔ hi gbɛn waabil nɛ rɔb bɔ, gi gaahi ɗɔbsigi, an nɛ boo nɛ dɔgl gbun mɔɔt gɛ si̧, hi zɛmr kpoosya̧, hi ta̧a̧ Waar Yeesu. 2Yɔ hi gbɛn hoob gin ha̧a̧k Bɛto hi waabil nɛ gaati gii hí zɛmr mɔkilya̧. 3Bɔnɛ mɔk an nɛ wɛɛn hinyɔ gi kuuha gii bɛti hi zul haŋki, hi wɔd za wɔ hi gɔn hɛɛlmɔto nɛ hek a muulɛ an kɔ̧ɔ̧tigi hi gbandil bɛti. 4Yɛrɛ bɛtig nɛ yɛgi fu̧u̧z a nɛ kpoos du. Gig bɛtig rɔb yɔ gɔ ha̧tir gɛ. Raakɔ a nɛ wɛɛ dood zulhɔnikyaadɛ hi kpoos saŋktyaadɛ. Hinbɔ lab gii gi hinɗɔbt yɔ daarlɛl a Bɛt muutdu.

5Amntɔnɔ, nɛɛd gaatɛ wɔ hi gbaa mɔkilya̧ a Bɛt ge, hi gbaa kɔ̧ɔ̧tig a kpoos du anbɔ be, hi wɛɛ hi tiis zulya̧ a walya̧ dɔŋdi be. 6Mɔkin Saratu dɔglɔ yɔ kɛms Abraham tɔnɛ wɛɛ elig a ɗɛntyɔ. Nɛ gi wook rɔb kol gi tuun hinza gɛ, nɛ wɛɛ Saratu wāāt ma. 7Gbunɔ, nɛɛ walɛ wɛ, ɗɔɔtin rɔbtɔnɔ hi nɛɛd nɛ. Mɛɛn a nɛɛd tɛŋkya̧ rı̄ı̄tin hi tɛŋk nɛnɛ gɛ, ɗɔbsinɛhi. Ya̧a̧nɛ, hii be, Bɛt rɔ̀bsihi gaahi za̧a̧tig hi nɛɛ lɛlgbunu, ɗɔbsinɛhi an bɔ hinza gi ans zɔ̧k nɛ gbɔnɔ tuurikɔ a Bɛt ge.

8Yɔ̧ɔ̧sumɔ, nɛɛ sɛw, ɔksin kpoos nɛ lɛlgbunu, mɛɛtinnɛ ya̧a̧rɛ, gi ha̧a̧tinnɛ an yɛ̧ɛ̧dɛ Yeesu fɔkyaadɛ, ginin kpoos rɔbo, tiisin zul nɛ. 9Bɔnɛ wɛɛn ha̧a̧l a za̧a̧nyɔ gɔsin ha̧a̧l ge, bɔnɛ nii za̧a̧nyɔ niinɛ. Yɛrɛ rɔbsin dood sɛw. Bɛt elin an nɛ rɔbsihi, nɛ wɛɛ nɛ dag rɔbs a Bɛt naan du be. 10Yɔ anbɔ, hi bi̧i̧ a Bɛt ɗɛɛrwol du:

a za̧a̧nyɔ ha̧a̧g an gi dag hat a gi waabil du, gi ha̧a̧g an hin sɛw gi resig bɛttɔnɔ, ɔɔg ya̧a̧ha̧a̧l booki, ɔɔg mɛl-eer bookɔ be; 11ɔɔg ha̧a̧lɛ, woog hinrɔbo, tɛg boolumi, i̧i̧yig tɛŋk an gi zɛmɔ. 12Waar Bɛt gaas lɔlɔ an gi seez dood riitɛ wɔ hiya. Gbaa tɔnɔ an gi kɛm zɔ̧kya̧. Wɛɛ gi seek ha̧a̧lwookya wɔ hi nɔɔtig lɔlɛ, gi zulɔ ɓaasig a hi gbaŋgi.

13Gid nɛ fɔk hinrɔb hi kpoos nɛ sɛw, bɔ ɗɛɛ an gi gɔsin hinza nɔ? 14An nɛ yɔ̧ ya̧a̧rhant a hinriit dɔŋg si̧, nɛ dag hato. Bɔ hoob gi ha̧a̧n hiya, bɔ zul nɛ gi namɔ. 15Yɛrɛ gaan Kristu waar ums ɗɔɔtillɛlɔ nɛ kpoos du nɛ tiis zul nɛ gi dɔŋdi. Waan nɛ kɔm lɔlɛ. Gɔ gi anbɔ, za̧a̧nza gi ɛrin mɔkil nɛ yɔ nɛ gbaa Yeesu ge dɔglɔ, nɛ ɗɛ́ɛ an nɛ dɔks zul nɛ hin rɔbtɔnɔ. 16Yɛrɛ gɔ nɛ gihi gooko, nɛ goohi hi zulhɔniki hi ɗɔbsigi, an kpoos nɛ gi er bɛttɔnɔ. Gid lab dood wɔ hi niik waabil nɛ rɔb bɔ ɔks hi Kristu, seem gi wa̧a̧hi a ɔ̧tyɔ gɔ hi boo ya̧a̧ha̧a̧l nɛ zulha gedu.

17À Bɛt ha̧a̧g an nɛ yɔ̧ ya̧a̧rhant a hinrɔbwook dɔŋgo, hin bɔ lab daarɔ hi anyɔ gɔ nɛ yɔ̧ ya̧a̧rhant a hinha̧a̧l wook dɔŋgo. 18Ya̧a̧nɛ, Kristu Doo Rɔbgɔkya bɔ wɔr a dood ha̧a̧l-gɔkya hinha̧a̧l dɔŋgo dɔɔ gbun gaati an gi ka̧wɛ a Bɛt ge. Wɔr yɔ̧ɔ̧sumyɔ, taa zaa wɔrk nɛ zaŋ. Dood hi gbɔm muulɔ, wɛɛ Bɛt wɛnz kolɔ a za̧a̧tig du. 19Yɔ kolɔ wɛɛz a za̧a̧tig du anbɔ, re dɔks mɔkil wɔ hi gi luknɔ du Bɛt dɔglɔ. 20Amntɔnɔ, yɔ Bɛt oo lɛl gi am a ɔ̧tyɔ Nɔwe gi dootig lɛmb gbɔɔl bɔ gedu, mɔkil wɔrɔ hí kɛ̄msigtɔn gɛ. Hinɔ gii dood kaasi, raakɔ, a dood gɛ̧ɛ̧sɛ hi za̧a̧ a mɛm ha.

21Hin bɔ lab gi hintuusingoya yɔ gi zuunik Bɛtmɛm yɔ gɔ za̧a̧sinɛ. Gɔ nɛ dag Bɛtmɛmɛ nɛ taa muul nɛ hotig an nɛ ha̧s libto. Yɛrɛ nɛ ɛrk Bɛt an gi gaas kpoos nɛ gi er bɛttɔnɔ. Yɔ Yeesu Kristu rɛml a wɔrkɛ teesdu gii Bɛtmɛm bɔ gi za̧a̧sinɛ. 22Yeesu dɔɔ a bɛtha, wɛɛ gi ɗɔɔtig a Bɛt naanrɔbo, wɛɛ wɛɛ doo gbɔɔl a Bɛt walɛsɛrɛ gbɔlɛ wɔ hi mɔkil tɛŋkyaadɛ wɔ hi zul ha sɛw.

Currently Selected:

1 PIYƐR 3: NTD

Highlight

Copy

Compare