1 KƆRƐŊGTU 13

1An mi gi book dood ya̧a̧boonɛ, hi Bɛt walɛsɛrɛ ya̧a̧boon sɛw, mi taan hat gɛ, mi gi an suml yɔ gɔ hi ɓaag gi boo giya, zaabe an ɓark booti tɔs. 2À mi gin tɛŋk an mi kɛm Bɛtya̧a̧ɔ mi mɛɛ dɔgl wɔ dood hi mɛ̄ɛ̄ nɛ gɛ sɛw, hi hinmɛɛk wɔ sɛw, à mi gin ɗɔbsig rɔbo an mi ha̧sin gol wɔ, mi wɛɛ mi taan hat gɛ, mi hintɔsyɔ. 3Wɛɛ an mi gɛ̧ɛ̧ rɔɔs mi sɛw an hi len ya̧a̧rya wɔ, wɛɛ an mi gaa muul mi hi dɔ̧ɔ̧s laadu a Yeesu dɔŋgo, gid mi taan hat gɛ, hinbɔ lab ɗɛ̄ɛ̄ an gi ɗaasim gɛ.

4Hat gi hinmɔŋkya, hat gi hinrɔbo, taan ka̧a̧si, gɔ pɛ̄ɛ̄ zul gɛ, taa zultɔɔsigya; 5hat gɔ gāā seem gɛ, taa niisya, taan nɔɔtigi, gɔ gbāā burs gɛ. 6Hat gɔ dāg hat a hinyɔ gɔ ha̧a̧l gedu gɛ, ɔnɛ gɔ dag hat a rɔb du. 7Hat gi yaatig hinyɔ bɛr gɛ dɔglɔ sɛw, gi ɗɔbsig hin sɛw, gi mɔkighin a hin sɛw ha, gi mɔŋkhin sɛw.

8Hat gɔ kūg gɛ. Dɔgl wɔ dood hi dag a Bɛt ge, ɔ̧tza hí da̧a̧. Ya̧a̧boon za rɔ̀bɛ mɔkilyaadɛ hi wagɔ. Hinmɛɛk wɔ hi wagɔ. 9Ya̧a̧nɛ hinmɛɛk wɛ gi hi welɔ, wɛɛ dɔgl yɔ wɛ kɛŋk a Bɛtya̧a̧ du wɛ kɛm hi wel be. 10Yɛrɛ hinyɔ gaa gi daarlɛl gɔ gi zaa, hinyɔ gi hi welɛ gi wagɔ. 11Yɔ mi ginɛ ya̧a̧mi mi booya̧a̧ an ya̧a̧mi, mi kɛm nɛ hin an ya̧a̧mi, mi mɔk hin mi zul du an ya̧a̧mi; yɔ mi tuur waltɔ, mi ɔɔ ya̧a̧mdɔgl wɔ sɛw.

12Yɛrɛ nɛɛko wɛ seek daarugal du an lɛlwilɔ, gɔ gigi a ɔ̧tɔge wɛ́ gbɛn Bɛt muutdu hi muutdu. Nɛɛko mi mɛɛ bɛrkza kaasi, wɛɛ gɔ gigi a ɔ̧tɔge mí mɛɛ hin bɛttɔnɔ gi da̧a̧ anyɔ Bɛt mɛɛm nɛ bɛttɔnɔ gi da̧a̧ be. 13Yɛrɛ hin taarɛ wɔ hi waak gɛrɛ: ɗɔbsigi, mɔkil-gbaaki hi hato. Wɛɛ hinyɔ gi gbɔɔl gi daar wɛrɛ gɛ hato.

Currently Selected:

1 KƆRƐŊGTU 13: NTD

Highlight

Copy

Compare