1 KƆRƐŊGTU 11

1Woon an miya, anyɔ mi wook an Kristu be.

2Mi baaninɛ anyɔ nɛ waa nɛ gim mɔkugo, hi anyɔ nɛ wɛɛ nɛ fɔk hinwɔ mi goksinɛ mi ɔninɛ. 3Yɛrɛ ma ha̧a̧mi an nɛ mɛɛ a Kristu gii gi walɛ sɛw zulya̧ an wal gi nisɔ zulɛ, wɛɛ anyɔ Bɛt gi Kristu zul ɔ̧nɛ be. 4Wal yɔ gi sɛw gi zɔ̧k Bɛto zaabe gi kɛŋk dɔgl a Bɛt ya̧a̧ du gi dɔko gi gin danɛ zulha gi ha̧a̧nik Kristu yɔ gi zulɔ seemɛ. 5Wɛɛ nis yɔ gi zɔ̧k Bɛto, zaabe gi kɛŋk dɔglɔ a Bɛt ya̧a̧ du gi dɔko, gi yāāt zulɔ hi gbandil gɛ, gi ha̧a̧nik waltɔ yɔ gi zulɔ seemɛ. Gi an hu̧u̧r zulɔ hu̧u̧rɔ.

6Ya̧a̧nɛ, nis gi yāāt zulɔ hi gbandil gɛ, bɛr gɛ, riitin an dɛ̧ɛ̧ susugɔ bɔ dɛ̧ɛ̧ hɛw. Nis zulɔ gi gi dɛ̧ɛ̧ki zaabe hu̧u̧riki gi seemɛ, yɛgi yaat zulɔ hi gbandili. 7Taa an wal gi yaat zulɔ hi gbandili anyɔ gi Bɛt rɛɛsɔ hi Bɛt gbɔlumsɔ; nis be gi wal gbɔlumsɛ. 8Rɔb ɔnɛ, wal fuu a nis ge gɛ, nis gii fu̧u̧ a wal ge. 9Wɛɛ Bɛt kı̄m wal a nis dɔŋg gɛ, Bɛt kim nis ɔnɛ a wal dɔŋgo.

10Yɔ anbɔ, yɛgi yaat zulɔ hi gbandili a Bɛt walɛsɛrɛ wɔ hi gig gbɛnik hi dɔŋgo, an gi zuun a tiis zulɔ a waltɔ dɔŋdi. 11Yɛrɛ anyɔ wɛ ɔks hi Waar Yeesu , nis tuu wal gɛ, wɛɛ wal tuu nis gɛ. 12Gbunɔ, anyɔ nis fu̧u̧ a wal ge, nis wɛɛ mɔɔ wal be, sɛw gi fu̧u̧zig a Bɛt ge. 13Nɛɛ dɛ̧ɛ̧tin nɛ kpoos du: rii an nis gi zɔ̧ Bɛt hi zul aalɛ gbandil gi taar ya?

14Ànyɔ wɛ rɔ̧ɔ̧sɔ, hinɔ goksɛ a wal gi ɔɔ susugɔ zi̧i̧tɔnɔ gi seemɛ a ge. 15Wɛɛ nis ɔnɛ gisig gbɔlums hinɛ an gi ɔɔ susugɔ zi̧i̧tɔnɔ anyɔ Bɛt gaage an gbandili an gi yaatin zulɔ. 16Yɛrɛ doo za gi ha̧a̧g dɔgl yɛrɛ faako, winɛ wi rɔ̧̄ɔ̧̄s hingok za dɔ̧ɔ̧m gɛ, hi Yeesu fɔkya wɔ ɔksilya̧ wɔ hi gi Bɛt ɔ̧nɛ hɛw, hí rɔ̧̄ɔ̧̄s hingokza gɛ. 17Yɛrɛ hinyɔ mi gisin dɔk ɓɔryɔ, mi taan baanuko. Nɛ taa mɔksig an nɛ gɛmsɔ, nɛ mɔksig an nɛ ha̧a̧tiro.

18Mi yɛɛl mi kɛmɔ a gɔ nɛ mɔks an Yeesu fɔkyaadɛ, wɛɛ gɛ̧ksil gi nɛ tees du. Hinɔ kɔmsim an dɔglɔ gi rɔbo. 19Gi an gɛ̧ksil gi gi a nɛ teesdu an hi mɛɛ wɔ hi ɗɔbsig Bɛt hi rɔb a nɛ tees du. 20Mi see a yɔ gɔ nɛ mɔksɔ an nɛ lehinɛ, nɛ́ lē Waar Yeesu leesɔ bɔ gii gɛ. 21Ya̧a̧nɛ an bɔ sɛw gi dik lees ɔ̧ɔ̧n looko. Zaa hi a̧a̧kig be, wɛɛ zaa hi wɔnik bum be.

22Kay!! Nɛ taan raa an nɛ le gedu nɛ yɔ̧ gedu ya? Zaabe nɛ gi seek Yeesu fɔkya wɔ ɔksilya̧ bɔ gi Bɛt ɔ̧nɛ an hintɔsi, nɛ wɛɛ nɛ gaak dood wɔ hi taan hinza gɛ seem ya ri? Mi dɔgsin a nɔ an nɛ mɛɛ? A gi an hi baaninbaan ya? Ɛ̧-ɛ̧! yɔ anbɔ mi taan baanik ma. 23Ya̧a̧nɛ hinyɔ mi da mi dag a Waar Yeesu ge mi gogsin gɛrɛ: a yɛms yɔ gɔ hi rɛ̧ɛ̧s Waar Yeesu ya̧a̧ gedu, loo koko, 24baan Bɛto, ɓɛɛlɔ, raa:

a yɛrɛ gi muul benɛ yɔ ɓɛɛd a nɛ dɔŋgo, woon anbɔ an gɔ nɛ mɛksin be.

25Kuudu yɔ hi lehin gi da̧a̧, wɛɛ loo dakwaa bɔ bumhob gidu, dɔg

a bumhob bɔ a dakwaa yɛrɛ gedu gi ga̧a̧m be yɔ gi zuunik Bɛt ya̧a̧wɔkɔ seg hi dood giya. Woon anbɔ an gɔ nɛ mɛksinbe a ɔ̧t wɔ gɔ nɛ yɔ̧k zaa a gedu sɛw.

26Ya̧a̧nɛ, an bili gɔ nɛ lek kok yɛrɛ, nɛ wɛɛ nɛ yɔ̧k bumhob bɔ, nɛ gi dɔk Waar Yeesu wɔrkɔ dɔgl ɔ̧nɛ, gi tuur a wɛɛzigɔ bɔ gedu. 27Yɔ anbɔ, za̧a̧nyɔ le Waar Yeesu kokɔ gaat bɔ, zaabe gi yɔ̧ bumhobɔ bɔ gi wɛɛ gi wa̧a̧ zulɔ gɛ, gɔ hin-a̧a̧bi a Waar Yeesu muulɔ bɔ hi ga̧a̧mɔ bɔ hage.

28Doo yɛgi goo zulɔ kete ɓɔr gi ɔɔ kok bɔ leko hi bumhob bɔ yɔ̧ko. 29Ya̧a̧nɛ, za̧a̧nyɔ gi lek kok bɔ, gi yɔ̧k bumhob bɔ gi mɛ̄ɛ̄ a hin wɔrɔ hi gi Waar Yeesu muul ɔ̧ɔ̧n gɛ, gigi seek an lees tɔsyɔ, gi kamsig zulɔ dɔgl-gbaakyɔ. 30Hinɔ gii dood hi taan tɛŋko, hi gumtil kittɔnɔ hi gi a nɛ teesdu, wɛɛ dood zaadɛ hi wɔr be. 31Gid wɛ see zul wɛ bɛttɔnɔ taa an Bɛt gi gbaasɛ dɔglɛ. 32Yɛrɛ Waar Yeesu gisɛ dɔgl-gbaak an giwɛ bookbo an wɛ kɛm tɔnɛ. An gɔ gi zaa gi gis waal dɔgl-gbaako bɔ dɔgl gi matɛ an dood waalya wɔ be.

33Yɔ anbɔ, yɛ̧ɛ̧dɛ mi wɛ, gɔ nɛ ɔksugo an nɛ le Waar Yeesu kokɔ, ootinnɛ. 34a̧kil gi gi ha̧a̧k doo za, leg leesɔ a gi lɛldu, an bɔ kuudu gɔ nɛ ɔksɔ nɛ kamz Bɛt dɔglɔgbaakɔ a nɛ zulha. Gɔ mi zaa ro mi ɔɔ hin zaadɛ wɔ gɛmsugo.

Currently Selected:

1 KƆRƐŊGTU 11: NTD

Highlight

Copy

Compare