1 KƆRƐŊGTU 7

1Hɔɔ! A ɗɛɛrwol yɔ nɛ bi̧i̧sim gedu, mi mɔkɔ a bɛr an bɔ̄ wal gi ki̧i̧ nisɛ. 2Yɛrɛ wal sɛw loog nisɛ, wɛɛ nɛɛd sɛw loog walɔ, an bɔ hatil ha̧a̧l gi giro. 3Wal woosig nisɔ hinyɔ ha̧a̧ge, nis be woosig waltɔ hinyɔ ha̧a̧ge. 4Nis ēr zulɔ gɛ, wal gii gi nisɔ zulɛ, wal be, er zulɔ gɛ, nisɔ gii er waltɔ zulɛ.

5Bɔnɛ intin kusili, hinɔ gi taa an nɛ eer sɛw nɛ́ ta̧a̧ an nɛ lil kusig an nɛ zɔ̧k Bɛt gii gɛ. An nɛ lilk anbɔ, nɛ lil kaasi, kuudu wɛɛn nɛ kusɔ, an bɔ Saydanu gi maatinɛ an nɛ mat a mans du a kpoos nɛ hɔntil bɔ gi dɔŋgo. 6Mi raak hin bɔ lab an gbɔnɔgaakyɔ, taa an dɔglraaki. 7Ha̧a̧mi an dood sɛw hi gi an miya, nɛ wɛ dag gaas sɔmsɔm a Bɛt ge ma mi! Doo za gin an yɛrɛ, zaabe gin an bɔrɔ. 8Mi gi raasig walɛ wɔ hi loodir nis gɛ hi nɛɛdsɛrɛ wɔ, hi kuurɛ nɛɛd wɔ, mi raa an bɛrɔ hi kɔm kaat an miya.

9Nɛ gid nɛ ɗɛ̄ɛ̄ kattums mɔŋk anbɔ gɛ, loon nisɛ, loon walɔ, ya̧a̧nɛ, lottins gii bɛrɔ hi anyɔ gɔ nɛ gaa muul nɛ ɗɔkum du gi gi dɔ̧ɔ̧k an laa. 10Hinyɔ gi seek dood wɔ hi lootinu, mi gisin raak a bɔ nis gi hɛɛtin hi waltɔ. Mii mi rāā anbɔ kpɔd gɛ, Waar Yeesu gii gi raak anbɔ. 11(Gid hɛɛtin hi waltɔ, waag anbɔ, bɔgi loo wal zaa, zaabe gi wɛɛzɔ gi bool hi waltɔ), wɛɛ bɔ̄ wal gi nin nisɔ nɛ zaŋ.

12À dood zaadɛ wɔ hi gbaŋgi, hinyɔ mi gisin raako fu̧u̧z a mi mɔkil du, taa dɔglyɔ Waar Yeesu raasimi: mi mɔk a gid yɛ̧ɛ̧ wɛ za Yeesu fɔkya gin nis yɔ taa Yeesu fɔk gɛ, wɛɛ nis bɔ gi mɔkɔ a gi waa hi giya, bɔ wal bɔ gi bisige. 13Wɛɛ nis za Yeesu fɔkya gi gin waltɔ yɔ taa Yeesu -fɔkya gɛ, gi mɔkɔ a gi waa hi giya, bɔgi bis waltɔ. 14Ya̧a̧nɛ wal bɔ yɔ taa Yeesu fɔkya gɛ, gāaga a Bɛt muutdu a nisɔ dɔŋgo. Wɛɛ nis bɔ yɔ taa Yeesu fɔkya gɛ, gāaga a Bɛt muutdu a wal bɔ gi dɔŋgo. À anbɔ gɛ, waat nɛ wɔ hi gi ɓi̧i̧limyaadɛ a Bɛt muutdu. Yɛrɛ ɓɔri hi gi gaatɛ ma a Bɛt muutdu.

15Za̧a̧nyɔ taa Yeesu ɗɔbsigya gɛ, gi ha̧a̧g hɛɛtingo hi nisɔ, zaabe waltɔ yɔ gi Yeesu fɔkya, ɔɔnɛg gi rekɔ. Yɔ anbɔ yɔ Yeesu fɔkya waltɔ bɔ, zaabe nis bɔ zulɔ tuutu aakil du a lottins bɔ gedu. Bɛt raa a wɛ waa boolum du. 16Mɔya nisɛ, mɔ mɛɛn nɔ a kinsa mɔ za̧a̧s wal mɔ? Walɔ, mɔɔ be, mɔ mɛɛn nɔ a kinsa mɔ za̧a̧s nis mɔ? 17Hinyɔ gi gbɔɔl gɛ: an bɔ ɓɛ, ɛmbig ɛmbil yɔ Waar Yeesu gaage gii kpɔd gi ɗɔɔt ɗɔɔtilɔ anyɔ Bɛt da elinge. Mi dɔk anbɔ a lɛlyɔ Yeesu fɔkya wɔ hi mɔksig ge sɛw.

18Za̧a̧nyɔ Bɛt elige gi zɛŋge dɔmi, waag dɔmi, bɔgi goo hinɔ zɛmrik an gi wɛɛ kpaari; za̧a̧nyɔ Bɛt elige gi zɛŋge kpaari, waag kpaari, bɔgi nabɔ. 19Dɔms ɗāā hinza gɛ, wɛɛ kpaarums be ɗāā hinza gɛ be. Hinyɔ gi gbɔɔl gɛ dɔgl yɔ Bɛt raasɛ fɔkɔ. 20Doo yɛgi ɗɔɔt anyɔ Bɛt zɛmrige gi elige an gi fɔ Yeesu. 21Gid Bɛt yɔ elimɔ gi zɛmɔ gbaari, bɔmɔ zɛks zul mɔ. Gid mɔ dag tɛŋk an mɔ tuu a gbaarums bɔ gedu be, woom hinɔ.

22Ya̧a̧nɛ gbaar yɔ Waar Yeesu elige, gi an tuus zulɔ tuus a gbaarums du anyɔ Waar Yeesu gi zulɔ, wɛɛ za̧a̧nyɔ zulɔ gi aakil du Bɛt gi elige, gi Kristu gbaar ɔ̧ɔ̧nɛ. 23Bɔnɛ zɛnɔ, Bɛt zenɛ hi rɔɔs ɗɔbtyɔ, bɔnɛ wɛɛs dood gbaari. 24Yɔ anbɔ, yɛ̧ɛ̧dɛ mi wɛ, an bɔ ɓɛ waage a Bɛt muutdu a waabil yɔ da ginɛ gedu anyɔ Bɛt elige. 25Yɛrɛ a dood kaatɛ wɔ hi zulha, mi taan dɔgl za yɔ Waar Yeesu gaam an mi dɔgsihi. Yɛrɛ mí raasin mɔkil miin kpɔd. Lagin dɔgl mi anyɔ nɛ mɛɛ a mi gi fɔk Waar Yeesu hi kpoos mi sɛw a gi tɛŋk du.

26Hinyɔ mi mɔkig a ɔ̧t ɓaatil wɔ gɔ hi sɛ̧ɛ̧b hi dɔŋgo gɛrɛ: bɛr an doo gi kɔm anyɔ giro. 27Mɔ loo nisɛ bɔmɔ tɛb an nɛ hɛɛtinu; mɔ taan nis gɛ, bɔmɔ tɛb an mɔ loo zaa. 28Yɛrɛ gid mɔ loo nisɛ, mɔ gɔ̄ a̧a̧b gɛ, gid nissɛr loo walɔ, gɔ̄ a̧a̧b gɛ: yɛrɛ dood wɔ hi lootin anbɔ hi dag ya̧a̧rhant a hi waabil du, wɛɛ ha̧a̧mi an mi za̧a̧sin hinɔ gedu. 29Yɛ̧ɛ̧dɛ mi wɛ, hinyɔ ha̧a̧m raak gɛrɛ: a lɛl taa aŋko; dood wɔ hi gin nɛɛdɛ gihi an hi taanɔ,

30wɔ hi gi wɔrk kaako, gihi an hi taa kaako, wɔ hi gi dak hato gihi an hi taa hat dako, wɔ hi gi hin zeko gihi an hi taan wɔd wɔ hi zebɔ, 31wɔ hi wook rɔɔs waal ɗu woosɔ, gihi an hi woo rɔɔs bɔ waal du woosɔ gɛ. Ya̧a̧nɛ an waal du gikɔ yɔ giro taa aŋk ha̧a̧ltɔnɔ ma. 32Hā̧a̧m an nɛ zɛks zul nɛ hinɔ gɛ. Za̧a̧nyɔ lōō nis gɛ gi zɛksig zulɔ a Waar Yeesu dɔŋgo, gi tɛk hinyɔ gɔ gi hasin Waar Yeesu kpoosɔ.

33Wɛɛ za̧a̧nyɔ loo nisɛ, gi zɛksig zulɔ hi hinyɔ waaldu, gi tɛk hinyɔ gɔ gi gɔ nistɔ kpoosɔ gi harige, 34yɔ anbɔ kpoosɔ gɛ̧ɛ̧yyɔ. Gbunɔ kuurnɛɛ hi nissɛrɔ hi gi zɛksig zulya̧ a Waar Yeesu woosɔ bɔ gi dɔŋgo anyɔ ha̧a̧hi an hi gàà Bɛt mɔkilya̧ hi muulya̧ sɛw; nis yɔ loo wal be, gi zɛksig zulɔ hi hinwɔ waaldu, gi ɓɛɛk an gi gɔ waltɔ kpoosɔ gi harige. 35Mi dɔk hin bɔ lab rɔbgɔk nɛɛnɛ an mi ɗaasinɛ, nɛɛ hi zul nɛ; mi tɛ̄b an mi a̧nsin gbɔnɔ gɛ, mi dɔko an mi ɗaasinɛ, an wɛ woo hinyɔ rii giya, nɛ waas Waar Yeesu wooswooki hi kpoos nɛ sɛw.

36Doo gi see an gbaagɔ gi daak lottinsi, rii an hi looglo, woog hinyɔ ha̧a̧ge, taa hinha̧a̧l gɔko: lootinihi anyɔ ha̧a̧ge. 37Yɛrɛ za̧a̧nyɔ wɔb a gi kpoos du rɔbtɔnɔ gi ɗɛɛ mɔŋko, hi ha̧a̧tig ɔ̧nɛ gi ha̧a̧g an gi ɔɔge gi waa anbɔ, bɔhi lootinnu, za̧a̧nɔ woo rɔbo.

38Yɔ anbɔ za̧a̧nyɔ lootin hi gbaagɔ, gɔ rɔbo; wɛɛ za̧a̧nyɔ loog gɛ be, gɔ rɔb daarɔ. 39Nis lool wɔy hi lottinsya̧a̧wɔk bɔ gii a waltɔ ge yɔ waltɔ gi za̧a̧tili; waltɔ gi wɔrɔ, nis bɔ zulɔ tuutu, ɗɛɛ an gi loo wal za yɔ ha̧a̧ge; hin gbunu: lootinge hi Yeesu fɔkya kpɔd. 40Mii be, mi mɔk a kuur yɔ kɔmbɔ, gi lōōtin hi wal za gɛ, dag hat daar kuur yɔ wɛɛ gi loo walɔ. Yɔ mi raa anbɔ, mi mɔk a Bɛt Mɔkilɔ gihi miya, gisimi gbɔnɔ goko.

Currently Selected:

1 KƆRƐŊGTU 7: NTD

Highlight

Copy

Compare