1 KƆRƐŊGTU 5

1Kay! Dood hi kɛm a hi dɔk lɛl sɛw a mansnaak gi nɛ teesdu, wɛɛ mansɔ be taa an hi zɛm a dood wɔ hi mɛɛ Bɛt gɛ hi hɛw, gɛ a doo za nɛ tees du gin baatɔ nisɛ. 2Yɔ ginɛ anbɔ si̧, nɛ hubsig muul nɛ hi zulpɛɛki! Wɛɛ nɛ́ gbāā kaal a za̧a̧nyɔ gi wook hin bɔrɔ gi ha̧s a nɛ teesdu gɛ! 3-4Minɛ an muul mi taa hi nɛɛ si̧, mɔkil mi ɔnɛ gi hi nɛya. Mi matin za̧a̧nyɔ woo hin bɔrɔ dɔgl da̧a̧da̧ a Waar Yeesu nuŋgdu, an mi gi a nɛ teesdu. Gɔ nɛ mɔksɔ hi mɔkil mi yɔ nɛ ɔks gedu hi Waar Yeesu tɛŋkɔ, gi an 5nɛ́ gaa za̧a̧n bɔ lab Saydanu naan du an muulɔ gi ha̧tiro, wɛɛ an mɔkilɔ gi za̧a̧ a ɔ̧tyɔ Waar Yeesu gɔ gi gbaa dɔgl gedu.

6Hinza taa an nɛ pɛɛn zul nɛ! Nɛ mɛ̄ɛ̄ a hɛ̧ɛ̧t kaasi ɗuks kok kiml sɛw gɛ ya? 7Tuusin hɛ̧ɛ̧t wɔmntyɔ gi nɛ teesdu an nɛ wɛɛ an kok kiml sekto. Nɛ gi kok kiml ɔ̧ɔ̧ko, nɛ taan hɛ̧ɛ̧t nɛ muul du. Ya̧a̧nɛ Paska naab wɛ yɛɛlɔ, anyɔ Kristu wɔr a wɛ dɔŋgo gaay an Paska Tam yɔ gɔ hi gbɛɛrɔ hi gɔn maako.

8Yɛwɛ nab Paska naab wɛ bɔ bɔwɛ gɔ naabɔ kokɔ hi hɛ̧ɛ̧t wɔmto, bɔgi gi hi hɛ̧ɛ̧t ka̧a̧sya hi ha̧a̧lɛ, yɛwɛ nab hi kpoos gaat rɔbya yɔ hɛ̧ɛ̧t hinha̧a̧lya ɔks gedu gɛ. 9Mi bi̧i̧sin a mi ɗɛɛrwol du a bɔnɛ ɔks hi mansnaak-yaadɛ. 10Mí bı̧̄ı̧̄sin an nɛ hɛml hi mansnaakyaadɛ a waali du hii gɛ, zaabe hi ɗɔkumyaadɛ hi luurɛ hi maakfɔkyaadɛ a waali du. À gi nɛ an nɛ hɛml hi hiya, yɔ gi nɛ an nɛ tuu waal bɔ gedu.

11Yɛrɛ hinyɔ mi bi̧i̧sin mi ɗɛɛrwol bɔ gedu, gɛ a bɔnɛ ɔks hi doo za yɔ hi gig elik a gi Yeesu fɔkyayɔ, wɛɛ hi mɛɛ dɔglɔ be a gi mansnaakya, ɗɔkumya, zaabe maakfɔkya, dooniikya, bumwɔnikya, zaabe luuri, bɔnɛ le nɛ hin hi za̧a̧nɔ hɛw. 12Dɔgl mi taadu an mi gbaas dood wɔ hi taa Yeesu fɔkya gɛ dɔglɛ. Nɛ gi an nɛ gbaas dood wɔ hi gi nɛ teesdu hii dɔgl ma mi? 13Bɛt gii gi gbaas dood wɔ lakdi hi taag fɔk gɛ dɔglɛ. Ya̧a̧nɛ Bɛt dɔglɔ gi raa a ha̧sin doo ha̧a̧l bɔ nɛ tees du.

Currently Selected:

1 KƆRƐŊGTU 5: NTD

Highlight

Copy

Compare