RÒMƐŊ Ɓiɓan ɓi ɓi ghɛɓsii lɛ ɓɛɛ konag kì woògh kaàtà ànɛ

Ɓiɓan ɓi ɓi ghɛɓsii lɛ ɓɛɛ konag kì woògh kaàtà ànɛ

Ajɛ̀m ì rìwu ɗì rìghèmɓɛ̀n ɗi Kiris, ki pisɛɛ yɛ̀ɛ Ɓɛ̀yudɛ̀n ɓɛdɛŋ ɓɛ ɓɛ lɔɔghrɛngà ɓɛ gherɛ̀n Yeesus, fɛlɛ yɛ̀ɛ Akilas rì Pirisilya ɓɛ kaàtà Mɛ̀kìkìì mɛ Ɓɛkɛ̀nì-fìtom a ɓuŋi (18:2), ɓɛ tumɛ̀ngà rì sààtì ɗi Syeesyee à Ɓɔlɛ a Rom di beg yi mɛ ghaghi lɛsàg. Fɔɔnnɛ kìseŋi ki ǹtonto ki ɓaghà di ki ti wɔɔ, cààmɛ̀n ki Pol à kɛ̀ɛ̀kɛɛ a Sirii, rì a Azii Minɛɛr ànɛ ɓɛɛ̀ rereŋi gɛɛ̀nɛ lɛ Turikii ànɛ a Azii, rì ɓi kìlɔŋ ki Gìrɛg ɓi rìkakàlì ɗi Syeesyee à Ɓɔlɛ. Bɛ̀ll à faghà Pol ntɛ̀g wulɛ a ghagsi ɓum Jɛ̀ɛ̀ yìì à kpaŋ a ɓɛ̀yɔ̀ŋyɔ̀ŋ ɓɛ zi. Kìɓan kiǹ kɛɛ̀ki à ɓaghà rì zày ìnɛ lɛ a kpaŋ a Rom rì a Kpanya. Ɓɛ yii ɓi nkòo à ki kpagà tì a Kpanya. Wɔ̀lɛ, ɓi rìɓùŋɛ̀n ɗi rikɛ̀ɛ̀ ɗii ɗiǹ, Pol à kàngà ɓɛ̀kìristɛ̀n ɓɛ a Rom (1:7). Gàɓ ìdɛŋ ìnɛ ɓi ɓɔ ìi nti ì taŋzàg yɛ̀ɛ ɓɛ-Pirisilya ɓɛɛ̀ Akilas (16:3-5).

Kaàtà ànɛ àrì ɓiì ghɛɓsii Pol lɛ a resi ɓɛ̀kìristɛ̀n ɓɛ a Rom kìsay ki Bɛ̀ll à faghà nyi lɛ a ghagsi Syeesyee à Ɓɔlɛ a ɓumɓɛ ɓɛ yin Ɓɛ̀yudɛ̀n. Kaàtà ànɛ yɛɛ konaagh kì tɛɛ̀zii Syeesyee à Ɓɔlɛ ànɛ Pol à kakàlìghà, ànɛ nyimiɗ a reŋii lɛ <<Ìtèɗ wu Bɛ̀ll à ti kìlàg kìsay ri wɔ lɛ a ghɛɓsi ɓum ɓɛ̀cèm ɓɛ ɓɛ gherɛɛ, à tumɛ̀n lɛ Ɓɛ̀yudɛ̀n, à kpaŋ lɛ ɓumɓɛ ɓɛ yin Ɓɛ̀yudɛ̀n>> (1:16).

Kìɓan ki ki yeesìghà ɓɛ̀kìristɛ̀n ɓɛ ǹtonto ki ɓaghà nɗɛli wu ɓɛ̀kìristɛ̀n ɓɛ ɓɛ ɓaghà ɓi ɓiyali ɓi Ɓɛ̀yudɛ̀n ɓɛ ghɛɛ̀sɛ̀ngà kì ɓaà rì wɔ ɓi san ànɛ a ɓìdɔ̀gsɛna ɓi Ɓɛ̀yudɛ̀n. Pol à ɓugà kìɓan ki ɓi ɓɛ̀kaàtà ɓii ɓɛdɛŋ fɛlɛ yɛ̀ɛ ànɛ à kàngà Ɓɛ̀gàlat. Pol à kalii lɛ Syeesyee à Ɓɔlɛ ànɛ nyiì làalamɓɛ̀n ànɛn à rì ɓisuu ɓum ɓɛ̀cèm kɛ̀ɛ̀ ǹlànag. Fɔɔnnɛ à tɛɛ̀zii kì rèsii yɛ̀ɛ Bɛ̀ll a ghɛɛghɛɓsì mum ànɛ à ɗimgà, àa soo rì la di à tyweeyii nyi (1:18--8:39).

Ajɛ̀m ìnɛn innɛ Pol à ɓuŋi kìɓan ki lɛ kìgwey ki ɓum a Isirayɛl ki ɓeni lɔŋ Kiris ɓi maa cààmɛ̀n. Pol lɛ rìɓèn ɗi ɓɛ ɓeni Kiris ɗiǹ ɗi yogsii ɓi com ɓi fèg à Bɛ̀ll, ɓisuulɛ geesɛ̀n ìrì ɓiì siitɛɛ ki ghɛnɛɛ ɓi kìɓan kiǹ (9:1--11:36). Ɓigomìnɛ kìrɔnɗem ànɛ Bɛ̀ll a rèresi ɓumɓɛ ɓɛ yin Ɓɛ̀yudɛ̀n à ghɛ̀ɛ̀sɛɛ kì ɓàlɛɛ yɛ̀ɛ ǹɗereŋi wu à reŋii ɓɔ lɛ ɓɛɛ ghɛɓ cɛɓ ki ki ri nyɔn lɛ kɔɔ̀kɔɔ̀ ɓisu wii (12:1--15:13).

Ɓi ri ratɛ̀n ɗi kaàtà wìì anɛ, Pol à wogsii ɓɔ lɛ àrì rì rìyitì ɗi lɛ a kpaŋ̀ a lɔ̀ŋkaa; ɓìtɔkì ɓyɛɛ simi kaàtà ànɛ (15:14--16:27).

Ɓum ɓɛ̀cèm ɓɛ ɓɛɛ̀ kaakaa lɛ ɓɛɛ ghɛǹ ɓi kaàtà ànɛ ɓɛ konaagh kì rèsii kiɓan ki ɓi gòri ìnɛ Bɛ̀ll à fafa ɓum ɓi Yeesus Kiris, ɓɛ ri ɓiì ɓaà lɛ, i ɓɛ ɓali kaàtà ànɛ Pol à kàngà Ɓɛ̀ròmɛŋ ànɛ, ɓɛ kuuràg geesɛ̀n ì Bɛ̀ll (11:33-36); ɓɛ ki ɓa girig ɓɛ tiniyɛn lɛ ɓɛɛ ɓɔgsi Bɛ̀ll yɛ̀ɛ ki ghɛɛ̀sɛɛ lɛ ti ɓɔgsi nyi.

Currently Selected:

RÒMƐŊ Ɓiɓan ɓi ɓi ghɛɓsii lɛ ɓɛɛ konag kì woògh kaàtà ànɛ: BAFNT

Highlight

Copy

Want to have your highlights saved across all your devices? Sign up or sign in

Learn More About Bafia Nouveau Testament

RÒMƐŊ Ɓiɓan ɓi ɓi ghɛɓsii lɛ ɓɛɛ konag kì woògh kaàtà ànɛ

Popular Bible Verses from
RÒMƐŊ Ɓiɓan ɓi ɓi ghɛɓsii lɛ ɓɛɛ konag kì woògh kaàtà ànɛ

Bible:

Bafia

Version: Bafia Nouveau Testament - BAFNT